გუშინ ცნობილი გახდა რომ საქართველოს ნაკრების 29 წლის მცველი საბა კვირკველია ხარკოვის „მეტალისტმა“ თავისუფალი აგენტის სტატუსით აიყვანა. ჯერჯერობით უცნობია რამდენწლიანი კონტრაქტი გააფორმა კვირკველიამ კლუბთან. საბა „მეტალისტში“ 6-ნომრიანი მაისურით ითამაშებს. კლუბი უკრაინის პრემიერლიგაში 10 მატჩიდან 13 ქულით მე-8 პოზიციაზეა.
ქართველი მცველი მიმდინარე წლის ივლისიდან უკლუბოდ იყო, მას შემდეგ, რაც მოსკოვის „ლოკომოტივთან“ ოფიციალური კონტრაქტი დაუსრულდა. საბას რუსეთში „ზენიტის“ სარეზერვო გუნდში, „რუბინში“, „ნეფტეხიმიკში“, „ლოკომოტივსა“ და „როტორში“ უთამაშია. საქართველოს ეროვნულ ნაკრებში კვირკველიამ 42 მატჩი ჩაატარა. „ტრანსფერმარკტი“ მას 2.5 მილიონ ევროდ აფასებს, თუმცა ორი წლის წინ, ის ქართველ ფეხბურთელებში ყველაზე ძვირი იყო და 10 მილიონი ევრო ღირდა.
გუშინ ცნობილი გახდა აზერბაიჯანის დედაქალაქ ბაქოში ჩასატარებელ გრანდ სლემზე საქართველოს ძიუდოისტთა ნაკრების შემადგენლობა. 5-7 ნოემბერს დაგეგმილ ტურნირზე 11 ქართველი ძიუდოისტი იასპარეზებს.
სასიხარულოა რომ აზერბაიჯანულ ტატამზე საქართველოს ნაკრების ერთ-ერთი ლიდერი ლაშა ბექაურიც (90 კგ.) გავა, რომლისთვისაც ეს ოლიმპიური ჩემპიონის რანგში პირველი შეჯიბრება იქნება.
საქართველოს შემადგენლობა ბაქოს გრანდ სლემზე:
ლუხუმ ჩხვიმიანი (60 კგ.), ჯაბა პაპინაშვილი (60 კგ.), ვაჟა მარგველაშვილი (66 კგ.), ლაშა შავდათუაშვილი (73 კგ.), გიორგი შერაზადიშვილი (81 კგ.), თორნიკე ფოლადაშვილი (81 კგ.), ლაშა ბექაური (90 კგ.), ბექა ღვინიაშვილი (90 კგ.), გურამ თუშიშვილი (+100 კგ.), მარიამ ჯანაშვილი (52 კგ.), მზია ბებოშვილი (52 კგ.).
მოსკოვის „ცსკა“-ს ოფიციალური ვებგვერდის ცნობით, თორნიკე შენგელიას „ზენიტთან“ მატჩის შემდეგ მხარი ასტკივდა. ევროლიგაზე „ცრვენა ზვეზდასთან“ გუშინ ჩატარებული მატჩის გარდა, თორნიკე კიდევ რამდენიმე შეხვედრას გამოტოვებს.
„თორნიკემ „ზენიტთან“ მატჩის შემდეგ მხრის ტრავმა მიიღო, რის გამოც ის რამდენიმე დაპირისპირებას გამოტოვებს. ქართველი ამჟამად კლინიკაშია და ექიმები მას გამოკვლევებს უტარებენ“, – დაწერა გუშინ „ცსკა“-ს ვებგვერდმა.
საქართველოს ეროვნული გუნდისა და ბელგიური „სერენის“ თავდამსხმელი გიორგი მიქაუტაძე, რომელმაც ტრავმა საქართველოს ნაკრების მატჩში მიიღო ამჟამად მწყობრშია და ბელგიურ კლუბში მომავალი მატჩისთვის ემზადება. ამის შესახებ ინფორმაცია გუშინ „სერენის“ ვებგვერდმა გაავრცელა.
კილიან მბაპე ბოლოსა და ბოლოს საკუთარი მომავლის შესახებ საბოლოოდ ჩამოყალიბდა. ესპანური გამოცემა „AS“-ის მტკიცებით, ფრანგი თავდამსხმელი „პსჟ“-სთან კონტრაქტს არ გაახანგრძლივებს.
პარიზული გუნდი თავისი ერთ-ერთი ლიდერის გაშვებას არ აპირებს და სურს მბაპეს გაუმჯობესებული კონტრაქტი შესთავაზოს, მაგრამ ეს ვერაფერს შეცვლის. კილიანის გადაწყვეტილება ხელფასზე არაა დამოკიდებული. მას უბრალოდ მადრიდის „რეალში“ გადასვლა სურს.
„მბაპე „პსჟ“-სთან კონტრაქტს არ გაახანგრძლივებს. მან დიდი ხანია არჩევანი გააკეთა. სურს რომ ახალ წარმატებებს მადრიდში მიაღწიოს და ამას აუცილებლად გააკეთებს. კილიანი მომავალი წლის 30 ივნისს ელოდება და მისი ოცნება სწორედ ამ დღეს ასრულდება“, – დაწერა გამოცემამ „AS“.
„მილანის“ დირექტორმა, პაოლო მალდინიმ კი ფეხბურთში მსოფლიო ჩემპიონატის ყოველ ორ წელიწადში ჩატარებასთან დაკავშირებით საკუთარი პოზიცია დააფიქსირა. მალდინი გამოცემა „ANSA“-ს ესაუბრა და განაცხადა, რომ ამ ცვლილებების სასტიკი წინააღმდეგია.
„არ ვფიქრობ, რომ მსოფლიო ჩემპიონატის ყოველ ორ წელიწადში ერთხელ ჩატარება კარგი იდეაა. ეს მსოფლიოში ყველაზე საინტერესო და დაძაბულ შეჯიბრებას მნიშვნელობას დაუკარგავს და გაანადგურებს ტრადიციას, რომელიც თითქმის ერთი საუკუნეა არსებობს. იმედი მაქვს, რომ ფიფა ამ პროექტზე მუშაობას შეწყვეტს. ცვლილებების გატარებას ფეხბურთელების ჯანმრთელობაზე ნეგატიური ფიზიკური და მენტალური ეფექტი ექნება და ნაციონალურ ჩემპიონატებსაც პრობლემებს შეუქმნის“.
მოულოდნელად გამდიდრებული ინგლისური „ნიუკასლის“ მთავარი მწვრთნელის თანამდებობა კიდევ ერთ ცნობილ ფეხბურთის სპეციალისტს დაუკავშირეს.
ბრიტანულ პრესაში გავრცელებული ინფორმაციის თანახმად, „ნიუკასლის“ ხელმძღვანელობა მთავარი მწვრთნელის პოსტზე ზინედინ ზიდანს მოიაზრებს. ისინი უკვე დაეკონტაქტნენ ფრანგ სპეციალისტს და მისგან პასუხს ელიან.
სავარაუდოა, რომ ზიდანი ამ შემოთავაზებას უარყოფს. გავრცელებული ინფორმაციით, მას ორიენტირი ორ შესაძლო ვარიანტზე აქვს აღებული – საფრანგეთის ნაკრების ან „იუვენტუსის“ გაწვრთნაზე.
ინგლისური კლუბის ახალი მფლობელი საუდის არაბეთის საინვესტიციო ფონდი გახდა, რომლის ბიუჯეტიც 320 მილიარდ ფუნტ სტერლინგს უტოლდება. ახალ მფლობელებს სურთ, რომ „ნიუკასლიდან“ მეგა პროექტი შექმნან, რომელიც დიდი ტურნირების (პრემიერლიგა, ჩემპიონთა ლიგა) მოგებისთვის იბრძოლებს და ამისთვის მზად არიან დიდი თანხები დახარჯონ.
საინტერესოა, რომ „ნიუკასლის“ მფლობელების შეთავაზებაზე უარი უკვე განაცხადეს ბრენდან როჯერსმა და ანტონიო კონტემ და თუკი „ნიუკასლის“ ჩაბარებას არც ზინედინ ზიდანი დათანხმდა, ამ გუნდს მომდევნო კანდიდატურაც შერჩეული ჰყავს: ლონდონის „ჩელსის“ ყოფილი თავკაცი ფრენკ ლამპარდი.
[sexy_author_bio]
