“საერთოდ შემეშვას ყველა _ არ შეიძლება ადამიანებით მანიპულირება!”

ოზურგეთის მერობის პოსტზე დამოუკიდებელი  კანდიდატის კონსტანტინე შარაშენიძის შტაბის ხელმძღვანელმა  ირაკლი სირაძემ მედიისთვის ბრიფინგი გამართა და სოფელ ოზურგეთში მცხოვრები გიორგი როყვას შესაძლო დაშინების ფაქტზე ისაუბრა.

გიორგი როყვა “ევროპული საქართველოს” კანდიდატი იყო სოფელ ოზურგეთში და ამჟამად, ოფიციალურად დაფიქსირებულია კონსტანტინე შარაშენიძის წარმომადგენლად სოფელ ოზურგეთში. მკითხველს შევახსენებთ, რომ როყვამ ჩვენთან სატელეფონო საუბარში განაცხადა, რომ ამის შესახებ არაფერი იცოდა და მისი პირადობის მოწმობა შარაშენიძის შტაბში მისი ნების გარეშე აღმოჩნდა (ჩანაწერი, რომელიც პირად ინფორმაციას შეიცავს და ამის გამო არ გაგვისაჯაროებია, ინახება რედაქციაში და მზად ვართ, საჭიროების შემთხვევაში, გადავცეთ სამართალდამცავ ორგანოებს).

_ შტაბში შემოდის ძალიან ბევრი ინფორმაცია იმის შესახებ, რომ ოზურგეთის სოფლებში მმართველი პარტიის კანდიდატის შტაბის წევრები ახორციელებენ შანტაჟსა და ზეწოლას. ასეთი ინფორმაციის გავრცელებისაგან თავს ვიკავებდით, რადგანაც ვერიდებოდით ამომრჩევლისთვის შემდგომი პრობლემების შექმნას. თუმცა, მოცემული შემთხვევა განსაკუთრებულია, რადგანაც მოხდა ფაქტების ფაბრიკაცია და ამის საშუალებით საინფორმაციო შეტევის გახორციელება ჩვენზე.

ერთ-ერთი მედიასაშუალების მიერ (იგულისხმება “გურია ნიუსში” გამოქვეყნებული მასალა) გავრცელებული ინფორმაცია გიორგი როყვასთან დაკავშირებით,არ შეესაბამება სინამდვილეს _ გიორგი როყვა ჩემი მეგობარია, მან თავად გადმომცა თავისი პირადობის მოწმობის ასლი და სურვილი გამოთქვა შარაშენიძის წარმომადგენელი ყოფილიყო სოფელ ოზურგეთში. ამის შემდეგ რა მოხდა, რატომ და როგორ გააკეთა განცხადებები გიორგიმ, არ ვიცი, _ ამბობს ირაკლი სირაძე.

მან ბრიფინგზე წარადგინა საკუთარ მობილურ ტელეფონზე შესული როყვას მიერ გაგზავნილი მოკლე ტექსტური შეტყობინებები. მისივე თქმით, “არსებობს სათვალთვალო კამერის მიერ გადაღებული მასალა გუშინ, 7 ნოემბერს, 14 საათი და 30 წუთიდან 16 საათი და 00 წუთამდე დროის არეალში, სადაც ჩანს, სავარაუდოდ როგორ გავიდა გიორგი როყვა სამსახურის შენობიდან და სამსახურის მიმდებარე ტერიტორიაზე როგორ ჩაჯდა ჩვენთვის უცნობ მანქანაში.” სირაძის თქმით, ზუსტად დროის ამ ინტერვალშია მისგან მიღებული დაახლოებით ოცამდე ტექსტური შეტყობინება და გახორციელებულია არა ერთი სატელეფონო ზარი.

_ მინდა კიდევ ერთ საკითხზე გავამახვილო ყურადღება: მედიასაშუალების მიერ 7 ნოემბერს, 19 საათსა და 55 წუთზე გავრცელდა ინფორმაცია სოფელ ოზურგეთის საარჩევნო უბანზე კონსტანტინე შარაშენიძის წარმომადგენელ გიორგი როყვასთან დაკავშირებით; საყურადღებოა ის ფაქტი, რომ 7 ნოემბერს 20 საათსა და 58 წუთზე გიორგი როყვას მიერ, ჩემს ნომერზე შემოსულია შეტყობინება: „ირაკლი, ჩემთან არავის დაურეკავს ჟურნალისტს და არც არავის არაფერი უკითხავს. ღმერთს გეფიცები. საერთოდ შემეშვას ყველა, კიდევ ერთხელ ბოდიში, კიდევ ერთხელ ბოდიში. ჩემთვის არავის არაფერი არ დაურეკავს და არ უკითხავს… “

აქვე აღვნიშნავ, რომ გიორგი როყვას ვერ დავუკავშირდი გუშინ საღამოს, რადგანაც მისი მობილური ტელეფონი გათიშული იყო; ამ დილით სამსახურში არ მოსულა ჩვეულ დროს _ 9 საათიდან 10-ის ნახევრამდე; ასევე, მომაწოდეს ინფორმაცია რომ, ის გასულა სახლიდან ამ დილით, დაახლოებით, 5 საათზე, გამთენიისას და ვერავინ გვეუბნება, სად იმყოფება; ამ დრომდე სამსახურში არ მისულა. ასევე, შტაბში იმყოფებოდა გიორგი როყვას მამიდა, რომელიც თავადაც ეძებდა გიორგის, _ განაცხადა ირაკლი სირაძემ.

აღნიშნულთან დაკავშირებით “ქართული ოცნების” ოზურგეთის შტაბის ხელმძღვანელი გიორგი ღურჯუმელიძე ამბობს, რომ თუ ვინმეს აქვს ირაკლი სირაძის მიერ გავრცელებული ინფორმაციის დამადასტურებელი ფაქტები, ამისთვის არსებობს შესაბამისი ორგანოები, რომლებიც ამ საქმეს გამოიძიებენ:

_ თუ რომელიმე მოქალაქეს აქვს შანტაჟის და მუქარის დამადასტურებელი ფაქტები, მიმართოს სამართალდამცავებს, შესაბამისი საგამოძიებო ორგანოებს _ ამ საქმის გამოძიება მათი კომპეტენციაა.

“გურია ნიუსი” აცხადებს, რომ ემიჯნება ნებისმიერი მხრიდან ნებისმიერ მოქალაქეზე ფსიქოლოგიური ან სხვა სახის ზემოქმედების ფაქტებს, თავისუფალი ნების გამოხატვის ნებისმიერ შეზღუდვას. ჩვენი ჟურნალისტები ამ წუთებშიც მუშაობენ, რათა დაადგინონ გიორგი როყვას ადგილსამყოფელი და დაიცვან მისი უფლებები.