მას შემდეგ, რაც ქართული ფეხბურთი დამოუკიდებლობის გზას დაადგა, ლანჩხუთის „გურიასთვის“ „ბორჯომთან“ დღეს გამართული მატჩი საიუბილეო _ მეათასე გამოდგა.
შეხვედრა საკმაოდ მძიმე ბრძოლით დაიწყო და პირველი გოლი სტუმარმა პავლიაშვილმა გაიტანა მე-19 წუთზე. მთავარი მოვლენები პირველი ტაიმის ბოლო წუთზე განვითარდა, რომელმაც, ფაქტობრივად, გადაწყვიტა კიდეც ამ შეხვედრის ბედი. მსაჯმა „ბორჯომელთა“ კარში ნიკა ნარიაშვილის წაქცევისთვის პენალტი დანიშნა, რომელიც გოლად თენგიზ ჩიკვილაძემ აქცია, ხოლო გასახდელისკენ მიმავალმა სტუმარმა ფეხბურთელმა მაყურებლის გინებისთვის წითელი ბარათი გასახდელში დაიმსახურა და როგორც გაირკვა, კაცნაკლულად დარჩენილმა „ბორჯომმა“ მეორე ტაიმში ფარხმალიც დაყარა.
ერთი ხანი დაძაბულობა შეინიშნებოდა, მაგრამ თორმეტ წუთში გატანილმა სამმა გოლმა ყველაფერი ცხადი გახადა. მასპინძელთაგან ჯერ ბექა ბერიძემ იხეირა, რომელსაც მალე ნარიშვილის ეფექტური დარტყმა მოჰყვა. წერტილი კი უკრაინელმა დენის სკოტარენკომ დასვა, რომელმაც თავით ზედიზედ მეორე გოლი გაიტანა საშინაო შეხვედრაში.
საბოლოოდ, 4:1 იმარჯვა „გურიამ“ და ჩოხატაურის „ბახმაროდან“ მშობლიურ ქალაქში დაბრუნებული თენგიზ პატარაიასთვის ეს სადებიუტო სამწვრთნელო წარმატება გამოდგა. ამ სამი ქულით კი გუნდს საპლეიოფო ამბიცია უფრო მოუმძლავრდა.
ცნობისათვის, უკვე ჩატარებული ჩემპიონატისა და თასის 1000 შეხვედრაში „გურიამ“ 405 მატჩი მოიგო, ფრედ დაასრულა _ 169, ხოლო 426 მატჩში მარცხი იწვნია. პირველი შეხვედრა „გურიამ“ ეროვნულ ჩემპიონატებში 1990 წლის 31 მარტს, ლანჩხუთში გორის „დილასთან“ გამართა და 1:0 გაიმარჯვა.
