გუშინ, კატარის მუნდიალზე „არასათამაშო დღე“ გახლდათ. მსოფლიო ჩემპიონატის მთავარი „გმირი“ პორტუგალიელი კრიშტიანუ რონალდო აღმოჩნდა. გავრცელდა ინფორმაცია რომ „ვარსკვლავთბიჭუნას“ ნაკრების მთავარ მწვრთნელთან კონფლიქტი ჰქონდა და კატარის მუნდიალის თვითნებურად დატოვებას აპირებდა.
შვეიცარიასთან მატჩში ფერნანდო სანტუშმა ის სკამზე დატოვა და ცხადია, ეს ამბავი ასე უხმაუროდ არ ჩაივლიდა. წინა მატჩებმა აჩვენა, რომ რონალდო, უბრალოდ, ვერ შეხვდა ფორმაში მსოფლიოს ჩემპიონატს. მას სჭირდებოდა რეკორდი და სანტუშმაც ანგარიში გაუწია. აშკარა იყო ისიც, რომ კრიშტიანო მხოლოდ საკუთარ თავზე თამაშობდა.
პორტუგალიურ მედიაში გამოკითხვა ჩატარდა და გულშემატკივართა 70 პროცენტმა არ ისურვა რონალდოს სასტარტოში ხილვა შვეიცარიასთან მერვედფინალურ მატჩში
გუშინ, პორტუგალიურმა გამოცემამ „რეკორდი“ გაავრცელა ცნობა, რომ რონალდომ სანტუშს განუცხადა, რომ ნაკრებიდან საერთოდ წავა. ამის შემდეგ 68 წლის სპეციალისტმა „ჭირვეული ბიჭუნა“ თითქოს „დაამშვიდა“ და ოფიციალურად განაცხადა, რომ რონალდო მაროკოსთან მეოთხედფინალში ითამაშებდა, ოღონდ, ძირითადში იქნებოდა თუ რეზერვში, ეს არ დაუკონკრეტებია.
დაიწერა ისიც, თითქოს რონალდომ შვეიცარიასთან მატჩის მეორე დღეს გუნდთან ერთად არ ივარჯიშა…
გუშინვე, პორტუგალიის ფეხბურთის ფედერაციამ რონალდოს სურვილი, დატოვოს ნაკრები, კატეგორიულად უარყო სპეციალური განცხადებით და დასძინა, რომ პირიქით, გუნდი შემართულია იმისთვის, რათაც მიმდინარე მუნდიალი პორტუგალიის ნაკრებისთვის ისტორიაში საუკეთესო იყოს.
რონალდუ გააკრიტიკა „მანჩესტერ იუნაიტედის“ ყოფილმა ფეხბურთელმა გარი ნევილმაც:
„როდესაც „მაჩესტერ იუნაიტედის“ მთავარმა მწვრთნელმა ტენ ჰაგმა ის სათადარიგო სკამზე დასვა, ამბობდნენ, რომ „იუნაიტედის“ მენეჯერს კრიშტიანუს ავტორიტეტის შემცირება სურდა. თუმცა, დღეს იგივეს აკეთებს პორტუგალიის ნაკრების მწვრთნელი ფერნანდუ სანტუში, რომელთანაც რვა წლის განმავლობაში შესანიშნავი ურთიერთობა გააჩნდა.
კრიშტიანუს სიმართლე უნდა უთხრან, მან უნდა გაიგოს, რომ რასაც კარიერის ბოლო ფაზაში აკეთებს, უადგილოა. არ გამიკვირდება, რომ მოედანზე გავიდეს და გამარჯვების გოლი გაიტანოს, მაგრამ მისი ტემპი მოედანზე, მისი მუდმივად ცუდი განწყობა არის ის, რაც უნდა შეწყდეს, ეს უკვე საკმარისია. ეს მას საერთოდ არ უხდება. დარწმუნებული ვართ, რომ ჯერ „იუვენტუსის“ მწვრთნელი შეცდა, შემდეგ „მანჩესტერის“ და ახლა პორტუგალიის ნაკრების? მისი მემკვიდრეობა უკვე დაწერილია – ის სამუდამოდ იქნება ყველა დროის ერთ–ერთი საუკეთესო ფეხბურთელი“.
გუშინ ცნობილი გახდა, რომ ესპანეთის ეროვნული გუნდის მთავარი მწვრთნელი ლუის ენრიკე თანამდებობიდან გადადგა. ესპანეთის ნაკრებს სათავეში 61 წლის ლუის დე ლა ფუენტე ჩაუდგა. ის 2013 წლიდან ესპანეთის ასაკობრივ და ოლიმპიურ ნაკრებებში მუშაობდა. მისი ხელმძღვანელობით ესპანელი ოლიმპიელები ტოკიოში ვერცხლის მედლის მფლობელები გახდნენ.
სამაგიეროდ, ინგლისის საფეხბურთო ასოციაციის ხელმძღვანელებს ეროვნული ნაკრების მთავარ მწვრთნელად გარეთ საუთგეიტის 2022 წლის მსოფლიო ჩემპიონატის შემდეგ დატოვებაც სურთ. ასოციაციაში მიაჩნიათ, რომ საუთგეიტმა გუნდი 2024 წლის ევროპის ჩემპიონატისთვისაც უნდა მოამზადოს. მართალია, მის კონტრაქტს ვადა 2024 წლის 31 დეკემბერს ეწურება, მაგრამ შესაძლოა, კატარის მუნდიალის შემდეგ მოინდომოს წასვლა და საკლუბო ფეხბურთში დაბრუნება.
გერმანიის საფეხბურთო კავშირში ნდობა გამოუცხადეს ჰანს–დიტერ ფლიკს და ეს უკანასკნელი გერმანიის ნაკრების მთავარ მწვრთნელად რჩება.
ფედერაციის პრეზიდენტმა ბერნდ ნოიენდორფმა დაადასტურა, რომ ფლიკს ენდობიან და ის ეროვნულ გუნდს ევროპის ჩემპიონატზეც უხელმძღვანელებს.
„ჩვენი მიზანია, რომ ევროპის ჩემპიონატი სპორტულ წარმატებად ვაქციოთ და დარწმუნებულნი ვართ, რომ ეს გერმანიისთვის დიდი შანსია. სრული ნდობა გვაქვს ჰანსი ფლიკის მიმართ, რომელიც ამ გამოწვევას გაუმკლავდება. ოპტიმისტურად ვართ განწყობილი, შეგვიძლია ბევრად მეტს მივაღწიოთ, ვიდრე კატარში ვაჩვენეთ, სადაც ხელიდან დიდი შანსი გავუშვით, მაგრამ ამ გაკვეთილს ვისწავლით“, – განაცხადა ბერნდ ნოიენდორფმა.
გუშინ, ინგლისის ნაკრების მცველმა, ჰარი მაგუაირმა, ჟურნალისტებს განუცხადა, რომ მისი გუნდი მუნდიალის მოსაგებადაა განწყობილი.
„რითი განსხვავდება ჩვენი დღევანდელი ნაკრები 2018 წლის გუნდისგან? ვფიქრობ, ერთადერთი განსხვავება ის არის, რომ ახლა მართლა გვჯერა, მუნდიალს მოვიგებთ.
2018-შიც ნაკრების წევრი ვიყავი. მაშინ ნახევარფინალამდე მივედით. მაშინ ბიჭები ბედნიერები იყვნენ. გვეამაყებოდა, რომ მსოფლიო ჩემპიონატის ნახევარფინალში ვითამაშეთ და როგორც არ უნდა დასრულებულიყო ის მატჩში, სამშობლოში მაინც გმირებად დავბრუნდებოდით. ახლა გვჯერა, რომ ტურნირის მოგება შგვიძლია. ეს კარგი ცვლილებაა მენტალიტეტში. ცხადია, ვიცით რა რთული იქნება ამის გაკეთება. არის კიდევ ხუთი თუ ექვსი გუნდი, რომლებსაც ასეთივე განწობა აქვთ. მაგრამ ჩვენი გამარჯვების გვჯერა,“ – ჰარი მაგუიარმა.
საფრანგეთის ნაკრებთან მატჩზე კომენტარი გააკეთა ინგლისის ნაკრების მეკარე ჯორდან პიკფორდმაც:
„საფრანგეთს ინგლისის უნდა ეშინოდეს. დიახ. ისინი მოქმედი ჩემპიონები არიან, მბაპე და ბევრი სხვა საუკეთესო ფეხბურთელი ჰყავთ, მაგრამ ეს მსოფლიოს ჩემპიონატია. ორივე გუნდისთვის რთული მატჩი იქნება. საფრანგეთის დამარცხების შანსი უნდა გამოვიყენოთ. ძლიერი სასტარტო შემადგენლობა და ღრმა სათადარიგო სკამი გვყავს“.
საფრანგეთთან მატჩის წინ რაჰიმ სტერლინგი ინგლისის ნაკრებში დაბრუნდება. გუშინ ამის შესახებ განცხადება ინგლისის ნაკრების ოფიციალურ გვერდზე გაკეთდა.
ლონდონის „ჩელსის“ ფეხბურთელმა მიმდინარე მუნდიალი სენეგალთან მერვედფინალური მატჩის წინ დატოვა. ამის მიზეზი კი სტერლინგის სახლის გაძარცვა იყო. მიუხედავად იმისა, რომ თავდამსხმელებმა რაჰიმის ოჯახის წევრებს არაფერი დაუშავეს ფეხბურთელმა საჭიროდ ჩათვალა სამშობლოში დაბრუნება და იქ იქამდე დარჩენა, სანამ არ დარწმუნდებოდა, რომ მისი ოჯახის წევრები 100 პროცენტით უსაფრთხოდ იყვნენ.
პოლიციამ სპეცოპერაცია, რომელშიც ვერტმფრენი და კინოლოგიური სამსახური იყვნენ ჩართულნი, სურეის საგრაფოში ჩაატარა და ახლა, ეჭვმიტანილები სამართალდამცავთა ხელში იმყოფებიან. ამის შემდეგ სტერლინგი დარწმუნდა, რომ მის ოჯახს საფრთხე აღარ ემუქრებოდა და კატარში ინგლისის ნაკრებთან დაბრუნება გადაწყვიტა.
დღეს, არგენტინის ნაკრები ნიდერლანდებს დაუპირისპირდება და დიდი ალბათობით, ტრავმის გამო როდრიგო დე პაული გამოაკლდებათ. ნახევარმცველს კუნთის პრობლემა აქვს და გუნდისგან განცალკევებით, ინდივიდუალურად ვარჯიშობს.
გუშინ, ახლო წარსულში ცნობილმა ნიდერლანდელმა ფეხბურთელმა მარკო ვან ბასტენმა ლიონელ მესის შესახებ ისაუბრა და აღნიშნა, რომ ის დაცვაში თავის გუნდს არ ეხმარება.
„მესი დაცვითი სამუშაოს შესრულებაზე უარს ამბობს. როდესაც არგენტინა ბურთს დაკარგავს, ჩვენ 11-10-ის წინააღმდეგ ვიქნებით. ვის შეუძლია მისი შეჩერება? ამის გაკეთება იურიენ ტიმბერს შეუძლია. მის წინააღმდეგ ისე უნდა ვიმოქმედოთ, როგორც იტალიის ნაკრებმა მარადონას შემთხვევაში. მჯერა, ტიმბერი ლიონელის შეჩერებას მოახერხებს,“ – განაცხადა ვან ბასტენმა.
გუშინ, „მილანის“ თავდამსხმელმა, ზლატან იბრაჰიმოვიჩმა, ჟურნალისტებს განუცხადა, რომ რახან შვედეთის ნაკრები მუნდიალზე ვერ მოხვდა, არგენტინის ეროვნულ გუნდს ქომაგობს და იმედოვნებს, რომ ეს გუნდი ტურნირს ლიონელ მესისთვის მოიგებს.
„დიდი იმედი მაქვს, რომ არგენტინა მოიგებს ტურნირს. ისინი ამას ლეო მესისთვის გააკეთებენ.
ბრაზილიასთან მსოფლიო ჩემპიონატის მეოთხედფინალური მატჩის წინ, ხორვატიის ნაკრების მცველმა, დეიან ლოვრენმა, ჟურნალისტებს საკუთარი აზრი გაუზიარა:
„ბრაზილიელები? დაე იცეკვონ, ამაში ცუდს ვერაფერს ვხედავ. მათში მუსიკა ცოცხლობს. თუმცა ყველაფერს აქვს ზომიერების ფარგლები. პორტუგალიური კარგად ვიცი, სადაც კი მითამაშია, ყველგან ბევრი ბრაზილიელი მეგობარი მყოლია. მატჩის წინ თითქმის ყველას ვესაუბრე, ვისთანაც მომიწევს დაპირისპირება. ვიმედოვნებ, კარგი ურთიერთობა გაგრძელდება თამაშის შემდეგაც.
ცხადია, ბრაზილია ფავორიტია. მათ ორი გუნდის სამყოფი ძლიერი ფეხბურთელები ჰყავთ. თუმცა, შევეცდებით ჩვენი თამაში ვაჩვენოთ.“
ფიფას პრეზიდენტმა ჯანი ინფანტინომ მსოფლიოს ჩემპიონატზე ისაუბრა. როგორც მან აღნიშნა, ძალიან კმაყოფილია და ისტორიაში საუკეთესო ჯგუფური ეტაპი მიმდინარე მუნდიალზე ჩატარდა.
„ყველა მატჩი ვნახე: მარტივად და ნათლად რომ ვთქვათ, ეს იყო მსოფლიოს ჩემპიონატის ისტორიაში საუკეთესო ჯგუფური ეტაპი. შესანიშნავი ხარისხის მატჩები, ლამაზი სტადიონები, რაც უკვე ვიცოდით. გულშემატკივრებიც საოცარია, საშუალოდ 51 000-ზე მეტი ქომაგი ესწრება მატჩებს და ტელევიზიითაც სარეკორდო მაყურებელი გვყავს. ორ მილიარდზე მეტი მაყურებელი გვყავდა, რაც მართლაც წარმოუდგენელია. დოჰას ქუჩებში ორი მილიონი ადამიანია და ყველა თავიანთ გუნდებს გულშემატკივრობენ.
ფანტასტიკური ატმოსფერო, შესანიშნავი გოლები, წარმოუდგენელი ემოციები, სიურპრიზები, პატარა გუნდები დიდ გუნდებს ამარცხებენ. სინამდვილეში აღარ არსებობს პატარა და დიდი გუნდები, დონე ძალიან გათანაბრდა. ეს აჩვენებს, რომ ფეხბურთი ნამდვილად გლობალური ხდება.
იმედი ვიქონიოთ, რომ მსოფლიოს ჩემპიონატი ისე დასრულდება, როგორც დაიწყო – ფანტასტიკურად. დარწმუნებული ვარ, მთელი მსოფლიოს მასშტაბით 5 მილიარდ მაყურებელს მივაღწევთ. ბილეთები გაყიდულია, პრაქტიკულად ყველა თამაშზე სტადიონი სავსეა. გვინდა, რომ ხალხს ბედნიერება მივანიჭოთ, სწორედ ეს არის ფეხბურთი და მსოფლიოს ჩემპიონატი. მოედანი სავსეა ტალანტებით და ვარსკვლავებით, რომლის ყურება ყველას სურს“, – განაცხადა ჯანი ინფანტინომ.
ავტორი
