საქართველოს მესამე პრეზიდენტის პირადი ექიმის, ნიკოლოზ ყიფშიძის თქმით, მიხეილ სააკაშვილის ჯანმრთელობის მდგომარეობა უარესდება.
როგორც ყიფშიძე ამბობს, აუცილებელია, მიხეილ სააკაშვილი ალტერნატიულ ექსპერტთა ჯგუფმა რაც შეიძლება სწრაფად მოინახულოს.
“პროცესი რეგრესირებს, უარესდება. ჩემი აზრით, მისი მდგომარეობა დღეს უფრო უარესია, ვიდრე 2 თვის წინ იყო. მე ახლა ველი, რომ ექსპერტიზა შევა, რაც შეიძლება ჩქარა. იმდენად კომპლექსურია ეს ავადმყოფი, რომ ჩვენ პირობებში მისი მკურნალობა შეუძლებელია. ეს ჩემი სუბიექტური აზრია”, – თქვა ნიკოლოზ ყიფშიძემ.
ცენტრ ემპათიის დირექტორი, მარიამ ჯიშკარიანი მიხეილ სააკაშვილის ჯანმრთელობის მდგომარეობასთან დაკავშირებით, იუსტიციის მინისტრის განცხადებებს გამოეხმაურა და ბრეგაძე არაპროფესიონალიზმში დაადანაშაულა.
როგორც ჯიშკარიანმა აღნიშნა, ემპათიის რეკომენდაციები, რომელიც ჯერ კიდევ დეკემბერში გაიცა, პენიტენციურ დაწესებულებას არ გაუთვალისწინებია. მისივე თქმით, აუცილებელია, რომ მიხეილ სააკაშვილი საზღვარგარეთ სამკურნალოდ გადაიყვანონ.
“იუსტიციის მინისტრი საერთოდ არ უნდა საუბრობდეს არანაირ დიაგნოზებზე. მას ხელში უნდა ჰქონდეს გარკვეული ექსპერტიზის დასკვნა და ამის შემდეგ შესაძლებელია გაახმოვანოს, ესა თუ სი შეხედულება. შესაბამისად, ეს მისი მხრიდან არის უმეცრება და არაპროფესიონალიზმი”, – თქვა მარიამ ჯიშკარიანმა.
ცნობისთვის, 25 მაისს მოსამართლე ნინო ჩახნაშვილმა მიხეილ სააკაშვილთან დამოუკიდებელ ექსპერტთა ჯგუფი დაშვებაზე დაცვის მხარის შუამდგომლობა დააკმაყოფილა. მესამე პრეზიდენტის ადვოკატები მოსამართლისგან ითხოვდნენ, დაევალებინა პენიტენციური სამსახურისთვის ცენტრ “ემპათიას” ექსპერტების დაშვება მიხეილ სააკაშვილთან კლინიკაში, ან სასჯელაღსრულების დაწესებულებაში.
წყარო: mtavari.tv
