ოზურგეთში, სახოკიას ქუჩაზე, დიდი ხანია, ყოველი გაწვიმების შემდეგ (ზოგჯერ მშრალ ამინდშიც) საკანალიზაციო ჭები იჭედება. ეს იმდენად სწრაფად და რამდენიმე ადგილზე ხდება, რომ წამებიც არ სჭირდება და ქუჩის მოზრდილ მონაკვეთზე, ფეკალიები გადმოდის. იტბორება, როგორც ქუჩა, ისე მიმდებარე ეზოები, რომლებიც დამრეცად არის განლაგებული გზის ნაპირას და ბინძური მასაც უცებ გადაედინება მოსახლეობაში.
1 და 2 ივლისსაც, ძლიერი წვიმის შედეგად, უცებ გაიჭედა საკანალიზაციო სისტემა. ქუჩაზე მდებარე ჭებიდან წყალი ერთბაშად გადმოვიდა და აღდგა ნაცნობი სურათი _ დაიტბორა ქუჩა. ფეკალური მასა პირდაპირ ქუჩაშიც მიჰქონდა წყალს, მერე კი ეზოების გადავლით, იქვე ღელეში ჩაედინებოდა, საიდანაც მდინარე ბჟუჟს უერთდებოდა.
“გურია ნიუსი” , ბოლო 7-8 თვის მანძილზე, სამჯერ წერდა ამ ქუჩაზე არსებული უმძიმესი მდგომარეობის შესახებ.
_ აუტანელ მდგომარეობაში ვართ. რაც შეგვიძლია, ვასუფთავებთ აქაურობას. ადრეც გესაუბრეთ. სახოკიას ქუჩაზე წვიმის მოსვლის ეშინიათ! უკვე მესამედ ალერგია მომცა, ცუდად გავხდი. ორი საკანალიზაციო ჭა არის გზის ამ მონაკვეთზე და როგორც კი გაწვიმდება, ერთნაირად გადმოდის ბინძური წყალი. ადამიანს კი არა, მანქანებსაც კი უჭირთ ამ დროს გავლა. აქ გუშინ არ დასახლებულან ადამიანები. ადრე წლებშიც იყო ცუდი ამინდები, მაგრამ ასეთი ვითარება არავის ახსოვს. არ მგონია, ეს მხოლოდ წვიმის ბრალი იყოს. სადღაც, ალბათ, რაღაც ან გაჭედილია მიწისქვეშა საკანალიზაციო ქსელში, ან ახალია გასაკეთებელი. თუ ეს არხები მართლა ვერ აუდის წყლის და ფეკალური მასის გატარებას, სხვა რა გზაა, უნდა შეცვალონ. გურიაში წვიმა ხშირად არის და აწი თუ სულ ასეთი მდგომარეობა იქნება, მაშინ უნდა ავსახლდეთ აქედან. რა ვქნათ? ასე ადამიანის აგდება შეიძლება? მიმდგარნი არიან და ფასადებს და ობელისკებს ღებავენ ოზურგეთში. აქ კი ყოველ გაწვიმებაზე საკანალიზაციო ჭები ავსებულია და მთელი ფეკალიები ეზოებში შეაქვს, _ გვეუბნებიან აქ მცხოვრებლები და დაპირებულის შესრულებას ელოდებიან
ჯერ კიდევ წლის დასაწყისში, ოზურგეთის წყალმომარაგების კომპანიაში ჩვენ გვითხრეს, რომ პრობლემის მიზეზი ქალაქის მოსახლეობის გაზრდილი რაოდენობაა და სამომხმარებლო და საკანალიზაციო ქსელი დატვირთვას ამიტომ ვერ უძლებს.
“სახოკიას ქუჩაზე არსებული მდგომარეობა არ არის მიწისქვეშა ქსელის გაჭედვის ან მწყობრიდან გამოსვლის ბრალი. ასე რომ იყოს კარგ ამინდშიც გადმოვიდოდა წყალი. ამ მხარეს ყველაზე მეტი დატვირთვა უწევს ქსელს, რადგან ბოლო წერტილია მდინარეში გასვლამდე. მიწისქვეშა არხი, ძლიერი წვიმების თუ თოვლის დროს, ვერ ატარებს სრულად წყალს. მით უფრო თუ თოვლ-ჭყაპია. მიზეზი ის არის, რომ გაიზარდა ქალაქის მცხოვრებთა რაოდენობაც. აქედან გამომდინარე, დატვირთვაც გაიზარდა. არხებსაც მეტი წყლის ნაკადის გატარება უწევთ. შესაცვლელია და ახალია გასაკეთებელი. უფრო უნდა გაფართოვდეს მიწისქვეშა არხები და გამტარუნარიანობაც მეტი იქნება. ეს საკითხი დღის წესრიგში დგას. ჩვენ გამოძახებული გვყავს საპროექტო ჯგუფი თბილისიდან და მალე შეიცვლება. თუმცა, უახლოეს დღეებში ეს შეუძლებელია. ვიცით, პანდემიაა, ხელისშემშლელი სხვა ფაქტორებიც არსებობს _ იყო ძალიან ცუდი ამინდები. გავაკეთებთ აუცილებლად. ცოტა ხანს კი, წვიმების დროს, როგორმე უნდა გავუძლოთ ასეთ მდგომარეობას, _ თქვა მაშინ “გურია ნიუსთან” წყალმომარაგების ოზურგეთის კომპანიის ხელმძღვანელმა შალვა კონჯარიამ.
როგორც მაშინ კომპანიაში გვითხრეს, სამუშაოების შესრულებას ხელი ზამთარმა და ასევე, პანდემიამაც შეუშალა. ამიტომ სამუშაოების შესრულებას გაზაფხულზე დაიწყებდნენ. ახლა პანდემიაც მისუსტებულია და ზაფხულიც დგას, თუმცა, მდგომარეობა არანაირად არ შეცვლილა.
შალვა კონჯარია ახლაც იმავეს გვეუბნება, რომ პრობლემა მალე მოგვარდება.
თუმცა, წვიმები მით უფრო, წლევანდელი ზაფხული _ ივნისი და ივლისი განსაკუთრებით წვიმიანია.
_ როცა იცი, რომ ყოველი წვიმის დროს, ფეკალიებით აგევსება ეზო და ქუჩა, როგორი ასატანია? _ სვამენ კითხვას სახოკიას ქუჩის მცხოვრებლები.
“გურია ნიუსი” აღნიშნული პრობლემის თაობაზე გურიის სამოქალაქო ცენტრის პროექტების კოორდინატორს, ნინო ურუშაძეს ესაუბრა:
_ კანალიზაციის ერთიანი ქსელისა და გამწმენდი ნაგებობის არარსებობა ძალიან დიდი პრობლემაა ოზურგეთისთვის.
ჩვენმა ორგანიზაციამ სხვადასხვა პროექტის ფარგლებში ჩაატარა კვლევები, მოსახლეობისთვის ყველაზე მწვავე პრობლემების დასადგენად. ამ კვლევების შედეგები აჩვენებს, რომ კანალიზაციის საკითხი არის ერთ-ერთი ყველაზე მწვავე პრობლემა ადამიანებისთვის. ჩვენ ფოტოებიც გვაქვს გადაღებული იმ ადგილების საილუსტრაციოდ, სადაც კანალიზაცია უშუალოდ მდინარეში ჩაედინება. რადგან კანალიზაციის სისტემა არ არსებობს, მოსახლეობას აქვს წერტილოვანი ჭები და გამოყენებული წყალი ნიადაგში ჩაედინება, რაც საშიშია არა მხოლოდ გარემოსთვის, არამედ ჯანმრთელობისთვის. თხევადი ნარჩენები ჩაედინება, როგორც ნიადაგში, ასევე მდინარეებში. მოსახლეობისთვის ერთ-ერთი პრიორიტეტული საკითხი არის კანალიზაციის პრობლემის გადაწყვეტა, _ თქვა ნინო ურუშაძემ.
მან ასევე ხაზი გაუსვა იმ ფაქტს, რომ ივნისში, ოზურგეთში პარლამენტარების გარკვეულმა ნაწილმა სხდომა ჩაატარა ოზურგეთში, მაგრამ არასამთავრობო ორგანიზაციებისა და მედიის წარმომადგენლები შეხვედრას არ დაასწრეს.
_ როგორც სამოქალაქო ორგანიზაციის წევრს, მინდოდა შეხვედრაზე დასწრება და გაგება, იგეგმება თუ არა ოზურგეთში კანალიზაციის ქსელის მოწყობა ახლო მომავალში, რადგან ყველამ ვიცით, რამდენად დიდი პრობლემაა აღნიშნული საკითხი ჩვენი ქალაქისთვის. ჩვენ გაკეთებული გვაქვს კვლევები ადგილობრივი მოსახლეობის საჭიროებებისა და პრობლემების შესახებ და კანალიზაციის საკითხი ყოველთვის ერთ-ერთი მწვავე პრობლემაა. სწორედ ამ საკითხზე მინდოდა კითხვის დასმა ამ შეხვედრაზე, დავრეკე საკონტაქტო პირთან, ვისთანაც უნდა შემეთანხმებინა დასწრების საკითხი. პასუხად მივიღე, რომ ადგილები შეზღუდული იყო, თუმცა, ჩაიწერა ჩემი საკონტაქტო ინფორმაცია და დამპირდა, რომ დამიკავშირდებოდა, მაგრამ არ დამიკავშირდა, _ გვითხრა ნინო ურუშაძემ.
ავტორი
