უკრაინელი ოფიციალური პირების ინფორმაციით, ოკუპანმა რუსეთმა ლვოვზე სარაკეტო იერიში მიიტანა, რომლის შედეგად სულ მცირე 4 ადამიანი გარდაიცვალა, 32-მდე კი დაშავდა.
თავდასხმის შედეგად დაზიანდა კრიტიკული ინფრასტრუქტურული ობიექტი და 30 – მდე საცხოვრებელი კორპუსი. ასევე განადგურდა ორმოცდაათამდე მანქანა. ნანგრევების გაწმენდა ჯერ კიდევ მიმდინარეობს, შესაძლოა მის ქვეშ ისევ ხალხი იყოს.
ადგილზე სამძებრო-სამაშველო სამუშაოები გრძელდება.
ლვოვის რეგიონალური სახელმწიფო ადმინისტრაციის უფროსი მაქსიმ კოზიცკი ამბობს:
“ამჟამად ჩვენ ვასუფთავებთ ნანგრევებს. ჩართულია ყველა ძალა. იმედი გვაქვს ცოცხალ ადამიანებს ვიპოვით. პირდაპირი დარტყმა იმ სახლზე, სადაც ხალხი ცხოვრობდა. 4 გარდაცვლილი, 32 დაშავებული, 13 საავადმყოფოში საშუალო სიმძიმის. ჩვენ უფრო მეტ ადამიანს ვეძებთ, რადგან ვფიქრობთ, რომ ნანგრევების ქვეშ შეიძლება ხალხი იყოს”.
კოზიცკიმ განმარტა, რომ ოკუპანტებმა მთავარი დარტყმა მიაყენეს საცხოვრებელ მაღალსართულიან კორპუსს – ეს სახლი ფაქტობრივად დაინგრა და მის მახლობლად 6 სახლი კრიტიკულად დაზიანდა.
სამხარეო ადმინისტრაციის ხელმძღვანელის თქმით, დაზიანებულია 30 სახლი, 50-მდე მანქანა, ჩამსხვრეულია ათეულობით მინა, ორი სასწავლო დაწესებულების 11 საერთო საცხოვრებელი, სადაც დევნილები იყვნენ, №1 ბავშვთა სახლი და სანატორიუმის სკოლა.
საგანგებო სიტუაციების სახელმწიფო სამსახურის უფროსმა სერგეი კრუკმა დააზუსტა, რომ მე-3 და მე-4 სართულები ოთხსართულიანი საცხოვრებელი კორპუსის ორ სადარბაზოში განადგურდა. ამ დროისთვის 7 ადამიანის გადარჩენა მოხერხდა, 64 კი ევაკუირებულია.
სამხარეო ადმინისტრაციის უფროსი ვარაუდობს, რომ ნანგრევები დღის ბოლომდე გაიწმინდება.
საგანგებო სიტუაციების სახელმწიფო სამსახურში განმარტავენ, რომ დილის 8 საათისთვის დანგრეული სახლის პირველ, მე-3 და მე-4 სადარბაზოებში სამაშველო-სამძებრო სამუშაოები მიმდინარეობდა.
მოგვიანებით კოზიცკიმ Telegram-ში დაამატა, რომ რაკეტის ფრაგმენტი ლვოვის რაიონის ერთ-ერთ სოფელში სახალხო სახლის შენობასთან დაეცა.
რაკეტის ფრაგმენტების ჩამოვარდნის შედეგად, ზოლოჩივის რაიონის ერთ-ერთ სოფელში კერძო საყოფაცხოვრებო სახლიც დაინგრა. წინასწარი ინფორმაციით, მსხვერპლი არ არის.
ავტორი
