საქართველოს პრემიერ-მინისტრმა ირაკლი ღარიბაშვილმა ეკონომიკის სამინისტროს ანაკლიის პორტის მშენებლობაზე ახალი ტენდერის მომზადება დაავალა.
“მოგეხსენებათ, სამწუხაროდ, [წინა] ინვესტორმა ვერ შეასრულა ნაკისრი ვალდებულებები, მათ ვერ შეძლეს საჭირო კაპიტალისა და 400 მლნ აშშ დოლარის ოდენობის სასესხო დაფინანსების მოძიება“, – თქვა ღარიბაშვილმა მთავრობის სხდომაზე.
მისი თქმით, ხელისუფლება აპირებს “კვალიფიციური კონსულტანტის” დაქირავებას და ახალი ტენდერის გამოცხადებას.
“ტენდერი უნდა ჩატარდეს მაღალ დონეზე, ყველა საერთაშორისო სტანდარტის შესაბამისად”, – განაცხადა ეკონომიკის მინისტრმა ნათია თურნავამ მთავრობის სხდომის დასრულების შემდეგ.
თურნავამ ასევე აღნიშნა, რომ ეკონომიკის სამინისტროში შეიქმნა “საჯარო სამართლის იურიდიული პირი – ანაკლიის ღრმაწყლოვანი პორტის განვითარების სააგენტო” – სწორედ ამ სააგენტოს დაევალა მთავრობისგან, ახლო მომავალში ჩაატაროს საკონსულტაციო შესყიდვები, რათა მომზადდეს კონკურენტული პროცესი ინვესტორების შერჩევისთვის.
ეკონომიკის მინისტრმა იმედი გამოთქვა, რომ პროექტი, პირველ რიგში, დასავლელი ინვესტორებისთვის იქნება საინტერესო.
ანაკლიაში ღრმაწყლოვანი პორტის აშენების იდეა ჯერ კიდევ საქართველოს წინა ხელისუფლებას გაუჩნდა. პროექტის განხორციელება კი, უკვე ამჟამინდელი მთავრობის პირობებში დაიწყო.
2016 წელს ტენდერში გაიმარჯვა “ანაკლიის განვითარების კონსორციუმმა”, რომლის ერთ-ერთი დამფუძნებელი კომპანია „თიბისი ჰოლდინგია“ („თიბისი ჰოლდინგს“ საქართველოს ყველაზე მსხვილი ბანკის „თიბისი ბანკის” სამეთვალყურეო საბჭოს ყოფილი თავმჯდომარე მამუკა ხაზარაძე ფლობს). ტენდერი პრემიერ კვირიკაშვილის დროს ჩატარდა.
მოგვიანებით, ურთიერთობა დაიძაბა კვირიკაშვილსა და ქვეყნის ფაქტობრივ მმართველს, ბიძინა ივანიშვილს შორის. ამ დაძაბულობის ფონზე კვირიკაშვილი პრემიერის თანამდებობიდან გადადგა. ახალმა მთავრობამ დაიწყო მის დროს მიღებული გადაწყვეტილებების გადახედვა. მათ შორის, პრობლემები შეექმნა კვირიკაშვილთან დაახლოებულ ბიზნესმენს, “ანაკლიის განვითარების კონსორციუმის” თანათავმჯდომარეს, მამუკა ხაზარაძესაც – ხაზარაძის წინააღმდეგ სისხლის სამართლის საქმე აღძრეს თიბისის ერთ-ერთ ტრანზაქციასთან დაკავშირებით. 9 იანვარს კი ხაზარაძის კონსორციუმს ანაკლიის აშენების უფლება ჩამოართვეს.
ანაკლია საქართველოსთვის სტრატეგიულად მნიშვნელოვანი პროექტია, რადგან იგი გზას გაუხსნის ცენტრალური აზიის ტვირთებს ევროპისკენ და პირიქით.
პირველ ქართულ ღრმაწყლოვან პორტს, რომელიც ანაკლიაში შენდებოდა, პრეტენზია აქვს, რომ თურქეთისა და რეგიონის სხვა ქვეყნების პორტების სერიოზული კონკურენტი გახდეს. პორტის აშენებას მხარს უჭერს აშშ-ც. პროექტის წინააღმდეგი იყო რუსეთი და ამის შესახებ რუს მაღალჩინოსნებს არაერთი საჯარო განცხადება გაუკეთებიათ.
წყარო: ჯემნიუსი
