5000-ლარიანი ჯარიმის ქვითარი საპროტესტო აქციის დროს გზის გადაკეტვის გამო, შინაგან საქმეთა სამინისტრომ საქართველოს არაერთ მოქალაქეს არასამუშაო დროს, შუაღამისას მიუტანა.
როგორია ჯარიმის გასაჩივრების წესი _ ამ საკითხზე “გურია ნიუსი” თეო ზაქარაშვილს, “საერთაშორისო გამჭვირვალობა-საქართველოს “პროექტის კოორდინატორს და მთავარ იურისტს ესაუბრა.
_ როგორ აფასებთ შეკრებისა და მანიფესტაციის შესახებ კანონში შესულ ახალ ცვლილებს ?
_ ჩვენ ვფიქრობთ, რომ ეს შეზღუდვები, ისევე როგორც მანამდე არსებული წინა შეზღუდვები სახლმწიფოს მხრიდან, ადმინისტრაციულ სამართალდარღვევათა კოდექსის რეპრესიული მექანიზმის გამოყენებაა. გამომდინარე იქედან, რომ ძალიან ბევრი საქმე შეიტანეს სასამართლოში, ასეთი საკანონმდებლო ცვლილებებით მათთვის უფრო მარტივი გზა იპოვნეს. თუმცა,რა თქმა უნდა, საქართველოს მოქალაქეებს ჯარიმების გასაჩივრების გზა რჩებათ.
_ როგორ უნდა გაასაჩივროს მოქალაქემ ჯარიმა?
_ ჯარიმის ჩაბარებიდან 10 დღის ვადაში მათ უნდა მიმართონ ზემდგომ ადმინისტრაციულ ორგანოს, ანუ შინაგან საქმეთა სამინისტროს. დაიწერება მარტივი საჩივარი, რომ აღნიშნულ ჯარიმას არ ეთანხმება კონკრეტული პირი, შემდეგ უკვე ეს საჩივარი გაიგზავნება შინაგან საქმეთა სამინისტროში. შეიძლება ხელზე მიიტანონ ან რომელიმე ფოსტის მეშვეობით გააგზავნონ საპატრულო პოლიციის დეპარტამენტში, რომელსაც ჩვენ ე.წ. “შუშებიან შენობას“ ვეძახით. ამის შემდეგ, ზემდგომმა ადმინისტრაციულმა ორგანომ უნდა განიხილოს საჩივარი, იმსჯელოს მის შინაარზე და თუ არ დააკმაყოფილებს ამ საჩივარს, მოქალაქეს, დადგენილების ჩაბარებიდან, ისევ ეძლევა საშუალება გაასაჩივროს უკვე სასამართლოში და ეს იქნება შემდეგი ეტაპი. ისევ დაიწერება მარტივი საჩივარი და სასამართლო იმსჯელებს აღნიშნულ ჯარიმაზე. ეს პროცედურები აუცილებელია რომ გავასაჩივროთ ჯარიმა და გასაჩივრების პერიოდში ჯარიმის გადახდის ვალდებულება არ წარმოეშობათ მოქალაქეებს.
თუ ჯარიმის გასაჩივრება არ მოხდა, ამ შემთხვევაში, მოქალაქეებს 30-დღიან ვადაში წარმოეშობათ ვალდებულება, რომ გადაიხადონ ჯარიმა.
_ არის შემთხვევები როცა დაჯარიმებულ პირებს პირდაპირ სასამართლოში იბარებენ. ხომ არ გაქვთ ინფორმაცია, რის მიხედვით განსაზღვრავს შინაგან საქმეთა სამინისტრო ვინ დაიბაროს პირდაპირ სასამართლოში და ვის გამოუწეროს ჯარიმის ოქმი?
_ ადმინისტრაცულ სამართალდარღვევათა კოდექსის 174 პრიმა მუხლში ჩამოწერილია, თუ რა შემთხვევაში რა უნდა მოხდეს და შინაგან საქმეთა სამინისტრო ე.წ. კვალიფიკაციის მიხედვით რომელ ნაწილშიც ჩათვლის რომ პირი შეიძლება სამართალდამრღვევი იყოს, იმის მიხედვით წყვეტს, რომელი სახეობის ჯარიმა დააკისროს.
თუ შსს-მ გამოწერა ისეთი ჯარიმა, რომელიც პირდაპირ სასამართლოში საჩივრდება, მათი მხრიდან, მაშინ საქართველოს მოქალაქეები მიდიან სასამართლოში და იქ ესწრებიან განხილვას, ხოლო თუ ისეთი ჯარიმა გამოწერა შინაგან საქმეთა სამინისტრომ რომელიც სასამართლოში პირდაპირ არ საჩივრდება და ჩააბარა მოქალაქეს, 10 დღის ვადაში ჯარიმის გასაჩივრება შეიძლება.
ჯარიმის წესი და ვადა საჯარიმო ქვითრის უკანა მხარეს უნდა იყოს ახსნილი და დაწერილი. საქართველოს მოქალაქეებს ჯარიმის ქვითრის უკანა მხარის გაცნობის შემდეგაც ექნებათ ინფორმაცია, თუ როგორ უნდა მოიქცნენ და ასევე შეუძლიათ დარეკონ არასამთავრობო ორგანიზაციის ცხელ ხაზზე, სადაც დამატებით კონსულტაციას გავუწევთ ამ ჯარიმებთან დაკავშირებით.
ზოგადად, უკანონო გადაწყვეტილებისგან თავის დაცვა რთულია და შეუძლებელიც, თუმცა, ჩემი განმატებით, ჩვენ, საქართველოს მოქალაქეები ვსარგებლობთ სიტყვისა და გამოხატვის თავისუფლებით, შეკრების, მანიფესტაციის უფლებით. კონსტიტუციით გათვალისწინებულია ჩვენთვის ეს უფლებები და შინაგან საქმეთა სამინისტროს მანკიერი პრაქტიკა რომ არა, ასეთ არც ერთი შემთხვევაზე სამართალწარმოება არ უნდა დაწყებულიყო. ამიტომ, ვფიქრობ, რომ ამ ეტაპზე, საქართველოს მოქალაქეების მხრიდან მაქსიმალურად სწორად ხდება შეკრებისა და მანიფესტაციის შესახებ კანონის გამოყენება.
_ როდესაც შსს-ს მოაქვს ჯარიმის ოქმი, მაგრამ პირი არ ცხოვრობს აღნიშნულ მისამართზე, ამ შემთხვევაში რა ხდება?
_ ამ შემთხვევაში, შესაბამისი განმარტება უნდა გაკეთდეს, რომ არ იბარებთ ჯარიმას, რადგან არ იცნობთ ამ პირს ან არ ცხოვრობს თქვენთან და არ შეგიძლიათ მას დაუკავშირდეთ. შინაგან საქმეთა სამინისტრომ უნდა წაიღოს ეს ჯარიმა და სცადოს სწორ მისამართზე ჩაბარება იმ პირისთვის, ვისაც მიიჩნევს შესაძლო სამართალდამრღვევად.
ავტორი
