ლანჩხუთის საკრებულოს რიგგარეშე სხდომას, სადაც ერთადერთი განსახილველ-დასამტკიცებელ საკითხად მიმდინარე წლის ბიუჯეტში ცვლილების გახორციელება იყო წარმოდგენილი, ხმაურის გარეშე არ ჩაუვლია. ოპოზიცია ამტკიცებდა, რომ მოსახლეობისთვის სახლის გადასახური მასალის დარიგება პოლიტიკური ნიშნით ხდება, „ოცნებისთვის“ კი ეს ბრალდებები კატეგორიულად მიუღებელია.
საქმე ისაა, რომ დღის წესრიგის შესაბამისად, მერიის საფინანსო სამსახურის უფროსმა, როლანდ ლაშხიამ საკრებულოს წევრებს განმარტებები წარუდგინა, თუ რა მიზეზითა და მიზნით უნდა მოხდეს ბიუჯეტის კორექტირება.
ამ განმარტებების მიხედვით, 40 ათასი ლარით იზრდება სასოფლო სამეურნეო დანიშნულების მიწის გადასახადის გეგმა, არასასოფლო სამეურნეო დანიშნულების მიწის გადასახადის გეგმა კი ამავე ოდენობის თანხით მცირდება. 67 ათასი ლარით მცირდება, ასევე, ბუნებრივი მოსაკრებლის გეგმა. კვლავ მზარდია ჯარიმების სანქციების და საურავებიდან შემოსავლის გეგმა. როგორც ლაშხიამ თქვა, ამ კუთხით 115 ათას ლარიანი მატებაა და ის, ჯამში, 2 862,74 ათასი ლარითაა განსაზღვრული.
ბიუჯეტში კორექტირების შეტანის ერთ-ერთი მიზეზი მთავრობის ის განკარგულებაცაა, რომლის მიხედვითაც, სექტემბერში მომხდარი სტიქიის შედეგების სალიკვიდაციოდ ლანჩხუთის მუნიციპალიტეტს დამატებით 850 ათასი ლარი ერგო. ირკვევა, რომ ამ თანხიდან 89 967 სუფსის კულტურის სახლის სახურავის რეაბილიტაციისთვის მიიმართება. აცანის კულტურის სახლის სახურავის შესაკეთებლად კი 127104 ლარის გახარჯვაა გათვალისწინებული. გზების მოხრეშვასა და სასტუმრო „ლაშთანთან“ წყლის კორექტორის მოსაწყობად 209 952 ლარია გათვალისწინებული. მრავალბინიანი სახლის და საცხოვრებელი სახლების საურავის მასალების შეძენაზე და სუფსის ადმინისტრაციულ ერთეულში სტიქიის შედეგად დამწვარი სახლის რეაბილიტაციისთვის _ 422977 ლარი.
მერიის საფინანსო სამსახურის უფროსის მხრიდან განმარტებების მოსმენის შემდეგ დეპუტატებმა საკუთარი პოზიციებიც დააფიქსირეს წარმოდგენილ საკითხთან დაკავშირებით. განსაკუთრებით მწვავე _ „სახურავების“ თემა გამოდგა, რასაც სხდომათა დარბაზში ოპოზიციასა და მმართველ ძალას შორის ხმამაღალი საუბრები მოჰყვა.
გია გოგიაძემ, რომელიც ენმ-ის წარმომადგენელია ადგილობრივ წარმომადგენლობით ორგანოში, არაერთი შენიშვნა თუ წინადადება გააჟღერა საფინანსო სამსახურის მიერ წარმოდგენილ საკითხთან დაკავშირებით. ერთ-ერთი კი სწორედ სტიქიის სალიკვიდაციო თანხებს და „სახურავების“ თემას ეხებოდა. გოგუაძის შეფასებით, „სახურავების“ თემა პოლიტიკური ნაწილია.
„სტიქია ბუნებრივი მოვლენაა და მის ლიკვიდაციას ბოლომდე ეფექტური აღმოფხვრა სჭირდება. მიმაჩნია, რომ სექტემბერში მომხდარი სტიქიისთვის 850 ათასი ლარის ახლა გამოყოფა დაგვიანებულია. აი, „სახურავების“ თემა კი მთლიანად პოლიტიკური ნაწილია, ოპოზიცია ვიმუშავებთ იმის გასარკვევად, თუ რა კატეგორიის ადამიანებს გაეწიათ ამ კუთხით დახმარება. ერთიცაა, იმ ფონზე, როცა ადამიანებს ორჯერ გაუძვირდათ ცხოვრება, 80%-ს გაყიდული აქვს ეს თქვენ მიერ მიცემული სახურავი“, _ თქვა გოგუაძემ.
გოგუაძის შენიშვნას, რომ მოსახლეობისთვის სახურავების დარიგება პოლიტიკური ნიშნით ხდება, „ოცნების“ წევრი კახა კვიტაიშვილი გამოეხმაურა და საპირისპიროს მტკიცებას შეეცადა: „პირიქით, დიდი სიამაყით შემიძლია ვთქვა, რომ ამ ნიშნით არ ვარჩევთ ჩვენ ადამიანებს და თუკი ამ კუთხით რაიმე ჯგუფს შექმნით მეც დიდი სიამოვნებით ჩავერთვები“.
კვიტაიშვილის ამ გამოპასუხებას მოჰყვა სწორედ ხმამაღალი საუბრები ოპოზიციასა და მმართველი გუნდის წევრებს შორის.
მმართველი გუნდის წევრები კონკრეტულ რიცხვს ასახელებდნენ, ვისაც სახლის გადასახური მასალით დაეხმარნენ და ამბობდნენ, რომ მათში ერთსაც ვერ იპოვიდნენ, ვინც პოლიტიკური ნიშნით იქნა შერჩეული. ოპოზიცია კი კონკრეტულ გვარებსა და სახელებს ასახელებდა, ვისაც სწორედ პოლიტიკური შეხედულების გამო ეთქვათ უარი დახმარების გაწევაზე.
„სოფელ ქვიანიდან ალექსანდრე ჯინჭარაძე, ქალაქის მახოვრები ზურიკო ებრალიძე _ ის კონკრეტული სახელები და გვარებია, ვისაც სწორედ პოლიტიკური ნიშნით ეთქვათ უარი. კიდევ ბევრია ასეთი ადამიანი. თქვენს ადგილას რომ ვიყო, შევქმნიდი კომისიას, სადაც ოპოზიციის წარმომადგენლებსაც შევიყვანდი და თითოეულად განვიხილავდი ყველა ოჯახს. როცა ოპოზიციაც აიღებდა პასუხისმგებლობას იმ ადამიანებზე, ეს თემაც სალაპარაკო აღარ იქნებოდა“, _ ცხარობდა დეპუტატი კახა ასკურავა.
ის, რომ „სახურავების“ თემა გადახედვას საჭიროებს და ამ კუთხით მეტი გამჭვირვალობაა საჭირო, აღნიშნა „ლელოს“ წარმომადგენელმა ლანჩხუთის საკრებულოში, გოჩა ჯანაშიამ.
„ფაქტია, რომ „სახურავების“ თემა გარკვეული მითქმა-მოთქმის საგანია და წინასაარჩევნოდ ამომრჩეველზე მანიპულირების მსუყე ლუკმად მიიჩნევა. ყოველ შემთხვევაში, ამაზე არაერთხელ გვესმის შენიშვნები და ხომ არ აჯობებს ამ პროგრამის უფრო ეფექტურად და გამჭვირვალედ მუშაობისთვის სპეციალური კომისია შეიქმნას, სადაც ოპოზიციაც იქნება წარმოდგენილი. ასეა თუ ისე, ეს დახმარება, გარკვეულწილად, აღიქმება წინასაარჩევნო მოსყიდვის მცდელობად, თუნდაც იმიტომ, რომ საქმე გვაქვს კერძო ქონებასთან”.
ჯანაშიამ გოგუაძის მიერ სტიქიის თანხების დაგვიანების თაობაზეც გაამახვილა ყურადღება და დასძინა, რომ ეს სამთვიანი დაგვიანება რა მოსატანია, როცა 2020 წლის საპარლამენტო არჩევნების წინ 2018 წლის(!) სტიქიის სალიკვიდაციო პროექტები გახორციელდა, რომელიც ფორსმაჟორთან არა, მაგრამ წინასაარჩევნოდ ადმინისტრაციული რესურსის ხარჯვასთან უფრო ასოცირდებოდაო.
[sexy_author_bio]
