გარემოს ეროვნული სააგენტო ატმოსფერულ ჰაერში ტყვიის შემცველობის განსაზღვრას საბავშვო ბაღებისა და სკოლების მიმდებარე ტერიტორიებზე ისევ აგრძელებს.
თბილისში, ბათუმსა და ქუთაისში ატმოსფერულ ჰაერში განსაზღვრული ნივთიერებების შემცველობები 7-12 ნოემბერს, ნორმის ფარგლებში დაფიქსირდა, გარდა აზოტის დიოქსიდის (NO2) და მყარი ნაწილაკების (PM10) კონცენტრაციებისა. ამის შესახებ ინფორმაციას საქართველოს გარემოს დაცვისა და სოფლის მეურნეობის სამინისტროს სსიპ გარემოს ეროვნული სააგენტო ავრცელებს.
„7 და 12 ნოემბერს საქართველოს მთელ ტერიტორიაზე მყარი ნაწილაკების PM10-ის კონცენტრაციების ნორმაზე გადაჭარბება არ დაფიქსირებულა. 6 ნოემბერს მყარი ნაწილაკების PM10-ის კონცენტრაციების ნორმაზე გადაჭარბება დაფიქსირდა თბილისში, ვარკეთილში – 1.1-ჯერ, ხოლო ყაზბეგის გამზირსა და ვაშლიჯვარში უმნიშვნელოდ. 8 ნოემბერს მყარი ნაწილაკების PM10-ის კონცენტრაციების ნორმაზე გადაჭარბება დაფიქსირდა თბილისში, ვარკეთელში – 1.2-ჯერ, ხოლო ბათუმში, აბუსერიძის ქუჩაზე განთავსებულ ავტომატურ სადგურზე უმნიშვნელოდ. 9 ნოემბერს მყარი ნაწილაკების PM10-ის კონცენტრაციების ნორმაზე გადაჭარბება დაფიქსირდა თბილისში, წერეთლის გამზირზე – 1.2-ჯერ, ვარკეთილში – 1.1-ჯერ, ვაშლიჯვარსა და ბათუმში აბუსერიძის ქუჩაზე – უმნიშვნელოდ. 10 ნოემბერს მყარი ნაწილაკების PM10-ის კონცენტრაციების ნორმაზე გადაჭარბება დაფიქსირდა თბილისში, წერეთლის გამზირსა და ვარკეთილში – 1.3-ჯერ, ვაშლიჯვარში – 1.2-ჯერ, ხოლო ქუთაისსა და ბათუმში აბუსერიძის ქუჩაზე განთავსებულ ავტომატურ სადგურებზე – 1.1-ჯერ. 11 ნოემბერს მყარი ნაწილაკების PM10-ის კონცენტრაციების ნორმაზე გადაჭარბება დაფიქსირდა თბილისში, წერეთლის გამზირზე – 1.3-ჯერ, ვარკეთილში – 1.1-ჯერ, ვაშლიჯვარში – 1.4-ჯერ, ხოლო ბათუმში, აბუსერიძის ქუჩაზე განთავსებულ ავტომატურ სადგურზე – 1.2-ჯერ.
მყარი ნაწილაკების PM10-ის კონცენტრაციების საშუალო წლიურ ნორმაზე გადაჭარბება დაფიქსირდა თბილისში, წერეთლის გამზირზე 1.3-ჯერ და ყაზბეგის გამზირზე 1.1-ჯერ, ხოლო ბათუმსა და ქუთაისში 1.1-ჯერ. ამ დღეების განმავლობაში ასევე ფიქსირდებოდა აზოტის დიოქსიდის კონცენტრაციების საშუალოწლიურ ნორმაზე გადაჭარბება თბილისში, წერეთლის გამზირზე 1.4-ჯერ და ბათუმში აბუსერიძის ქუჩაზე 1.4-ჯერ, რაც არასრული წვის შედეგად არის გამოწვეული.
ქალაქ თბილისში ატმოსფერულ ჰაერში ტყვიის შემცველობის დასადგენად გასულ კვირას ჰაერის სინჯები აღებული იქნა ქალაქის ოთხ ლოკაციაზე: თემქის მე-11 მ/რ-ში – N48 საჯარო სკოლა, თემქის მე-10 ბ კვარტალში N138 საჯარო სკოლა, იამანიძის ქ. №7-ში – №116 საჯარო სკოლა, გლდანის IV მ/რ-ში – ბაგა-ბაღი N216. ჰაერის სინჯები გაიგზავნა გარემოს ეროვნული სააგენტოს ლაბორატორიაში. ლაბორატორიული კვლევის შედეგად დადგინდა, რომ თბილისში ოთხივე ლოკაციაზე აღებულ სინჯებში ტყვიის შემცველობა არ აღემატებოდა დასაშვებ ნორმას“, _ნათქვამია გარემოს ეროვნული სააგენტოს მიერ გავრცელებულ ინფორმაციაში.
