5 დეკემბერს, ოზურგეთის მუნიციპალიტეტის საკრებულოს სხდომა შედგა. დღის წესრიგის გაცნობამდე, დეპუტატები, საკრებულოსა და მერიის მოხელეები სხდომაზე ნარინჯისფერი სიმბოლიკით გამოცხადდნენ.
ოზურგეთის მუნიციპალიტეტის გენდერული თანასწორობის საბჭოს თავმჯდომარემ ლელა საჯაიამ აღნიშნა, რომ ქალთა მიმართ ძალადობის აღმოფხვრის საერთაშორისო დღეს, 25 ნოემბერს გენდერული ძალადობის წინააღმდეგ თექვსმეტდღიანი კამპანია დაიწყო, რომელიც ადამიანის უფლებათა დაცვის საერთაშორისო დღეს, 10 დეკემბერს დასრულდება.
_ წარმოდგენილი კვლევებით, გურიაში ქალთა მიმართ ძალადობის ყველაზე ნაკლები მაჩვენებელი ფიქსირდება, მაგრამ ეს თვითდამშვიდების უფლებას არ გვაძლევს. აღნიშნული კამპანიის ფარგლებში, ოზურგეთის მუნიციპალიტეტის გენდერული თანასწორობის საბჭოს ეგიდით, დაგეგმილია, საზოგადოების ინფორმირებულობის მიზნით, საინფორმაციო ღონისძიებების გახორციელება _ ეს იქნება მოსახლეობასთან შეხვედრები თუ ახალგაზრდობის მობილიზება, ქუჩის კამპანიის გამართვა, ასევე, თანამშრომლობა სამოქალაქო სექტორის წარმომადგენლებთან, დაგეგმილი ღონისძიებების გახორციელებაში. სოციალურ ქსელში მოინიშნა სიმბოლო _ ნარინჯისფერი ბაფთა, _ თქვა ლელა საჯაიამ.
საკრებულოს 9-საკითხიანი დღის წესრიგი დეპუტატებს საკრებულოს თავმჯდომარემ, დავით დარჩიამ გააცნო.
საკრებულოს დეპუტატების და სხდომის მონაწილეთა მთავარი ინტერესი და ყურადღება მიეპყრო საკითხს: “ოზურგეთის მუნიციპალიტეტის 2018 წლის ბიუჯეტის დამტკიცების შესახებ”, ოზურგეთის მუნიციპალიტეტის საკრებულოს 2018 წლის 12 იანვრის დადგენილებაში ცვლილებების და დამატებების შეტანის თაობაზე”.
საფინანსო-საბიუჯეტო სამსახურის უფროსმა, გია მამაკაიშვილმა ისაუბრა ცვლილებებზე. მან თქვა, რომ შემოსავლების და გადასახდელების ნაწილში ცვლილება 1 653 686,77 ლარით იგეგმება. სპეციალური ტრანსფერი _ ერთი მილიონი ლარი, საქართველოს მთავრობის განკარგულებით, მუნიციპალიტეტს სტიქიის შედეგების სალიკვიდაციოდ გამოეყო. მან, ასევე, განმარტა, რომ კაპიტალური გრანტი 263 086,77 ლარი ოზურგეთის მუნიციპალიტეტის სოფლებში _ ნასაკირალში, ნარუჯაში, ბახვსა და მაკვანეთში საჯარო სკოლების სარეაბილიტაციო სამუშაოების შესრულებას მოხმარდება.
“ნაციონალი” დეპუტატი შალვა თავდიშვილი დაინტერესდა, ვისთან შეთანხმებით გადაწყდა აღნიშნულ სკოლებში სარეაბილიტაციო სამუშაოების ჩატარება და მისთვის გამოსაყოფი თანხის ოდენობა. მას უპასუხეს, რომ ყოველივე განათლების სამინისტროსა და საგანმანათლებლო რესურსცენტრის ურთიერთშეთანხმების საფუძველზე მოხდა.
გია მამაკაიშვილმა დაასახელა კონკრეტული ციფრები, თუ რომელი მიმართულებით, რა რაოდენობის ხდება ამა თუ იმ სფეროს დაფინანსების ზრდა და განმარტა ამ საჭიროებების მიზნები და მიზეზები _ კერძოდ, 34 000 ლარით მოხდა სახელმწიფო შრომის ანაზღაურების ზრდა, ახალი ფრაქციების შექმნიდან გამომდინარე; 6 000 ლარით _ მუნიციპალური ტრანსპორტის სუბსიდირება; 10 000 ლარი გამოიყო შიდა ქსელის წყალსადენის სამუშაოების შესრულებისთვის; დამატებითი სუბსიდირება _ 200 000 ლარი მიიმართება სკოლამდელი აღზრდის მიმართულებით, რაც ძირითადად, ბავშვთა კვების გაზრდისთვის იქნება გათვალისწინებული და ამ თანხაში არ შედის ფინანსები საახალწლო საჩუქრებისთვის.
საკრებულოს წევრები და სხდომის ყველა მონაწილე ოვაციით შეხვდნენ მამაკაიშვილის მიერ, ზოგადი განათლების ხელშეწყობის მიმართულებით, 100%-იანი გრანტის მფლობელი მოსწავლეებისთვის გათვალისწინებული ფულადი ჯილდოს თემას:
_ თერთმეტი ასპროცენტიანი გრანტის მფლობელი მოსწავლე გვყავდა წელს, რაც არის სასიამოვნო რეალობა და როცა ბიუჯეტს ვქმნიდით, დასაწყისში, წინა წლების პრაქტიკიდან გამომდინარე, არ იყო გათვალისწინებული, თუ ამდენი წარმატებული მოსწავლე გვეყოლებოდა. ამიტომ, ამ ეტაპზე, ექვს მოსწავლეს, თითოეულს, გადაეცა 3 000 ლარი, ვისაც უფრო გადაუდებლად ესაჭიროებოდა, დანარჩენებს კი მომავალში გადაეცემათ. ასევე, 1 000-1 000 ლარი გადაეცემათ 2017 წელს ქალაქ ოზურგეთის სკოლების კურსდამთავრებულ 6 მოსწავლეს, რომლებმაც, ასევე, 100%-იანი გრანტი მიიღეს და ორი მუნიციპალიტეტის შეერთების შემდეგ, ისინი დაჯილდოვდნენ იმ წესის გათვალისწინებით, რაც ქალაქ ოზურგეთის საკრებულოს მიერ იყო გათვალისწინებული, _ თქვა მამაკაიშვილმა და განმარტა, ამ მოსწავლეებს რომ გული არ დაწყდეთ, ერთი ლამაზი ღონისძიება აუცილებლად გაკეთდება ფულადი ჯილდოს გადასაცემად.
10 000 ლარით გაიზარდა სპორტსმენთა სუბსიდირება, ვინც საერთაშორისო, ევროპულ თუ ქვეყნის მასშტაბით გამართულ ტურნირებზე მუნიციპალიტეტი ასახელეს.
გია მამაკაიშვილმა ხაზგასმით აღნიშნა, რომ ლეიკემიისა და ონკოლოგიურ დაავადების მუხლის 30 000 ლარით ზრდა აუცილებლობამ გამოიწვია:
_ სამწუხაროდ, დიდია დაავადებულთა რიცხვი და დავდექით არასასიამოვნო რეალობის წინაშე, _ თქვა მან.
მამაკაიშვილმა დადებითი პასუხი წარმოადგინა დეპუტატ ლელა საჯაიას ინიციატივაზე, კიდევ ერთი ახალი პროგრამის შესაქმნელად მუნიციპალიტეტის ვებგვერდზე, სადაც უსინათლოები ხმოვანი სიგნალით მიიღებენ მათთვის სასურველ ინფორმაციას.
თავის მხრივ, ლელა საჯაიამ ისაუბრა ამ პროგრამის დიდ სიკეთეზე:
_ უსინათლოები ვერ სარგებლობენ ვებგვერდით და სპეციალური მოწყობილობა ხმოვან ფორმატში გადაიყვანს წერილობით ინფორმაციებს, რაც საკმაო რაოდენობის მოქალაქეებს საშუალებას მისცემს, ეზიარონ ნებისმიერ სიახლეს.
გია მამაკაიშვილმა ბოლოს საკრებულოს აპარატისთვის ვიდეოკამერის შეძენის შესახებ ისაუბრა, რის შესახებაც თხოვნით იყო შესული ნანა თავდუმაძე. მისი თქმით, წელს ვერ ესწრება თანხის გამოყოფა, რაც სამომავლოდ მოხერხდება. დარბაზში მიკროფონის მოთხოვნის შესახებაც გაისმა, რაზეც “გურია ნიუსი” არა ერთხელ წერდა.
გია მამაკაიშვილმა აღნიშნა, რომ დარბაზი, სადაც ახლა ვიმყოფებით, ნამდვილად ითხოვს ინტერიერის შეცვლას, განახლებას და ამ ნაბიჯის გადასადგმელად უახლოესი მომავალი დააანონსა.
ოზურგეთი მუნიციპალიტეტის საკრებულოს აპარატის ანგარიში აპარატის უფროსმა ნანა თავდუმაძემ წარმოადგინა. მან ისაუბრა ინოვაციური ტექნოლოგიების გამოყენების შედეგად შექმნილ მოდელებზე, რომლებმაც საკრებულოს საქმიანობის გამჭვირვალობას, ანგარიშვალდებულებას და მოქალაქეთა ჩართულობის გააქტიურებას შეუწყო ხელი. მან ხაზგასმით გამოყო საკრებულოს თავმჯდომარის დავით დარჩიას და საკრებულოს თითოეული წევრის, როგორც მაღალკვალიფიციური საჯარო მოხელეების როლი იმ შედეგში, რითაც ოზურგეთის მუნიციპალიტეტის საკრებულო გამორჩეულია.
ნანა თავდუმაძემ ყურადღება გაამახვილა ოზურგეთის მუნიციპალიტეტში დანერგილი ელექტრონული მმართველობის, მოქალაქეთა ჩართულობის მექანიზმზე, “ღია მმართველობა-პარტნიორობის” ფარგლებში შესრულებულ ვალდებულებათა შესახებ და თქვა, რომ ოზურგეთის მუნიციპალიტეტის მიღწევებზე ისაუბრა ახლახან ქალაქ ვენაში ჩატარებულ ევროპის უშიშროებისა და თანამშრომლობის ორგანიზაციის, ეკონომიკური თანამშრომლობის და განვითარების ორგანიზაციის და ანტიკორუფციული ქსელის, აღმოსავლეთ ევროპისა და ცენტრალური აზიისთვის, ორგანიზებით ჩატარებულ სემინარზე, საერთაშორისო ექსპერტებთან შეხვედრისას.
საკრებულოს წევრთა მიერ, აპარატის მუშაობა დადებითად შეფასდა.
