პარტია “ლელოს” ჩოხატაურელი ლიდერი მალხაზ ჩხიკვაძე სოციალურ ქსელში ვრცელ პოსტს ავრცელებს. ჩხიკვაძეს პოსტის დასაწყისში მუნიციპალიტეტის მერი და საკრებულოს თავმჯდომარე ჰყავს მონიშნული, შესაბამისად, გზავნილის ადრესატები დავით შარაშიძე და ირაკლი კუჭავა არიან.
მალხაზ ჩხიკვაძის პოსტს “გურია ნიუსი” უცვლელად გთავაზობთ.
სამწუხაროდ ჩოხატაურის საკრებულოს კიდევ ერთხელ დაარღვია თვითმმართველობის კოდექსი!!!ჩოხატაურის საკრებულოს 30 ოქტომბრის სხდომაზე საინტერესო საკითხები განიხილეს.
კარგია, რომ ჩოხატაურის საკრებულო არ გაჯიუტდა საკუთარ შეცდომაში, არ დაელოდა სასამართლოს პროცესის წაგებას და თავადვე გააუქმა მისივე უკანონო გადაწყვეტილება ნოდარ დუმბაძის სახელობის სკვერთან გასხვისებასთან დაკავშირებით!
საკვირველია დღის წესრიგის შემდეგი საკითხი რომელიც სოფელ ხიდისთავის ამბულატორიის განუსხვისებელი ქონების კატეგორიიდან დამატებით კატეგორიაში გატატანას და სახელმწიფო საკუთრებაში უსასყიდლოდ გადაცემას შეეხებოდა. საკვირველი იმიტომ რომ ზუსტად ისეთივე კანონდარღვევით მოხდა ამ გადაწყვეტილების მიღება, როგორც ნოდარ დუმბაძის სახელობის სკვერის შემთხვევაში.კერძოდ, მუნიციპალიტეტის ძირითადი (განუსხვისებელი) ქონების გასხვისება რეგულირდება თვითმმართველობის კოდექსის 121-ე მუხლის შესაბამისად, სადაც ნათლად წერია შემდეგი.
„მუხლი 121. მუნიციპალიტეტის ძირითადი (განუსხვისებელი) ქონების გასხვისების წესი1. მუნიციპალიტეტის ძირითადი (განუსხვისებელი) ქონების გასხვისება შესაძლებელია მუნიციპალიტეტის საკრებულოს თანხმობით, მხოლოდ იმ შემთხვევაში, თუ ამ ქონებამ დაკარგა თავისი ფუნქციური დანიშნულება.
2. მუნიციპალიტეტის მერი მუნიციპალიტეტის ძირითადი (განუსხვისებელი) ქონების გასხვისების თაობაზე დასაბუთებულ წინადადებას ყველა საჭირო დოკუმენტთან ერთად წარუდგენს შესაბამის მუნიციპალიტეტის საკრებულოს.
3. მუნიციპალიტეტის საკრებულო მუნიციპალიტეტის ძირითადი (განუსხვისებელი) ქონების გასხვისებაზე მუნიციპალიტეტის მერისთვის თანხმობის მიცემის შესახებ განკარგულებას იღებს სიითი შემადგენლობის არანაკლებ ორი მესამედით.“
ძალიან საინტერესოა ჩოხატაურის მერმა ბატონმა დავით შარაშიძე • Davit Sharashidze -მ როგორ დაასაბუთა ის რომ სოფელ ხიდისთავის ახალრებილიტირებულმა ამბულატორიამ, რომლის რეაბილიტაციისათვის ჩოხატაურის ბიუჯეტიდან 120 ათასი ლარი დაიხარჯა, დაკარგა თავისი ფუნქციური დანიშნულება? სხვა შემთხვევაშში განუსხვისებელი ქონების გასხვისება დაუშვებელია. ასე გვეუბნება თვითმმართველობის კოდექსის 106-ე მუხლის 7 პუნქტი.
„მუხლი 1067. მუნიციპალიტეტის ძირითადი (განუსხვისებელი) ქონების გასხვისება დაუშვებელია, გარდა ამ კანონის 121-ე მუხლით გათვალისწინებული შემთხვევისა. დამატებითი ქონების გასხვისება დასაშვებია ამ კანონითა და საქართველოს სხვა საკანონმდებლო და კანონქვემდებარე ნორმატიული აქტებით დადგენილი წესით.“
მაშინაც კი, თუ ჩოხატაურის მერი შეუძლებელს შეძლებდა და დაასაბუთებდა, რომ მართალია კი დავხარჯეთ ამ ამბულატორიის რეაბილიტაციაზე 120 ათასი ლარი, მაგრამ ამ ქონებამ მაინც დაკარგა პირვანდელი ფუნქციაო, მის გასხვისებას აუცილებლად სჭირდებოდა საკრებულოს წევრთა სიითი შემადგენლობის არანაკლებ ორი მესამედის თანხმობა. ჩოხატაურის საკრებულოში არის 36 საკრებულოს წევრი. 36-ის 2/3 რა მეთოდითაც არ უნდა ვიანგარიშოთ 24-ია. როგორც საკრებულოს ოქმიდან ჩანს აღნიშნულ გადაწყვეტილებას დაეთანხმა საკრებულოს 21 წევრი. აქამდე ასე ვიცოდი რომ 21 აშკარად ნაკლებია 24-ზე. თუ რაიმე ახალი აღმოჩენაა იქნებ ვინმემ გაგვიმხილოს. (ნოდარ დუმბაძის სკვერის საკითხზე მომხრე 15 იყო, 15-იც ნაკლების 24-ზე.) იმედია ის რომ 15 და 21 ნაკლებია 24-ზე არ გახდება საკამათო.
მოკლედ, როგორც წინა შემთხვევაში, აქაც საკრებულოს გადაწყვეტილება მიღებულია მოქმედი კანონმდებლობის დარღვევით და ის უნდა გაუქმდეს.
როგორც ჩანს, მაინც მოგვიწევს სასამართლოში შეხვედრა… რადგან ამჟამად ნაკლებად მაქვს იმედი, რომ საკუთარ გადაწყვეტილებას სასამართლოს გადაწყვეტილების გარეშე გააუქმებს საკრებულო.
ჩოხატაურის პირველი პირების კომენტარს მალხაზ ჩხიკვაძის პოსტთან დაკავშირებით “გურია ნიუსი” მალე შემოგთავაზებთ.
