გუშინ, იტალიურმა გამოცემამ „Corriere dello Sport“ საინტერესო ინფორმაცია გაავრცელა. აღმოჩნდა რომ „ნაპოლის“ პრეზიდენტი აურელიო დე ლაურენტისი „მილანის“ მთავარ მწვრთნელს, სტეფანო პიოლის გაესაუბრა და ნეაპოლური კლუბის ჩაბარება შესთავაზა.
ცნობილი გახდა, რომ პიოლიმ კინოპროდიუსერს ყურადღებით მოუსმინა, თუმცა განუცხადა, რომ ამ ეტაპზე „მილანის“ დატოვებას არ გეგმავს.
იტალიური გამოცემების ცნობით, ამ ეტაპზე, „ნაპოლის“ ჩაბარებასთან ყველაზე ახლოს „სალერნიტანას“ მწვრთნელი პაულო სოუზაა.
საქართველოს ნაკრებისა და მეცის თავდამსხმელის, გიორგი მიქაუტაძის მომავალთან დაკავშირებით კი ახალი ინფორმაციები ვრცელდება.
ცნობილი გახდა, რომ მიქაუტაძე „მონპელიეს“ შესთავაზეს, მაგრამ ფასის გამო კლუბის პრეზიდენტს ლორენ ნიკოლინს უარის თქმა მოუწია.
„მონპელიეს“, დიდი ალბათობით, ზაფხულში კლუბის წამყვანი ფეხბურთელი ელიე ვაი დატოვებს, რომელსაც ფრანგული „ლიგა 1“-ის უკვე გასულ სეზონში, 33 შეხვედრაში 19 გოლი ჰქონდა გატანილი. ფრანგული გუნდი მის სავარაუდო შემცვლელებს ეძებს, ერთ-ერთ ვარიანტად კი სწორედ გიორგი მიქაუტაძე გაჟღერდა.
„მიქაუტაძე, მაჯა და კრასო? ამ სამი ფეხბურთელიდან 2 შემოგვთავაზეს. ერთ-ერთი მიქაუტაძე იყო, მაგრამ სატრანსფერო ფასის გამო, ჩვენთვის მისი აყვანა შეუძლებელია. რაც შეეხება დანარჩენ ორს, მე აქ იმისთვის არ ვარ, რომ ფეხბურთელი მომეწონოს, მთავარია, ის იყოს ეფექტური“, – განაცხადა „მონპელიეს“ პრეზიდენტმა.
31 წლის ქართველი ჩოგბურთელი ნიკოლოზ ბასილაშვილი პროფესიონალ ჩოგბურთელთა ასოციაციის რეიტინგში ვარდნას განაგრძობს.
გუშინ განახლებულ კლასიფიკაციაში ბასილაშვილმა კიდევ 65 ქულა დაკარგა, 45 ადგილით დაქვეითდა და ახლა, უკვე მსოფლიოს 263-ე ჩოგანია. ქართველ ჩოგბურთელს ამაზე უარესი შედეგი ბოლოს 9 წლის წინ ჰქონდა: 2014 წლის ივნისში 294-ე პოზიციაზე იყო.
ბასილაშვილს სხვადასხვა ტურნირებზე ზედიზედ რვა მარცხი გააჩნია. ივნისის დასაწყისში მან მარჯვენა იდაყვზე ოპერაცია გაიკეთა და ახლა, რეაბილიტაციის პერიოდი უდგას.
თუ როდის დაუბრუნდება საქართველოს პირველი ჩოგანი კორტს, ჯერჯერობით, უცნობია.
საუდის არაბეთში კი შესაძლოა, სულ მალე კიდევ ერთი სუპერვარსკვლავი, ნეიმარი გადავიდეს. ლეო მესის ტრანსფერის ჩავარდნის შემდეგ „ალ-ჰილალს“ ბრაზილიელის დამატება სურს.
საუდის არაბეთის კლუბის დელეგაცია ნეიმართან მოლაპარაკებების თაობაზე უკვე პარიზში იმყოფება. ამ დროისთვის მოლაპარაკებები მხოლოდ საწყის ეტაპზეა, მაგრამ ცნობილია, რომ „პარი სენ-ჟერმენი“ ნეიმარის გაშვების წინააღმდეგი არ იქნება, თუ შესაბამისად შეთავაზებას მიიღებს.
საუდის არაბეთის ჩემპიონატში კრიშტიანო რონალდო („ალ-ნასრი“) და ქარიმ ბენზემა („ალ-იტიჰადი“) უკვე გადავიდნენ. როგორც ჩანს, „ალ-ჰილალს“ სურს კონკურენტებს არ ჩამორჩეს და ვარსკვლავი მანაც დაიმატოს.
ნეიმარი „პარი სენ-ჟერმენში“ 2017 წლიდან თამაშობს და 173 მატჩში 118 გოლი გაიტანა. მანამდე ბრაზილიელი თავდამსხმელი „სანტოსსა“ და „ბარსელონაში“ თამაშობდა.
გუსინ, მადრიდის „რეალის“ პრეზიდენტმა ფლორენტინო პერესმა დაადასტურა, რომ კილიან მბაპეს შეიძენს, მაგრამ მომავალში.
პერესმა „პსჟ“-ს ვარსკვლავის შესახებ დასმულ შეკითხვას მოკლედ უპასუხა: „მბაპეს შევიძენთ, ოღონდ ამ ზაფხულში არა“.
კილიან მბაპე „რეალში“ გადასვლასთან ახლოს გასულ ზაფხულს იყო, მაგრამ ბოლო მომენტში გარიგება ჩაიშალა და ფრანგმა პარიზელებთან კონტრაქტი გაახანგრძლივა.
ავტორი
