როგორც წესი, კანონით გათვალისწინებულ ვადებში, ლანჩხუთის მერიამ მუნიციპალიტეტის საკრებულოს 2023 წლის ბიუჯეტის პროექტი წარუდგინა.
რეგლამენტის თანახმად, წლის მთავარი საფინანსო დოკუმენტის პროექტს საკრებულო ფრაქციებსა და დარგობრივ კომისიებში განიხილავს და შესაბამისი შენიშვნებით უკან დააბრუნებს. შემდგომ უკვე მერია იმუშავებს ამ შენიშვნების გათვალისწინებაზე და ხელმეორედ წარუდგენს დოკუმენტის შესწორებულ ვარიანტს წარმომადგენლობით ორგანოს და დიდი ალბათობით, დეკემბრის მიწურულს, საკრებულოს წევრების მხარდაჭერის შემთხვევაში, დამტკიცდება კიდეც წლის მთავარი საფინანსო დოკუმენტი.
საკრებულოში შესული 2023 წლის ბიუჯეტის პროექტის განმარტებითი ბარათის მიხედვით, 2023 წლის პროგნოზით მუნიციპალიტეტის ბიუჯეტის შემოსავლები ნომინალურ გამოხატულებაში 14330,0 ათას ლარს შეადგენს, რაც ამავე განმარტებების მიხედვით 2022 წლის გეგმიურ მაჩვენებელს 6,9%-ით აღემატება.
მიმდინარე წელთან შედარებით, 19%-ით გაზრდილია დამატებითი ღირებულების გადასახადის საპროგნოზო მაჩვენებელიც. მერიის განმარტებით, აღნიშნული მოცულობით ზრდა გამოწვეულია მიმდინარე წელს დაგეგმილზე მაღალი ეკონომიკური ზრდის შედეგად მოსალოდნელი გადაჭარბების და მომდევნო წელს ეკონომიკის ნომინალური ზრდის ფისკალური ეფექტებით.
წარმოდგენილ ბიუჯეტის პროექტში 2022 წელთან შედარებით 200,0 ათასი ლარითაა გაზრდილი ქონების გადასახადის საპროგნოზო მაჩვენებელიც. როგორც მერიის საფინანსო სამსახურის მიერ წარმოდგენილ განმარტებით ბარათში ვკითხულობთ, აღნიშნული გამოწვეულია საწარმოთა ქონების გადასახადის გაზრდით.
მერიის გათვლით, 2023 წელს გრანტების სახით დაგეგმილი მაჩვენებლები განისაზღვრება 270,0 ათასი ლარით, რაც 2022 წლის გეგმიურ მაჩვენებელს 25,0 ათასი ლარით აღემატება.
ბიუჯეტის პროექტის მიხედვით, მიმდინარე წლის მსგავსად შემოსავლები საკუთრებიდან განსაზღვრულია 110,0 ათასი ლარის ოდენობით.
წარმოდგენილ დოკუმენტში შემოსავლები საქონლისა და მომსახურების რეალიზაციიდან განსაზღვრულია 42,0 ათასი ლარით, რაც შესაბამისობაშია 2022 წლის საპროგნოზო მაჩვენებელთან.
მერიის საფინანსო სამსახურის მიერ წარმოდგენილი განმარტებებით, მიმდინარე წლის გეგმიურ მაჩვენებელთან შედარებით, 25%-ით შემცირებულია შემოსავლები სანქციების, ჯარიმებისა და საურავებიდან და ის 1850,0 ათასი ლარითაა განსაზღვრული. როგორც განმარტავენ, აღნიშნული საპროგნოზო მაჩვენებელი გათვლილია 2022 წლის მოსალოდნელი შესრულების გათვალისწინებით.
მერიის მიერ საკრებულოში წარდგენილი დოკუმენტის მიხედვით, მომავალი წლის ბიუჯეტი, ჯამში, 19 მილიონითაა განსაზღვრული, რაც 2002 წლის დამტკიცებულ გეგმას 3211, 7 ათასი ლარით აღემატება. როგორც განმარტავენ, აღნიშნული ზრდა გამოწვეული მომსახურების ხარჯების ზრდით.
რაც შეეხება ბიუჯეტით გათვალისწინებულ პრიორიტეტებს, წარმოდგენილი დოკუმენტის მიხედვით, ინფრასტრუქტურის კუთხით მომავალ წელს 4342,9 ათასი ლარის დახარჯვაა გათვალისწინებული. აქედან 2440,0 ათასი ლარი საგზაო ინფრასტრუქტურის მოწესრიგებას უნდა მოხმარდეს. 160,3 ათასი ლარი წყლის სისტემების განვითარებისთვისაა დაგეგმილი. გარე განათებისთვის _ 769,5 ათასი ლარი, კეთილმოწყობების ღონისძიებებისთვის კი 150,0 ათასი ლარი. პრიორიტეტთა ჩამონათვალშია მუნიციპალური ტრანსპორტის განვითარებაც და საამისოდ დოკუმენტში 23, 1 ათასი ლარია გაწერილი.
პრიორიტეტთა ნუსხაშია მოხვედრილი ოჯახების სოციალურ-ეკონომიკური გაძლიერების მხარდაჭერის პროგრამაც, რისთვისაც ბიუჯეტიდან, წარმოდგენილი პროექტის მიხედვით, 100,0 ათასი ლარი უნდა გაიხარჯოს.
დასუფთავებისა და გარემოს დაცვას 2023 წელს ბიუჯეტიდან 2324,0 ათასი ლარი უნდა მოხმარდეს.
პრიორიტეტთა ჩამონათვალშია განათლებაც, საამისოდ კი 3248,6 ათასი ლარია გაწერილი საფინანსო დოკუმენტის პროექტში. აქედან სკოლამდელი განათლებისთვის _ 3217,6 ათასი ლარი, ხოლო ამ კუთხით დაგეგმილი ღონისძიებებისთვის- 31,0 ათასი ლარი.
კულტურა, ახალგაზრდობა და სპორტი, რომელიც ასევე პრიორიტეტთა ნუსხაშია, ბიუჯეტი 3027,4 ათასი ლარის გახარჯვას გეგმავს. აქედან, სპორტის განვითარებას 1359,6 ათასი ლარი უნდა მოხმარდეს, კულტურის განვითარების ხელშეწყობას _ 1647,8 ათასი ლარი, ხოლო ახალგაზრდული პროგრამებისთვის 20,0 ათასი ლარია გაწერილი ბიუჯეტის პროექტში.
საზოგადოებრივი ჯანმრთელობისა და უსაფრთხო გარემოს უზრუნველსაყოფად, რაც პრიორიტეტთა ჩამონათვალში შედის, ბიუჯეტმა 193,1 ათასი ლარი უნდა გაიღოს.
2023 წლის მთავარი საფინანსო დოკუმენტის პროექტის მიხედვით, მუნიციპალიტეტის მმართველობის დაფინანსებისთვის 5002,0 ათასი ლარია დაგეგმილი. აქედან, საკრებულოს დაფინანსებისთვის _ 1287,0 ათასი ლარი, მერია _ 3355,0 ათასი ლარი, სარეზერვო ფონდი- 70,0 ათასი ლარი, სამხედრო აღრიცხვის და გაწვევის სამსახური _ 180,0 ათასი ლარი. 2023 წელს მუნიციპალური განვითარების ფონდისთვის დასაფარი თანხა და ვალის მომსახურება 90,0 ათას ლარს შეადგენს, საიდანაც 58,1 ათასი ლარი ძირია, 31,9 ათასი ლარი კი პროცენტი. 20,0 ათასი ლარი კი, წარმოდგენილ დოკუმენტში, წინა პერიოდში წარმოქმნილი ვალდებულებების დაფარვისა და სასამართლოს გადაწყვეტილებების აღსრულების ფინანსური უზრუნველყოფისთვისაა გაწერილი.
ავტორი
