რამდენიმე დღეში რუსეთიდან საქართველოში საბორნე გადასასვლელი ამოქმედდება, რომელიც სომხეთში ტვირთის გადაზიდვისთვის იქნება ხელმისაწვდომი, განაცხადა სომხეთის ეკონომიკის მინისტრმა ვაჰან კერობიანმა. ინფორმაციას “რადიო თავისუფლება” ავრცელებს.
„ახლა ვაკეთებთ საბოლოო სამუშაოებს, განრიგი უახლოეს მომავალში გამოქვეყნდება“, – განაცხადა მან.
თუმცა, ბოლო თვეების განმავლობაში, მინისტრმა კერობიანმა რამდენჯერმე მიუთითა სავარაუდო თარიღები, თუ როდის გახდება სერვისი, მაგრამ ბორნები კვლავ არ ფუნქციონირებს. 5 მაისს მთავრობის სხდომაზე მინისტრმა 15 ივნისი გამოაცხადა, როგორც ბოლო ვადა სომხეთისთვის, რათა დაიწყოს რეგულარული ბორანი საქართველოს პორტიდან რუსეთის პორტ კავკაზამდე.
კერობიანმა აღნიშნა, რომ უკრაინაში ომის გამო ახალი გართულებები წარმოიშვა.
„მოდით, ერთი-ორი დღე დაველოდოთ, რამდენიმე დღე და დარწმუნებული ვარ, რომ შედეგი იქნება… დიახ, ეს არ არის იოლი კითხვა, მით უმეტეს, რომ ის მოიცავს ასეთ მძიმე გეოპოლიტიკურ ცვლილებებს და ზეწოლას, მაგრამ მაინც იმედი გვაქვს, რომ ჩვენი მუშაობა ძალიან მალე გამოიღებს შედეგს“, – დასძინა მინისტრმა.
რუსეთი სომხეთის უდიდესი სავაჭრო პარტნიორი და მთავარი საექსპორტო ბაზარია. 2022 წლის პირველ ნახევარში სომხეთ-რუსეთის ორმხრივი ვაჭრობა შეადგენდა სომხეთის მთლიანი საგარეო ვაჭრობის თითქმის ⅓-ს. ტვირთები სომხეთიდან რუსეთში და უკან გადის ზემო ლარსის საგუშაგოზე რუსეთ-საქართველოს საზღვარზე. ეს არის ერთადერთი სახმელეთო გზა, რომელიც აკავშირებს სომხეთს რუსეთთან. ზემო ლარსის საგუშაგოზე, ძალზე შეზღუდული ტევადობით, საცობები თითქმის ყოველთვის ხდება, არა მხოლოდ გზის სივიწროვის გამო, არამედ ხანდახან უამინდობის გამო, დროდადრო აქ დაწყობილი სატვირთო მანქანების რიგი რამდენიმე კილომეტრს აღწევს.
საბორნე გადასასვლელი არის ალტერნატიული კავშირი სომხეთსა და რუსეთს შორის.
