ჩვენ ხშირად მოგვისმენია განცხადებები მაღალი ტრიბუნიდან, რომ ქვეყანაში კორუფცია დამარცხებულია. როდესაც მაღალი რანგის სახელმწიფო მოხელე ასეთ განცხადებას აკეთებს, ის ან არ ფლობს სიტუაციას ან ყველაფერი იცის, მაგრამ არ არის დაინტერესებული იმ ბარიერების მოხსნით, რომელთა გამოც, ქვეყანა ათეული წლებია ნორმალური განვითარების გზას ვერ პოულობს.
არცოდნა კია არ ცოდვა, მაგრამ როდესაც იცი და გინდა, სხვას მოაჩვენო, თითქოს არ იცი, ეს უკვე ცოდვაზე მეტია. კომუნისტებმაც თითქოს არ იცოდნენ, კორუფცია რომ საყოველთაო მოვლენა გახდა, მაგრამ ბოლოს იძულებული გახდნენ, დაეჯერებინათ და ეს საბედისწერო დაავადება მათი ძალაუფლების დაცემის მთავარი მიზეზი გახდა. მართალია, მაშინ პარტიულ ხელმძღვანელობას მისთვის არასასურველი ყველა ინფორმაციის დაბლოკვა შეეძლო, მაგრამ კორუფციის წინააღმდეგ მებრძოლი სტრუქტურები დამოუკიდებლებიც რომ ყოფილიყვნენ, ისინი უარს იტყოდნენ ქრთამის აღებაზე?
ხელისუფლებაში დღესაც ის ხალხი ან მათი მემკვიდრეები არიან, რომლებიც კომუნისტების დროს ქვეყნის ბედს განაგებდნენ, მათ კი კორუფციის გარეშე არსებობა ვერ წარმოუდგენიათ. მიწერები, ყალბი სტატისტიკური მონაცემები, უხარისხოდ შესრულებული სამუშაოები, სახელმწიფო სტრუქტურებში სახელგატეხილი კადრები კორუფციის შედეგი არ არის? ახლანდელმა თაობამ კომუნისტი მოხელეებისგან მემკვიდრეობით მიიღო საკუთარი თავის დაზღვევის “საიმედო” სისტემა, ერთი მეორის მიმართ შეგროვებული კომპრომატების სახით, როგორც კოლექტიური შეთქმულება საკუთარი სამშობლოს წინააღმდეგ. სწორედ შანტაჟით აღწევს კორუმპირებულთა დიდი ნაწილი პასუხისმგებლობის თავიდან აცილებას და პრივილეგიების შენარჩუნებას.
დღეს საქართველოში კორუფციის დონე იმ ზღვარს უახლოვდება, კომუნისტების დროს რომ იყო. თუმცა, ამ საკითხზე მაღალ ეშელონებში დუმან, მაგრამ შენ, ჩვენი ქვეყნის რიგითო მოქალაქევ, რატომ გაჩუმებულხარ?! რა საჭიროა, შენი ყველა პრობლემა რომ ჩამოვთვალო, მაგრამ მაინტერესებს, რაც დღემდე დაგიკარგავს, იმაზე მეტი დაგრჩა კიდევ რამე დასაკარგი? შენ ხომ დუმილით მწვანე შუქს უნათებ ყოველგვარ უსამართლობას? შენ მიმართ დიდი პატივისცემის მიუხედავად, უნდა გითხრა საკმაოდ მწარე სიმართლე _ შენ ადვილად ურიგდები საზოგადოებაში არსებულ უსამართლობას, ურიგდები მანამდე, სანამ იგი მახვილშემართული არ მოგადგება ასაჩეხად. რაგინდ გასაკვირიც უნდა იყოს, შენც ზედა ფენების თვისებები გაქვს, ხარ ზედმეტად პატივმოყვარე და ამპარტავანი. გაქვს თუ არა საჭირო რესურსი, შენც ცდილობ მაღალ ეშელონებში მოხვდე, რომ იბატონო. ბატონობა კი მონობასაც ნიშნავს. შენ მტერიც იცი, მოყვარეც იცი, კეთილი გულიც გაქვს, მაგრამ თუ წინააღმდეგობრივი ბუნება გაქვს, ვის დავაბრალოთ? როდის გქონდა მტრობისა და ბოროტებისგან თავისუფალი ადამიანური გარემო? ვინც ბატონობას არის მიჩვეული, იგი ასეთ გარემოს ვერ შექმნის. უსამართლობას მხოლოდ შენ უნდა ებრძოლო დაჟინებით, რომ ეს უსამართლობა და მისი გამომწვევი მიზეზები დაამარცხო.
სიმონ ჯაში
