საქართველოს სამზარეულო კულტურა ფხალეულის ორასამდე კერძს იცნობს. თუმცა, ყველა ერთმანეთისგან გამორჩეული და საუცხოო გემოს მქონეა.
წინაპრები უმეტეს შემთხვევაში ფხალეულს ნიგვზით აკეთებდნენ.
ახლა გთავაზობთ საგაზაფხულო ფხალეულის ერთ-ერთ ვარიანტს.
მრავალი სახეობის ფხალეული თუ მწვანილეული მასაში, შეგიძლიათ შეურიოთ სხვადასხვა მცენარის ნორჩი დუყები.
საჭირო მასალა: დავკრიფოთ თეთრი ფხალის (კეჟერას) აუყვავებელი თავთავების ზედა ნაწილი, ცოტა ფოთლებიც, ასევე, დავკრიფოთ ჭარხლის (წითელი ფხალი) ფოთლები. პრასი, ნიახური, ოხრახუში, კამა, ახალი ჭინჭარი, ჟოლოს ნორჩი დუყები, ქათამნაცარას ფოთლები. მოვძებნოთ იის ფოთლები, შეიძლება ყვავილოვანი ღეროებიც. ძალიან ცოტა, სამი-ოთხი ცალი ნორჩი პიტნის ღერო.
დავჭრათ ეს მასა და ძალიან არ მოვხარშოთ. 15 წუთის დუღილის შემდეგ გადმოვდგათ.
მოხარშული მასა როცა გაგრილდება, ძალიან ნუ გავწურავთ. მოვხრაკოთ ხახვი ზეთში. შემდეგ დავამატოთ წვრილად დაჭრილი ნედლი ხახვის ფოთლები და კამა. მარილი გემოვნებით და ჩავუშვათ მასში მოხარშული ფხალეული. მოვურიოთ სწრაფად. შემდეგ დავახალოთ ორი ცალი კვერცხი. კვლავ მოვურიოთ. როცა ჩაიშუშება, გადმოვდგათ. შეგიძლიათ, სუფრაზე მიტანისას, ცოტა თეთრი ღვინის ან ვაშლის ძმარი მოაპკუროთ.
ასეთი ფხალეული სავსეა ვიტამინებით და შეგიძლიათ გაზაფხულზე არაერთხელ გააკეთოთ და მიირთვათ.
