პარტია “ლელომ” ჩოხატაურის საკრებულოს გადაწყვეტილება ჩოხატაურის ცენტრში მდებარე ნოდარ დუმბაძის სახელობის სკვერის საპრივატიზაციო ნუსხაში შეტანის შესახებ სასამართლოში გაასაჩივრა, _ ამის შესახებ “ლელოს” წევრმა მალხაზ ჩხიკვაძემ სოციალურ ქსელში დაწერა.
“დღეს, 28 სექტემბერს, სასამართლოში გავასაჩივრეთ დუმბაძის სახელობის სკვერისთვის სტატუსის შეცლისა და მის საპრივატიზაციო ნუსხაში შეტანის შესახებ ჩოხატაურის საკრებულოს განკარგულება…
სამართლებრივი გზით ვიბრძოლებთ, რომ გაუქმდეს ეს განკარგულება, რომელიც ეწინააღმდეგება როგორც ჩოხატაურელთა ინტერესებს, ასევე მოქმედ კანონმდებლობას...”, _ წერს ჩხიკვაძე.
შეგახსენებთ, რომ ჩოხატაურში, ნოდარ დუმბაძის სახელობის სკვერის ტერიტორია აუქციონზე იყიდება. ამ საკითხის შესახებ 29 აგვისტოს იყო მსჯელობა ჩოხატაურის საკრებულოში. სკვერში საქართველოს ბანკის ფილიალის აშენება იგეგმება. საკითხი სხდომაზე ვალერი ყაჭეიშვილმა წარადგინა.
ინფორმაციამ პოლიტიკურ წრეებსა თუ საზოგადოებაში პროტესტი გამოიწვია.
ჩოხატაურში განვითარებულ მოვლენებს პარლამენტის სხდომაზე მამუკა მდინარაძე გამოეხმაურა და განაცხადა, რომ სკვერის ნაწილის გაყიდვა და იქ რამის აშენება დაუშვებელია.
“სკვერში, ბაღში და ა.შ. შეიძლება აშენებული იქნას მხოლოდ საერთო სარგებლობის, საზოგადოებრივი და სახელმწიფო მნიშვნელობის შენობა. თემა ამით არის დახურული. ვერავინ იმ ადგილს ვერ გაყიდის. ცოტა გვიან გავიგეთ ჩვენ. დაუშვებელია რომ სკვერის ნაწილი გაიყიდოს. გავერკვიე გუშინ დეტალებში. ჩვენს მუნიციპალიტეტებს, საკრებულოებს, დღეიდან ყველას ვთხოვ კარგად დაიმახსოვრონ, ვინც არ უნდა იყოს და თქვენ როგორ გააპროტესტოთ ის ისწავლეთ, და როგორ უნდა მოიქცეს ყველა. სკვერის გაყიდვა იმისთვის რომ იქ რამე აშენდეს არის შეუძლებელი და ვერ გაიყიდება. ეს იქნება მაგალითი, რომ სკვერს ვერ მოაჭრი რაღაც ნაწილს და ვერ გაყიდი რომ იქ რაღაც აშენდეს”,_ განაცხადა მდინარაძემ.
