გუშინ, გამოცემამ „Goal.com“ 2023 წლის „ოქროს ბურთის“ პრეტენდენტთა ახალი და განახლებული სია გამოაქვეყნა. საქართველოს ეროვნული გუნდისა და „ნაპოლის“ თავდამსხმელი ხვიჩა კვარაცხელია რეიტინგში ერთი პოზიციით დაწინაურდა.
ამჟამად ხვიჩა მე-9 ადგილს იკავებს. საუკეთესო სამეულში „პარი სენ ჟერმენის“ ვარსკვლავები კილიან მბაპე, ლიონელ მესი და ნეიმარი არიან.
გუშინ, იტალიელმა სატრანსფერო ექსპერტმა ჩირო ვენერატომ განაცხადა, რომ „ნაპოლის“ შემტევ ირვინ ლოსანოს ამჟამინდელი გუნდის დატოვება სურს.
ასევე, თუ რომელიმე ევროპული კლუბი ვიქტორ ოსიმენის სანაცვლოდ 100-მილიონიან შეთავაზებას გააკეთებს, ნეაპოლელთა პრეზიდენტი აურელიო დე ლაურენტისი ამ წინადადებას აუცილებლად განიხილავს.
გუშინ, 21 წლის ქართველი ფეხბურთელი გიორგი გოჩოლეიშვილი, დონეცკის „შახტარის“ წევრი ოფიციალურად გახდა. ხელშეკრულება ხუთ წელზეა გათვლილი და ის ძალაში 2023 წლის 1 იანვრიდან შევა.
გიორგი გოჩოლეიშვილი „საბურთალოს“ აკადემიის აღზრდილია და მიმდინარე სეზონში 30 მატჩში 4 გოლი და 3 საგოლე პასი მიითვალა. მან საქართველოს 21-წლამდელთა ნაკრების მაისური 7 შეხვედრაში მოირგო, მიმდინარე წლის 17 ნოემბერს კი, მაროკოსთან ეროვნული გუნდის რიგებში ითამაშა.
გუშინ, ესპანურმა „მურსიამ“ ქართველი კალათბურთელი რატი ანდრონიკაშვილი ოფიციალურად წარადგინა. საქართველოს ნაკრების 21 წლის მცველმა ესპანურ კლუბთან კონტრაქტი რამდენიმე დღის წინ გააფორმა და სადებიუტო მატჩის ჩასატარებლად ემზადება.
რატი ანდრონიკაშვილმა 35-ნომრიანი მაისური აიღო და პრეზენტაციაზე ესპანურ ენაზე ისაუბრა:
„შემიძლია გუნდს ენერგია შევმატო როგორც მოედანზე, ასევე – მის გარეთ. მზად ვარ ყველაფერი გავაკეთო, რასაც მწვრთნელი დამავალებს, ვითამაშო დაცვაში, წავიდე შეტევაში, დავკავდე პრესინგით. ძალიან მიხარია, რომ თად მაკფადენთან ერთად ვითამაშებ. ის ჩემი მეგობარია და შემთხვევითი არაა, რომ ნაკრებშიც ერთ ოთახში ვცხოვრობთ. ჩემთვის განსაკუთრებული იქნება, თუ სადებიუტო მატჩს ვიტორიაში ჩავატარებ. მთელი კარიერა მინდოდა „ლიგა ენდესაში“ თამაში და თუ ეს „ბასკონიას“ „ბუესა არენაზე“ მოხდება, ნამდვილად გამიხარდება“. – განაცხადა რატი ანდრონიკაშვილმა.
გუშინ, მსოფლიოში ძიუდოს ერთ–ერთი ცნობილი საიტი“ JudoInside“ გორში ჩატარებულ ჩემპიონთა ლიგაზე გურამ თუშიშვილისა და ტედი რინერის ცნობილ დაპირისპირებას გამოეხმაურა. ვებგვერდმა ეჭვქვეშ დააყენა ქართველი ძიუდოისტის ბრწყინვალე გამარჯვება.
„ჩემპიონთა ლიგაზე ტედი რინერი მსოფლიოს 2018 წლის ჩემპიონმა გურამ თუშიშვილმა დაამარცხა. თუმცა სოციალურ მედიაში ბევრი ფანი კითხვის ნიშნის ქვეშ აყენებს ამ გამარჯვებას. რა თქმა უნდა, ადგილობრივმა ფანებმა დიდი სიამოვნებით აღნიშნეს ეს სენსაცია, როცა გაცილებით მცირეწონოსანმა თუშიშვილმა შეძლო გამარჯვება. მას რინერმაც მიულოცა.
გორში მეოთხედფინალში ერთმანეთს „მებრძოლი“ და „პსჟ“ ხვდებოდნენ. სწორედ აქ შედგა ტიტანთა დაპირისპირება. ანგარიში 2:1 იყო. 19 წამით ადრე, როცა 10-გზის ჩემპიონი ფრანგი ჰარაი–გოშის აკეთებდა, ოლიმპიადის ვიცე–ჩემპიონმა +100 კილო წონით კატეგორიაში, კონტრშეტევამდე, რომელსაც გამარჯვების ვაზარი მოჰყვა, რინერის მარცხენა ფეხის მოცელვა სცადა. ამით თუშიშვილმა გუნდს გამარჯვება მოუპოვა.
ეს ძალიან საშიში ქმედებაა, რომლის შემდეგაც აუხსნელია, როგორ დაფიქსირდა ვაზარი, უდავოა, რომ ჰანსოკუ–მაკე უნდა გახმოვანებულიყო. ჩვენი ინფორმაციით, ეს არც დამსწრე მსაჯებისთვის იყო სადავო. საკამათო გადაწყვეტილებამ ძიუდოს საერთაშორისო ფედერაციის რეაქციაც გამოიწვია. მსაჯების შეფმა დანიელ ლასკაუმ დამკვირვებლებს (ანდრეას ჰამპელი და ფრანკ ოკო) მოსთხოვა გაანალიზონ, თუ რატომ არ დაინიშნა ჰანსოკუ–მაკე. ვამატებთ, რომ ამ საეჭვო ვაზარის წინ, კიდევ იყო საკამათო მომენტი, როცა თუშიშვილი რინერის ზურგსუკან აღმოჩნდა, მაშინ, როცა მანამდე რეფერიმ მატე დაიძახა“.
ცნობილი გახდა, რომ უკლუბოდ დარჩენილი კრიშტიანო რონალდო, რომელიც ამჟამად პორტუგალიის ნაკრებთან ერთად მსოფლიოს ჩემპიონატზე გამოდის, ძალიან ახლოსაა საუდის არაბეთის „ალ–ნასრთან“ კონტრაქტის გაფორმებასთან.
ესპანური გამოცემა „MARCA“–ს მტკიცებით, საუბარია 2,5-წლიან კონტრაქტზე, რომელშიც ხელფასად სეზონში 200 მილიონი ევრო უნდა იყოს გათვალისწინებული. ამრიგად, პორტუგალიელს ერ–რიადის კლუბში ჯამში ნახევარი მილიარდი ევროს გამომუშავების შანსი ეძლევა.
ამჟამად „ალ–ნასრს“ ფრანგი სპეციალისტი რუდი გარსია წვრთნის, რომელსაც თავის დროზე „ლილში“, „მარსელში“, „ლიონსა“ და „რომაში“ უმუშავია. კლუბის ლეგიონერებიდან გამოსარჩევია კოლუმბიელი მეკარე დავიდ ოსპინა და ესპანელი მცველი ალვარო გონსალესი.
ავტორი
