ჩვენი მკითხველები ხშირად გვთხოვენ რჩევებს, როგორ უნდა მოვამზადოთ ე. წ. “საშობაო” სასმელი. დიდი დავაა სოციალურ ქსელებშიც, სადაც სხვადასხვა რჩევებს სთავაზობენ ერთმანეთს და ბევრი ამბობს, რომ “საშობაოს”, როცა ხილზე შაქრის დაყრას დაიწყებენ, უნდა დაუმატონ სამედიცინო სპირტი ან არაყი.
მიუხედავად იმისა, რომ წარსულში ჩვენ ვწერდით აღნიშნული სასმელის მომზადების წესზე, ვითვალისწინებთ მკითხველების თხოვნას და უფრო დეტალურად გთავაზობთ მომზადების წესს.
ჩვენი აზრით, ყველაზე საუკეთესო ვარიანტია, “საშობაოს” მომზადება არყის თუ სპირტის დამატების გარეშე _ ამის თქმის საშუალებას მრავალწლიანი გამოცდილება გვაძლევს!
ხალხში გავრცელებული მოსაზრებით, აღნიშნულ ლიქიორს “საშობაო” იმიტომ ჰქვია, რომ ვარდფურცლობის დაწყებიდან, დეკემბრის ბოლომდე, გამჭვირვალე ქილაში ვყრით სხვადასხვა ხილს და ვამატებთ შაქარს 1/1 პროპორციით. თავს ვახურავთ მჭიდროდ და ვდგამთ მზიან, მოხერხებულ ადგილზე. მზის გულზე ნახევარი წლის მანძილზე ყოფნისას, სითხე იმდენ სპირტს იღებს, არც არის საჭირო არყის დამატება. თუ მაინც და მაინც გსურთ, რომ მათრობელა ეფექტი შეიძინოს, სპირტი ან არაყი, თქვენი გემოვნებით, გაწურვის შემდეგ, ბოლოს დაუმატებთ.
“საშობაოს” მომზადებას ვიწყებთ მაის-ივნისში, როცა ვარდი ჰყვავის. უმჯობესია, ე. წ. “მაისის ვარდის” ფურცლები ავიღოთ და ჩავყაროთ ქილაში.
ვარდის ფურცლის შემდეგ, მარწყვს და ბუშმალას ჩავყრით. კურკისგან გავათავისუფლოთ ბალი, ბუშმალა და ყველა კურკოვანი…
მთავარი, რაც უნდა გავითვალისწინოთ, არის ის რომ, ხილის რაოდენობის შესაბამისი უნდა იყოს შაქარი და არამც და არამც ნაკლები, რადგან ნაყენი, ადვილი შესაძლებელია, ამჟავდეს. ყველა სახეობის ხილი უნდა იყოს თანაბარი რაოდენობის _ მხოლოდ ასეთ შემთხვევაში არ გადაძლევს რომელიმე მათგანის არომატი _ “საშობაოს” ღირსება სწორედ არის, რომ მისი გემო არც ერთი ხილის გემოს არ უნდა ჰგავდეს და ამით გახდეს “გამოუცნობი”, ეგზოტიკური…
აღნიშნულ სასმელს საკრალურ მნიშვნელობასაც ანიჭებენ _ ის აუცილებლად შობის დღეებში და საახალწლოდ უნდა მიირთვან, მომცრო ჭიქით.
ავტორი: მარინა ჩიხლაძე
