ლანჩხუთის საკრებულოში 2026 წლის ბიუჯეტის პროექტის განხილვა მიმდინარეობს. მერიის მიერ შემოტანილი პროექტის მიხედვით, მომავალი წლის ბიუჯეტი შემოსავლების სახით განსაზღვრულია 22 მილიონ 56 ათასი ლარით, ხოლო მუნიციპალიტეტის საპროგნოზო ხარჯები 27 მილიონ 541 ათასი ლარს შეადგენს.
ამ მონაცემებით, ახალი ბიუჯეტის დეფიციტი თითქმის 5,5 მილიონი ლარია, თუმცა, მუნიციპალიტეტის მერია, საკრებულოში პროექტის განხილვის პროცესში ირწმუნება, რომ ფინანსთა სამინისტროში უახლოეს დღეებში დაგეგმილი შეხვედრის შემდგომ ეს საკითხი გადაიჭრება.
ამასობაში საკრებულოში შესული პროექტი განხილვის პროცესს გადის და რამდენიმე დღეში გარკვეული შენიშვნებით ის უკან დაუბრუნდება მერიას, რომელიც კანონით განსაზღვრული ვადის გასვლამდე, შესწორებულ ვარიანტს ხელახლა წარუდგენს საკრებულოს.
როგორც მოგეხსენებათ, ახალი ბიუჯეტის მაჩვენებლები დამოკიდებულია ქვეყანაში არსებულ მაკროეკონომიკურ მაჩვენებლებზე და საქართველოს კანონმდებლობით დადგენილ მაკროეკონომიკური პარამეტრების ზღვრების დასაცავად გასახორციელებელ ღონისძიებებსა და შეზღუდვებზე. აქედან გამომდინარე, ლანჩხუთის მუნიციპალიტეტის 2026 წლის ბიუჯეტის საპროგნოზო შემოსავლები ასე გამოიყურება:
ბიუჯეტის ერთ-ერთი უმთავრესი შემოსავალი დამატებული ღირებულების გადასახადია და მისი საპროგნოზო მაჩვენებელი განისაზღვრა 16 მილიონ 058 ათასი ლარით, რაც წლევანდელი წლის მაჩვენებელთან შედარებით 7,0 %-ით მეტია.
ქონების გადასახადის საპროგნოზო მაჩვენებელი შეადგენს 2 მილიონ 200 ათას ლარს. ეს 2025 წლის ბიუჯეტის დამტკიცებულ გეგმასთან შედარებით 600 ათასი ლარით არის მეტია, რაც მერიის განმარტებით, გამოწვეულია უცხოურ საწარმოთა ქონების გადასახადის გაზრდით.
გრანტების სახით დაგეგმილი მაჩვენებლები განისაზღვრება 486 ათასი ლარით. მერიის მიერ საკრებულოში წარდგენილ პროექტში ვკითხულობთ, რომ 2025 წლის გეგმიურ მაჩვენებელთან შედარებით გრანტები 25,9 % ით გაიზარდა. თუმცა, აღსანიშნავია, რომ საერთაშორისო ორგანიზაციებიდან მიღებული გრანტების გრაფაში მომავალ წელს ნული მაჩვენებელია მითითებული (ცნობისთვის, 2024 წელს უცხოური გრანტი 316 ათასი ლარი იყო, 2025 წელს კი _ 247 ათასი ლარი), ხოლო ზემონახსენები თანხა წარმოადგენს დელეგირებულ უფლებამოსილების გასახორციელებელ მიზნობრივ ტრანსფერს. რაც შეეხება გრანტებს სახელმწიფო ბიუჯეტიდან და კაპიტალურ ტრანსფერს, რომელიც ძირითადად ინფრასტრუქტურულ თანხებს მოიცავს, ეს ყველაფერი ბიუჯეტის პროექტში ასახული ვერ იქნება.
რაც შეეხება ბიუჯეტის სხვა შემოსავლებს, ის 3 მილიონ 212 ათას ლარს შეადგენს. შემოსავლები საკუთრებიდან განსაზღვრულია 540,0 ათასი ლარის ოდენობით, მათ შორის: რენტა 490,0 ათასი ლარი; პროცენტები 50 ათასი ლარი. 2025 წლის გეგმიური მაჩვენებელი 100 ათასი ლარით შემცირებულია , რაც გამოწვეულია პროცენტების შემოსავლის შემცირებით.
შემოსავლები საქონელისა და მომსახურების რეალიზაციიდან განსაზღვრულია 72 ათასი ლარის ოდენობით, მათ შორის: სანებართვო მოსაკრებლები 20,0 ათასი ლარი;
მოსაკრებელი დასახლებული ტერიტორიის დასუფთავებისთვის 12 ათასი ლარი; არასაბაზრო წესით გაყიდული საქონელი და მომსახურება 40 ათასი ლარი; აღნიშნული შემოსავლები 2025 წლის საპროგნოზო მაჩვენებლებთან შესაბამისობაშია.
რაც შეეხება შემოსავლებს სანქციებიდან, ჯარიმებიდან და საურავებიდან, ის მიმდინარე წლის ბიუჯეტთან შედარებით თითქმის მილიონი ლარითაა შემცირებული და შეადგენს 2 მილიონ 500 ათას ლარს.
როგორც თავში მოგახსენეთ, ხარჯვით ნაწილში მომავალი წლის ბიუჯეტის საპროგნოზო მაჩვენებელი 27 მილიონ 541 ლარითაა განსაზღვრული, რაც 2025 წლის დამტკიცებულ გეგმასთან შედარებით გაზრდილი მაჩვენებელია.
პროექტში მერიის მიერ მითითებული განმარტებით, აღნიშნული ზრდა გამოწვეულია მომსახურების ხარჯების ზრდით.
ირკვევა, რომ 2026 წელს ინფრასტრუქტურის განვითარებას ადგილობრივი ბიუჯეტიდან 5 მილიონ 770 ათასი ლარი უნდა მოხმარდეს. აქედან საგზაო ინფრასტრუქტურის განვითარებაზე 715,0 ათასი ლარი მიიმართება, წყლის სისტემების განვითარებაზე -572 ათასი ლარი, გარე განათებაზე _ 850 ათასი ლარი, კეთილმოწყობის ღონისძიებებზე- მილიონ 312 ათასი ლარი, ხოლო საპროექტო-სახარჯთაღრიცხვო დოკუმენტაციისა და სამშენებლო სამუშაოების ტექნიკური ზედამხედველობისა და ექსპერტიზის ხარჯები განსაზღვრულია 750 ათასი ლარით.
სოფლის მხარდაჭერის პროგრამისთვის უნდა დაიხარჯოს 300 ათასი ლარი, ოჯახების სოციალურ-ეკონომიკური გაძლიერების მხარდაჭერის პროგრამისთვის _ 100 ათასი ლარი.
დასუფთავებასა და გარემოს დაცვაზე 3275,0 ათასი ლარის გახარჯვაა განსაზღვრული. აქედან, დასუფთავება და ნარჩენების გატანაზე _ 2880,0 ათასი ლარი, ხოლო მწვანე ნარგავების მოვლა-პატრონობა _ განვითარებაზე _ 375,0 ათასი ლარი. უპატრონო ცხოველების მოვლითი ღონისძიებებისთვის 20 ათასი ლარია ბიუჯეტის პროექტში გაწერილი.
რაც შეეხება განათლებას, მომავალი წლის ბიუჯეტის პროექტში საამისოდ 5 მილიონ 560 ათასი ლარია გაწერილი. აქედან, სკოლამდელი განათლებაზე – 5 მილიონ 500 ათასი ლარი, ხოლოდარჩენილი 60 ათასი ლარი განათლების ხელშეწყობისთვისაა განკუთვნილი.
სპორტის განვითარების ხელშეწყობისთვის საპროგნოზო ხარჯი 2 მილიონ 690 ათასი ლარითაა განსაზღვრული. კულტურის განვითარების ხელშეწყობისთვის კი -2 მილიონ 800 ათასი ლარი; ახალგაზრდული პროგრამების დასაფინანსებლად კი ბიუჯეტის პროექტში 35 ათასი ლარი მითითებული.
მომავალი წლის ბიუჯეტის საპროგნოზო მაჩვენებლის მიხედვით, ლანჩხუთის ბიუჯეტიდან ჯანმრთელობის დაცვასა და სოციალური უზრუნველყოფისთვის მილიონ 855 ათასი ლარია გაწერილი, მათ შორის: საზოგადოებრივი ჯანმრთელობისა და უსაფრთხო გარემოს უზრუნველყოფისთვის _ 310 ათასი ლარი, სოციალური პროგრამებისთვის _ მილიონ 545 ათასი ლარი.
წარმოდგენილი ბიუჯეტის პროექტის მიხედვით, ტურიზმის განვითარების ხელშეწყობისთვის 300 ათასი ლარია გათვალისწინებული, წინა პერიოდში წარმოქმნილი ვალდებულებების დაფარვა და სასამართლოს გადაწყვეტილებების აღსრულების ფინანსური უზრუნველყოფისთვის კი 5 ათასი ლარი, ხოლო სსიპ მუნიციპალური განვითარების ფონდისთვის დასაფარავი თანხა და ვალის მომსახურება 34 ათასი ლარს წარმოადგენს.
მომავალი წლის მთავარი საფინანსო დოკუმენტის პროექტში მუნიციპალიტეტის სარეზერვო ფონდი 70 ათასი ლარითაა განსაზღვრული, რაც შეეხება მერიისთვის განკუთვნილ დაფინანსებას, ამ კუთხით საპროგნოზო ხარჯი 4 მილიონ 648 ათას ლარს აღემატება, ხოლო საკრებულოს დაფინანსებისთვის მილიონ 669 ათასი ლარია გაწერილი.
