31 მარტს, ოზურგეთის მუნიციპალიტეტის საკრებულოს რიგგარეშე სხდომა შედგა.
დღის წესრიგით გათვალისწინებული ხუთი საკითხი საკრებულოს წევრებს საკრებულოს თავმჯდომარე დავით დარჩიამ გააცნო.
ოპოზიციამ, კონკრეტულად კი დეპუტატმა “ნაციონალური მოძრაობიდან”, თათია ნიკოლაშვილმა ითხოვა, ორი წუთით მოესმინათ მისთვის. ის საუბრობდა გზების მოწესრიგებაზე, ასევე, მოსახლეობის გასაჭირსა და უმუშევრობაზე, რომელიც, მისივე თქმით, არ იყო დღის წესრიგით გათვალისწინებული. თუმცა, მას რეგლამენტის დაცვისკენ მოუწოდა თავმჯდომარემ და სიტყვა არ ათქმევინეს.
ნიკოლაშვილმა მოიმარჯვა მეგაფონი, რომელიც საკრებულოს სხდომაზე ჰქონდა მოტანილი.
_ რაკი სხვა გზა არ არის, ასე უნდა მოგმართოთ, სხვანაირად ვერ გაგაგონებთ, _ თქვა მან, რასაც მოჰყვა სასწრაფო რეაქცია “ქართული ოცნების” დეპუტატებისგან: “ომის პარტია ხართ”, “შენზე დიდი ხმა მაქვს”, დაჯექი მანდ”, “მეხუთე კოლონა”… და ასე შემდეგ…
ნიკოლაშვილს თანაპარტიელი დავით მჟავანაძე შეეშველა. ის საკრებულოს თავმჯდომარის მოადგილეს, ლავრენტი ბიგვავას დაუპირისპირდა და მას ცრუ დამსმენი უწოდა (როგორც გახსოვთ, ახალი მოწვევის საკრებულოს პირველ სხდომაზე მჟავანაძე დააკავეს და ფოთის იზოლატორში იყო განთავსებული. ავტ.) ბიგვავამ მჟავანაძეს მოსთხოვა სასამართლოს გადაწყვეტილების გამოქვეყნება.
_ რა გადაწყვეტილება გინდა? სასამართლომ გამამართლა ზუსტად. არ იცი, რომ ცრუ დამსმენი ხარ? _ ყვიროდა მჟავანაძე.
ერთმანეთის ლანძღვა კარგა ხანს გაგრძელდა. შემდეგ კი, მჟავანაძემ განაცხადა, პროტესტის ნიშნად, სხდომას ვტოვებთო და დარბაზიდან გავიდნენ. დავით დარჩიამ მიადევნა _ “ძალიან კარგს იზამთ, თუ საერთოდ არ დაბრუნდებით”.
შემდეგ მერის მოადგილემ ნათია გოლიაძემ წარმოადგინა საკითხი, 2022 წლის ბიუჯეტით გათვალისწინებული ჯანმრთელობის დაცვის და სოციალური დახმარების გაცემისა და მიღების წესის დამტკიცების შესახებ.
გოლიაძემ ისაუბრა აღნიშნულ წესში შეტანილი ცვლილებების შესახებ, რომელიც კონკრეტულ პროგრამებს შეეხო. მან ჩამოთვალა ჯანმრთელობის დაცვის დახმარების სახეები, რასაც ბიუჯეტი ფულადი დახმარების სახით ითვალისწინებს:
ესენია, მოქალაქეთა სამედიცინო დახმარება, თირკმლის უკმარისობით დაავადებულ პირთა დახმარება, გადაუდებელი და არაპროგრამული რეფერალური სამედიცინო მომსახურების თანადაფინანსება და ძვირადღირებული კვლევის ერთჯერადი დაფინანსება.
ნათია გოლიაძემ ვრცლად ისაუბრა თითოეული მუხლის ირგვლივ. საკრებულომ კი ეს ნორმატიული აქტი მიიღო.
საკრებულოს წევრმა (პარტია “საქართველოსთვის”) ალეკო ბურჭულაძემ ითხოვა, მისთვის რამდენიმე წუთი დაეთმოთ და მოესმინათ.
ბურჭულაძემ ოზურგეთის მოსახლეობისთვის ერთ-ერთ ყველაზე მტკივნეულ და გადაუჭრელ პრობლემაზე _ საკანალიზაციო სისტემის წლობით მოუგვარებელ საკითხზე ილაპარაკა. თუმცა, მანამდე აღნიშნა, რომ მუნიციპალიტეტის მერიამ გააჟღერა ინფორმაცია სამუშაოების შესახებ, რომ რიგ სოფლებში და ქალაქის ტერიტორიაზე სასმელი წყლის გამოყვანისა და მიწოდებისთვის, დამატებით 7,5 მილიონი ლარი დაიხარჯება.
_ წყალმომარაგების სისტემის რეაბილიტაცია 2024 წლისთვის დასრულდება და ალბათ, გვექნება 24-საათიანი წყალმომარაგება. ალბათო, იმიტომ ვამბობ, რომ ბოლო 15 წლის მანძილზე დაიხარჯა “არა ერთი 7, 5 მილიონი” და წყალი მაინც გრაფიკით მოგვეწოდება, _ თქვა მან და თქვა, რომ ოზურგეთის უფრო დიდი და მწვავე პრობლემაა, ქალაქის საკანალიზაციო სისტემის გარეშე ყოფნა:
_ ეს ამბავი ახალი არავისთვისაა და აქედან გამომდინარე, მოგახსენებთ ძალიან მოკლედ. ოზურგეთის ცენტრალური საკანალიზაციო ქსელი ტერიტორიულად ფარავს დასახლებული ტერიტორიის მხოლოდ ერთ მესამედს. ქალაქში მცხოვრები 7 083 ოჯახიდან, ქსელში ჩართულია 3 298 ოჯახი. საკანალიზაციო მილგაყვანილობის გარეშეა დარჩენილი ქალაქის განაპირა ქუჩები. სავალალო მდგომარეობაშია მილგაყვანილობა ქალაქის ცენტრალურ ქუჩებშიც. დაზიანებულია მილები და საკანალიზაციო ჭები, _ განაცხადა მან და მოიყვანა მაგალითები, თუ როგორ ამოდის სხვადასხვა ნარჩენები, ფეკალიები ქუჩების სავალ ნაწილზე.
უფრო მეტიც, საკრებულოს წევრმა ისაუბრა ქუჩებზე, სადაც არ არის მილგაყვანილობა, მოსახლეობის მხრიდან საყოფაცხოვრებოდ გამოყენებული წყალი მიშვებულია სანიაღვრე არხებში, რაც ქმნის ანტისანიტარიას და გაუსაძლის მდგომარეობას, განსაკუთრებით, ზაფხულში.
_ დამატებით უნდა აღინიშნოს, რომ არ არსებობს გამწმენდი ნაგებობა და საკანალიზაციო ნარჩენები ჩაედინება მდინარე ბჟუჟში რამდენიმე ლოკაციაზე. არსებული შედეგებით გამოწვეული ეკოლოგიური პრობლემა ზრდის ანტისანიტარიის გავრცელების რისკს და საფრთხეს უქმნის მოსახლეობას, _ განაცხადა ბურჭულაძემ და თქვა, რომ ამ პრობლემის გადაჭრა დიდ თანხებთან არის დაკავშირებული, თუმცა, უნდა გამოიძებნოს სერიოზული ფინანსური მხარდაჭერა.
მისი თქმით, პირველ ეტაპზე აუცილებელია, შეიქმნას სამუშაო ჯგუფი მუნიციპალური ორგანოების და შესაბამისი ექსპერტების ჩართულობით, რომელიც შეისწავლის პრობლემას.
მეორე ეტაპზე საჭიროა გახორციელდეს გამწმენდი ნაგებობის და წყალკანალიზაციის ქსელის შესაბამისი საპროექტო სამუშაოები და შემდეგ შესაძლებელი იქნება, ვიზრუნოთ სამშენებლო სარეაბილიტაციო სამუშაოებზე. ეს არ მოხდება მოკლე დროში, მაგრამ მიუღწეველი არაფერია, _ განაცხადა ბურჭულაძემ.
ბურჭულაძის გამოსვლას თავისებური შეფასება მოაყოლა საკრებულოს თავმჯდომარის მოადგილემ ლავრენტი ბიგვავამ: “აბსოლუტურად სოლიდარული ვარ თქვენ მიმართ. თუმცა, საყვედური უნდა ვთქვა. რეგლამენტის დარღვევის უფლებას არ მივცემთ ჩვენ უმრავლესობის წევრებსაც კი. პოლიტიკური კეკლუცობის მიღმა უნდა ვისაუბროთ. ჩვენ ერთი მდინარის სხვადასხვა მხარეს ვდგავართ, _ თქვა მან ბურჭულაძის მისამართით.
_ პოლიტიკურ კეკლუცობას” ვერ მივიღებ შენიშვნის სახით. 30 წამი ვითხოვე, დალოცვილებო! გთხოვეთ და დღის წესრიგში ვერ მოვახვედრე საკითხი, _ პასუხი უმალვე დაუბრუნა ბურჭულაძემ.
ლავრენტი ბიგვავამ სცადა განემარტა, რომ ალეკო ბურჭულაძის მისამართით არ უთქვამს ეს. თუმცა, არც აუხსნია, გახარიას პარტიის წევრის გამოსვლის შემდეგ, რატომ გამოიყენა სიტყვა “პოლიტიკური კეკლუცობა”.
“ხომ კარგია საკრებულო ნაირ-ნაირ საკითხებით და რაც მთავარია, ტრადიციული ჩხუბითა და ყვირილით”, _ ხუმრობდა ზოგი დეპუტატი შესვენებისას.
საკრებულოს რიგგარეშე სხდომაზე მსჯელობა გაიმართა სახელმწიფო აუდიტის სამსახურის მიერ 2022 წელს დამტკიცებული ოზურგეთის მუნიციპალიტეტის 2019-2020 წლების საქმიანობის შესაბამისობის აუდიტის ანგარიშის ირგვლივაც.
ამ საკითხს საკრებულოს სხდომაზე განსაკუთრებული ყურადღება დაუთმეს.
საკითხი, საკრებულოს თავმჯდომარის მოადგილემ ლავრენტი ბიგვავამ ყველაზე ვრცლად წარმოადგინა.
მან განიხილა 2019-2020 წლების საქმიანობის აუდიტის ანგარიში და თქვა, რომ ტოტალური დარღვევებს აქვს ადგილი, მსგავსი ანგარიში ნაკლებად უნახავს. საუბრისას მან არაერთხელ აღნიშნა, რომ კოლეგებს ყურადღება მიექციათ საკითხებისთვის, რომლებიც, მისივე თქმით, “კორუფციული გარიგებების რისკის შემცველია”, ხოლო ა(ა)იპ ორგანიზაციებში დასაქმების საკითხს, კურიოზული ფაქტი უწოდა. კერძოდ, მან გაიკვირვა ამ ორგანიზაციებში დასაქმებულთა კონტიგენტი, რომლებიც სამსახურში არ დადიან, ხელფასს ისე იღებენ და აუდიტმა ამის შესახებ სერიოზული მოკვლევა გააკეთა.
ბატონ ლავრენტის, რატომღაც არ უკვირს, როცა გასული ოთხი წლის მანძილზე, წინა საარჩევნო პერიოდში, საკრებულოს თავმჯდომარის, დავით დარჩიას თანაშემწედ “გაფორმებული” პირი, სამსახურში არც არასდროს მოსულა, ისე იღებდა ხელფასს!
აუდიტის ანგარიშის ირგვლივ ისაუბრეს კომისიების ხელმძღვანელებმა: დავით ჭაკნელიძემ, გელა ჩავლეშვილმა, პაატა კიღურაძემ, ქეთევან ხომერიკმა, ბექა თოიძემ; ფრაქციის თავმჯდომარემ, მარიკა ჩხიკვიშვილმა. თითოეული მათგანის გამოსვლაში ჭარბობდა მოწოდება, რომ ყოფილი მერის მიმართ, სამართლებრივი პასუხისმგებლობის საკითხი უნდა დადგეს”.
რაკი ყოფილი მერის, კონსტანტინე შარაშენიძის მისამართით ყველაზე მეტი ისაუბრეს საკრებულოს ამ სხდომაზე და მიიჩნევდნენ, რომ მისი სამართლებრივი პასუხისმგებლობის საკითხი უნდა დადგეს, მივმართეთ ყოფილ მერს, გაეკეთებინა კომენტარი აღნიშნულის თაობაზე:
_ რა კომენტარს მთხოვთ? მაგ საკრებულომ ანალოგიურ ფორმატში განიხილოს 2016-2017 წლის აუდიტის ანგარიში. გახსოვთ ვინმეს, რომ განიხილეს? აი, მაშინ დავიჯერებ, რომ ეს დაკვეთა არაა და ისინი მართლა ქვეყანაზე და ოზურგეთზე ფიქრობენ! მე ვაკეთე საქმე და ჩემი გუნდით ჩვენს გაკეთებულზე ვაგებ პასუხს! ახლა კი მეტი არაფერი მკითხოთ. არ მცალია, ფართობში სამუშაოდ მივდივარ! _ გვითხრა შარაშენიძემ.
საკრებულომ, ასევე, საჯარო ადმინისტრაციული წარმოება დაიწყო ოზურგეთის მუნიციპალიტეტში მეწარმეობის განვითარების ხელშეწყობის პროგრამის გახორციელების შესახებ. საკითხი საკრებულოს წევრებს, მუნიციპალიტეტის მერის პირველმა მოადგილემ, გიორგი ღურჯუმელიძემ გააცნო.
