ლანჩხუთში კოვიდინფიცირების 12 ახალი შემთხვევა დაფიქსირდა. ამის შესახებ “გურია ნიუსს” ლანჩხუთის საზოგადოებრივი ჯანდაცვის ცენტრის ხელმძღვანელმა ნატო მენაღარიშვილმა განუცხადა.
“ვირუსის გავრცელება მნიშვნელოვნად შემცირებულია. გუშინ ორშაბათი იყო და უფრო მეტი ინფიცირების შემთხვევა დაფიქსირდა, მაგრამ დღეს შედარებით ნაკლების დადასტურებას ველოდებით. ორშაბათობით ყოველთვის მეტია შემთხვევები, შემდეგ კლებულობს. ძალიან შემცირებულია ინფიცირების ახალი შემთხვევების დაფიქსირება, თუმცა იმის თქმა რომ ვირუსი სადღაც გაქრა, არ შეიძლება. ზოგი შეიძლება არც კი მოდის გასატესტად ისეთი უმნიშვნელო სიმპტომები აქვს”,_ ამბობს მენაღარიშვილი.
მენაღარიშვილის ინფორმაციით, ლანჩხუთში კოვიდინფიცირების 10786 შემთხვევაა დაფიქსირებული, გამოჯანმრთელებულია 10736 პაციენტი, გარდაცვლილია 83. აქტიურია ინფიცირების 50 შემთხვევა. პაციენტებიდან 12 ადგილობრივ კოვიდკლინიკაში მკურნალობს.
როგორც ჯანდაცვის ცენტრის ხელმძღვანელი ამბობს, კლინიკაში მყოფი პაციენტების მდგომარეობა საშუალოდ მძიმეა.
“კლინიკაში ძირითადად მოთავსებულები არიან ასაკოვანი ადამიანები, სხვადასხვა ქრონიკული დაავადებებით”,_ ამბობს მენაღარიშვილი.
ინფიცირების შემთხვევები ფიქსირდება სასწავლო დაწესებულებებშიც.
“ფიქსირდება ინფიცირების შემთხვევები როგორც პედაგოგებში, ასევე მოსწავლეებში. ინფიცირების მეტი შემთხვევებია ნიგვზიანის საჯარო სკოლაში. ინფიცირებულია 2 პედაგოგი. პედაგოგები არ დადიან და დისტანციურად ატარებენ გაკვეთილებს. ერთი მოსწავლეა ინფიცირებული და გადაყვანილია კლასი დისტანციურზე”,_ ამბობს მენაღარიშვილი.
