“სად არის და აქ არის ეკონომიკური წინსვლა”

29 ოქტომბერს ოზურგეთის მუნიციპალიტეტის საკრებულოს მორიგი სხდომა შედგა _ ეს პირველი სხდომა იყო 26 ოქტომბრის საპარლამენტო არჩევნების შემდეგ.

სხდომაზე არ გამოცხადებულან ოპოზიციური პარტიების წარმომადგენლები და მათი ადგილები ცარიელი იყო, მხოლოდ წარწერები ჩანდა.

_ ოზურგეთის მუნიციპალიტეტში, 26 ოქტომბრის არჩევნებზე 23 ათასზე მეტმა ადამიანმა დაუჭირა მხარი “ქართულ ოცნებას”. ოზურგეთის ხვალინდელ დღეს. დიდი მადლობა ყველას… ძალიან მალე მოვა თვითმმართველობის არჩევნებიც და უნდა გავაგრძელოთ ოცნება, _ თქვა საკრებულოს თავმჯდომარემ დავით დარჩიამ და დღის წესრიგი გააცნო სხდომის მონაწილეებს.

პირველი საკითხის ირგვლივ საუბრის დაწყებამდე, მუნიციპალიტეტის მერის პირველმა მოადგილემ, გიორგი ღურჯუმელიძემ ისაუბრა არჩევნების შედეგებზე. მან თქვა, რომ ოპოზიციამ ხუთ პროცენტსაც ვერ გადააბიჯა:

_ უპრეცედენტო არჩევნები ჩატარდა. აბსოლუტურად გამჭვირვალე. ოზურგეთის მუნიციპალიტეტში 23 ათასზე მეტმა ადამიანმა დაუჭირა მხარი მმართველ პარტიას. (დარბაზში მყოფმა საკრებულოს წევრებმა ტაში დაუკრეს. ავტ.) ეს არის გუნდის წარმატება. ხალხმა ხმა მისცა ოზურგეთის ხვალინდელ დღეს. რა უსუსურებიც იყვნენ, დვაბზუს საარჩევნო უბანზე გამოჩნდა. კომისიის წევრმა დიდი ხნის უნახავი მეგობარი გადაკოცნა. ამისთვის მას საჩივარი დაუწერეს. სხვა დარღვევა ვერ ნახეს. ახლაც ხედავთ, ოპოზიციის ადგილები ცარიელია. ხალხმა მათ გამოუტანა პოლიტიკური განაჩენი….დიდი მადლობა ყველას, ვინც მხარი დაგვიჭირა, _ თქვა მან.

გიორგი ღურჯუმელიძემ ისაუბრა დღის წესრიგის პირველ საკითხზე: “მუნიციპალიტეტის სოციალური მიზნის მქონე პროექტების თანადაფინანსების პროგრამის გახორციელების შესახებ”:

_ ახლა განსახილველი საკითხი, რომელიც სოციალური პროგრამების თანადაფინანსების წესს ეხებოდა. სამოქალაქო სექტორიდან, მინიმუმ, სამ ორგანიზაციას უნდა მიეღო მონაწილეობა. თანხმობა ვერ მივიღეთ. ამიტომ წელს ვერ მივიღებთ ამ პროგრამას. აქ შედის კორექტირება. თუ ვინმეს კითხვები აქვს, გისმენთ, _ განაცხადა ღურჯუმელიძემ.

საკრებულოს თავმჯდომარის მოადგილემ, ლავრენტი ბიგვავამ აღნიშნა, რომ მერიის შემოთავაზებული პროექტი იმსახურებს მოწონებას.

მხარდაჭერა საკითხისადმი გამოხატა დავით დარჩიამ, რის შემდეგაც დადგენილების პროექტს მხარდაჭერა გამოუცხადეს.

მეორე საკითხის ირგვლივ, რომელიც ინფრასტრუქტურულ პროექტებს ეხებოდა, კვლავ გიორგი ღურჯუმელიძემ ისაუბრა. მან თქვა, რომ ოზურგეთის მუნიციპალიტეტში გასახორციელებელია 9 467,575,87 ლარის ღირებულების ექვსი პროექტი, რაც ტენდერის წესების დაცვით მოხდება. ესენია:

ოზურგეთში, შემოქმედელის ქუჩის პირველი შესახვევის რეაბილიტაცია; 400 მ. სიგრძის, ღირებულება 327,268 ლარი. ასევე შემოქმედელის ქუჩის მეორე შესახვევის რეაბილიტაცია; 250 მეტრი სიგრძის, ღირებულება 224, 539 ლარი.

სოფელ შემოქმედში (ფატარის უბანი) 26-ე და მე-13 ქუჩების შიდა სასოფლო გზების რეაბილიტაცია; 1837 მ სიგრძის, ღირებულება1 მილიონ 256,739 ლარი.

სოფელ ძიმითში შიდა სასოფლო გზების რეაბილიტაცია; 2628 მ სიგრძის, ღირებულება 2 მილიონ 204,736 ლარი.

სოფელ ნაგომრის და სოფელ ბახვის (მშვიდობაური) დამაკავშირებელი გზის რეაბილიტაცია; 6552 მ სიგრძის, ღირებულება 4 მილიონ 396, 011 ლარი.

სოფელ ნაგომარში, შუა ისნარისა და გამგეობის შენობის უკან მდებარე გზების რეაბილიტაცია. 1169 მ სიგრძის მონაკვეთი. ღირებულება 1 მილიონ, 058, 280 ლარი.

_ მივესალმები ამ მნიშვნელოვან პროექტებს. თუ ვინმეს ჰგონია, რომ ეს არ არის ეკონომიკური ზრდა, ცდება. რომ გაიძახიან, სად არის ეკონომიკური ზრდაო, სად არის და აი, აგერ არის. ზოგს ჰგონია, ინფრასტრუქტურული პროექტების გახორციელება არ არის ეკონომიკური ზრდა. თუმცა, სწორედ ეს პირდაპირ კავშირშია ეკონომიკურ ზრდასთან, _ თქვა ლავრენტი ბიგვავამ და ხელით საჩვენებლად ასწია ქაღალდების შეკვრა, სადაც დღის წესრიგით გათვალისწინებული საკითხები იყო ჩამოთვლილი.

საკრებულოს გადაწყვეტილებით, საბოლოოდ, დამტკიცდა შემდეგი დადგენილების პროექტი: “მუნიციპალიტეტის სოციალური მიზნის მქონე პროექტების თანადაფინანსების პროგრამის გახორციელების შესახებ”.

ხოლო საჯარო ადმინისტრაციული წარმოება დაიწყო საკითხის ირგვლივ: “მუნიციპალიტეტის მონაწილეობითი ბიუჯეტირების პროგრამის შედგენის წესის დამტკიცების თაობაზე”, ნორმატიული აქტის მისაღებად.

საკრებულომ ასევე, რეგიონებში გასახორციელებელი პროექტების ფონდიდან, ოზურგეთის მუნიციპალიტეტში გასახორციელებელი ინფრასტრუქტურული პროექტების მოწონების თაობაზე, განკარგულება საბოლოოდ დაამტკიცა და როგორც ზემოთ ვთქვით, ეს პროექტებია:

ოზურგეთში შემოქმედელის ქუჩის I შესახვევის რეაბილიტაცია;

ოზურგეთში შემოქმედელის ქუჩის II შესახვევის რეაბილიტაცია;

სოფელ შემოქმედში (ფატარის უბანი) 26-ე და მე-13 ქუჩების შიდა სასოფლო გზების რეაბილიტაცია;

სოფელ ძიმითში შიდა სასოფლო გზების რეაბილიტაცია;

სოფელ ნაგომარსა და სოფელ ბახვის (მშვიდობაური) დამაკავშირებელი გზის რეაბილიტაცია;

სოფელ ნაგომარში, შუაისნარისა და გამგეობის შენობის უკან მდებარე გზების რეაბილიტაცია.

როგორც ვთქვით. სხდომას არ ესწრებოდნენ, ბოიკოტის ნიშნად, ოპოზიციური პარტიების წარმომადგენლები.

“ნაციონალური მოძრაობის” ოზურგეთის რაიონული ორგანიზაციის თავმჯდომარის, დავით მჟავანაძის თქმით, ისინი ისევ ბოიკოტის რეჟიმში არიან.

“მას შემდეგ, რაც პარლამენტმა “რუსული კანონი” მიიღო, პარტიის წევრები ბოიკოტის რეჟიმში ვართ და არც ახლა ვესწრებით სხდომას. ოზურგეთის საოლქო საარჩევნო კომისიაში იქნება საჩივრების განხილვა და იქ ვიქნები”, _ გვითხრა დავით მჟავანაძემ.