საძირკველში წყალშემდგარი საცხოვრებელი კორპუსები ოზურგეთში

ოზურგეთში, ჭავჭავაძის ქუჩაზე მდებარე ხუთსართულიანი საცხოვრებელი სახლი 1967 წელს არის აშენებული. ქალაქის ცენტრალური ქუჩაზე მდებარე ამ სახლის პირველ სართულზე, წინა მხარეს, ყველა საცხოვრებელი ბინა (ოროთახიანები) დიდი ხანია, გადაკეთებული და გაქირავებულია საოფისედ. სარწმუნო ინფორმაციის მოწოდების შემდეგ, ჩვენ დავათვალიერეთ და ვნახეთ, რომ შუა საყრდენი კედელი ყველგან გამონგრეულია.

_ არავის ვებრძვით, არც შიშის დანერგვას ვცდილობთ, მაგრამ ამ, ლამის, ასი წლის სახლს, შესაძლოა, სულ ადვილად დაემუქროს საფრთხე. “გამოშიგნულია” წინა მხარის ყველა ბინა პირველ სართულზე. საფუძვლიანად თუ დაიწყებთ მოკვლევას, დაგეხმარებით და ერთ-ერთი სადარბაზოს საძირკველში რომ “სინკარებია” გახსნილი, გაჩვენებთ, _ გვითხრეს აღნიშნული კორპუსის მცხოვრებლებმა.

აღნიშნულ საოფისე ფართებში მომუშავეებმა (ერთი ქირავდება, დანარჩენი მოქმედია), ვერაფერი გვითხრეს გამონგრეულ კედლებზე. არც არიან ვალდებული, რადგან მათ აქ ფართი დაიქირავეს და ჩვეულებრივად მუშაობენ.

საფრთხეშია ოზურგეთში, თენიეშვილის ქუჩაზე მდებარე ცხრასართულიან საცხოვრებელ კორპუსში მცხოვრები 45 ოჯახი. კორპუსის საძირკველში დიდი ხანია, წყალია ჩამდგარი.

აღნიშნულ პრობლემაზე, “გურია ნიუსი” რამდენიმე წლის წინაც წერდა.

ადგილობრივი მცხოვრებლები ამბობდნენ, რომ კორპუსი 1989 წელს არის აშენებული და ამ ტერიტორიაზე მანამდე აბანოები არსებობდა. მიწიდან ამოდის გოგირდოვანი წყალი. სავარაუდოდ, სწორედ ეს უნდა იყოს მიზეზი იმისა, რომ კორპუსის სარდაფში მუდმივად წყალი დგას.

აღნიშნული კორპუსის მცხოვრებლები: დარიკო ცეცხლაძე, ანა ტუიმაცენსკი, რიტა თოიძე, ნინო შანშიაშვილი “გურია ნიუსთან” თავიანთ წუხილს გამოთქვამენ:

_ აქ ორი კორპუსი ერთმანეთზეა მიდგმული ერთგვარი მართკუთხა ფორმით. მარჯვენა მხარეს, სარდაფი მუდამ წყლითაა სავსე. აუცილებელია, ეს სივრცე, სადაც წყალი დგება, ამოივსოს ქვიშით, მიწით, ღორღით _ რითაც შესაძლებელი იქნება და დაიტკეპნოს. წყალი, დაახლოებით, ნახევარი მეტრის სიმაღლეზე დგას. ამ კორპუსს მუნიციპალიტეტის ახლანდელმა ხელმძღვანელობამ მთლიანად გაუკეთა კედლების საფარი, შეიფუთა კედლები და ეს ძალიან კარგი საქმე გაკეთდა _ კედლებს ჩამოშლის საფრთხე ემუქრებოდა. თუმცა, უარესი საფრთხე შეიძლება დაგვემუქროს და ღმერთმა ნუ ქნას, კორპუსი თავზე დაგვემხოს. ამიტომ გვინდა, მუნიციპალიტეტის მერიამ ამ საქმის მოგვარებაშიც დაგვეხმაროს. ახლა არჩევნებია და როგორც დასრულდება, განცხადებით მივმართავთ, _ გვითხრეს მათ.

იქვე, თენიეშვილის ქუჩის ათ ნომერში, სამსართულიან საცხოვრებელ ბინაში, რომელიც გაცილებით დიდი ხნის წინაა აშენებული, გვეუბნებიან, რომ სახლის წინა მხარეს, საძირკვლის ზემოთ, კედლის საფარი მთლიანად ჩამოშლილია, საძირკველში კი მუდმივად წყალი ამოდის, რასაც გადინების საშუალება რომ ჰქონოდა, ერთჯერადად მილი ჩასვეს.

_ ეს საძირკველი, ალბათ, მალე ჩაიშლება. რაც აქ ვცხოვრობთ, სულ წყალი ამოდის. კედლები დაბზარულია. გვეშინოდა, მაგრამ ახლა უფრო დაზაფრულები ვართ. პანიკას ნამდვილად არ ვთესავთ, ადამიანურად გეუბნებით _ გვეშინია. ჭერზე არის ბზარები, წყალი ისეა ჩამდგარი, სერიოზული ღონისძიების გატარებაა საჭირო.

ჩვენთან იყო მაშინდელი კოტე შარაშენიძე, როცა გვერდით მდებარე ცხრასართულიან კორპუსს საფარი შემოავლეს. გვითხრა, რომ განცხადება მიგვეტანა და დაგვპირდა დახმარებას. ერთხელ შევიტანეთ. ახლა არჩევნებია და ჩვენთვის ვის სცალია. არჩევნების შემდეგ კი შევიტანთ, _ გვითხრეს ქალბატონებმა.

_ კოვიდპანდემიიდან გამომდინარე, ინფრასტრუქტურული სამუშაოები საკმაოდ შემცირდა, თორემ ვაპირებდით აღნიშნული პრობლემის მოგვარებას. ვიცით ამის შესახებ. როგორც კი საშუალება იქნება, ამ პრობლემის მოგვარებაში დავეხმარებით იქ მცხოვრებლებს. ზოგადად, კი, ადგილზე მივალ და კიდევ ერთხელ გავეცნობით, _ თქვა “გურია ნიუსთან” ოზურგეთის მუნიციპალიტეტის მერიის ინფრასტრუქტურის სამსახურის უფროსმა თემურ გიორგაძემ.

“გურია ნიუსი” აგრძელებს მუშაობას ამ პრობლემურ თემაზე და მკითხველებს დეტალურ ინფორმაციას მივაწვდით, დიდი საფრთხის შემცველ, როგორც ოზურგეთელებმა უწოდეს, “გამოშიგნულ” და საძირკველში წყალშემდგარ კორპუსებზე.

[sexy_author_bio]