სოციალურ ქსელში ჩოხატაურში ავარიის შედეგად გარდაცვლილ ექიმ ანესთეზიოლოგს, ნინო პაიჭაძეს ახლობლები, მეგობრები, პაციენტები ემშვიდობებიან.
“კიდევ ერთხელ გაიმარჯვა სიკვდილმა სიცოცხლეზე. განადგურებული ვართ ყველა ამ საშინელი ტრაგედიით. უფალს ებარებოდეთ, ჩემო სიკეთით და სიყვარულით სავსე ნინო ექიმო”.
“როგორ მიჭირს, ჩვენო თბილო, კეთილო, სიკეთით სავსე ნინო ექიმო, თქვენზე წარსულში საუბარი”.
“თავზარდამცემი დილა გაგვითენდა დღეს ჩოხატაურელებს. რთული სამუშაო დღის შემდეგ სახლში მეუღლესთან ერთად ბრუნდებოდი, ყველასთვის განსაკუთრებულო, გულისხმიერო, თბილო გოგო. შენი ერთი გაღიმება შვება იყო პაციენტებისთვის. ეს რა ნათლისღება გაგვითენე, ნინი. რით ვანუგეშოთ შენი ოჯახი, რა ვუთხრათ შაქროს? ერთმანეთს მდუმარედ შევყურებთ ყველა. გვიჭირს და გვიმძიმს რეალობას თვალი გავუსწოროთ”
“გულისხმიერი და გამორჩეულად თბილი ნინო ექიმი, მთელი გურიის და ჩვენი ლანჩხუთის კლინიკის, პაციენტების და თანამშრომლების იმედი იყო, ნათელში იყოს თქვენი კეთილი სული ნინო ექიმო! ძალიან დასანანი და თავზარდამცემი ამბავია მთელი გურიისთვის და არა მარტო გურიისთვის! უფალს ებარებოდეს თქვენი სული!.
“როგორი ნინო ექიმი მოგვიკვდა”, _ წერენ სოციალურ ქსელში ჩოხატაურელები.
შეგახსენებთ, რომ დღეს, დილით 11 საათზე ჩოხატაური-ოზურგეთის ცენტრალურ გზაზე, სოფელ გორაბერეჟოულის მიმდებარე ტერიტორიაზე ავტოსაგზაო შემთხვევა მოხდა. არსებული ინფორმაციით, ავტომანქანა, რომელსაც გარდაცვლილი ექიმის მეუღლე, შაქრო კუტუბიძე მართავდა, მოცურდა და ხეს შეეჯახა. შეჯახების შედეგად მძიმე ტრამვები მიიღო ნინო ექიმმა, რომლის გადარჩენა ექიმებმა ვერ შეძლეს. ექიმის მეუღლე კი ინფარქტით და სხვა შინაგანი დაზიანებებით ქუთაისის ერთ-ერთ კლინიკაში გადაიყვანეს.
როგორც “გურია ნიუსს” შინაგან საქმეთა სამინისტროში განუცხადეს, მომხდართან დაკავშირებით გამოძიება სისხლის სამართლის კოდექსის 276-ე მუხლით დაიწყო.
“გურია ნიუსი” მწუხარებას გამოთქვამს ნინო ექიმის გარდაცვალების გამო და უსამძიმრებს ოჯახს.
ექიმის მეუღლეს კი, გამოჯანმრთელებას და გამძლეობას უსურვებს.
