ოზურგეთის მუნიციპალიტეტის საკრებულოს 11 აგვისტოს სხდომაზე, რომელსაც საკრებულოს თავმჯდომარემ, დავით დარჩიამ ამ მოწვევის საკრებულოს ბოლო სხდომა უწოდა, ყველაზე მკვეთრი განცხადება, “ქართული ოცნების” დეპუტატმა ლელა საჯაიამ გააკეთა ოზურგეთის მუზეუმების შესახებ და მათ გაპარტახებული უწოდა.
“ჩვეულებრივი პროცედურული ამბავი იყო _ მუნიციპალიტეტის მერი უნდა ყოფილიყო დღეს აქ. გულისტკივილით უნდა აღვნიშნო, რომ, როცა მერი მიბრძანდება შვებულებაში, აუცილებელია, ისაუბროს გაკეთებულ საქმეებზე. რაც გაკეთებულია, ისიც პარტახდება… უყურადღებოდაა მიტოვებული არტემ ერქომაიშვილის სახლ-მუზეუმი მაკვანეთში, გაპარტახებულია, ასევე, ვარლამ სიმონიშვილის სახლ-მუზეუმი შემოქმედში, ოზურგეთის ისტორიული მუზეუმი კი, დღემდე არაა საზოგადოების სამსახურში. მერს უნდა ესაუბრა, მიზანმიმართულად ხდება ეს, თუ რაიმემ შეუშალა ხელი”, _ თქვა საჯაიამ და აღნიშნა, რომ ზემოთ ხსენებული მუზეუმების საქმე “ძალიან ცუდად არის”.
მკითხველთა დიდი ინტერესის გამო, “გურია ნიუსი” შეეცადა, ადგილზე გაცნობოდა ვითარებას და გადმოეცა რეალური მდგომარეობა ამ მუზეუმების შესახებ.
ოზურგეთის მუნიციპალიტეტის სოფელ მაკვანეთში, ერქომაიშვილების საგვარეულო სასაფლაოს ტერიტორიაზე (ტერიტორია ცნობილია “ნაკაშიძის გორის” სახელწოდებით), მუნიციპალიტეტის წინა ხელმძღვანელობის დროს აიგო სახლი, სადაც, როგორც მაშინ ამბობდნენ, სახელოვანი ლოტბარის არტემ ერქომაიშვილის სახლ-მუზეუმი უნდა განთავსებულიყო. მართლაც, საქართველო-ევროკავშირის ერთობლივი პროექტით, აქ აიგო ორსართულიანი შენობა.
პროექტის, როგორც გარეთა, ისე შიგა ვიზუალი, კარგია. თუმცა, ასე საგანგებოდ აგებულ შენობაში, არც მუზეუმია და საერთოდ, არც არაფერი განთავსებულა _ ის დღემდე უფუნქციოდაა. უფრო მეტიც, აქ სავალალო მდგომარეობაა.
შენობაზე, როგორც გარედან, ისე შიდა კედლებზე დაწყებულია ბათქაშის ჩამოცვენა. შენობის ყველა კარი, როგორც პირველ, ისე მეორე სართულზე ღიაა და მხოლოდ თხების ფეკალიები ყრია.
როგორც ადგილობრივები ამბობენ, სახლი უხარისხო მასალით აშენდა და რამდენიმე თვეში ბათქაში ნაწილობრივ ჩამოცვივდა. ადგილობრივთა თქმითვე, ადგილზე მისულ ანზორ ერქომაიშვილს ეს ამბავი არ მოეწონა და ძალიან გულნატკენი დარჩა.
სამშენებლო სამუშაოებს ადგილობრივი მკვიდრი, ფილიპე ცელაძე ხელმძღვანელობდა:
_ პროექტი კარგი იყო. სამშენებლო მასალა, რაც მოგვიტანეს, ის გამოვიყენე. მე უახლოეს პერიოდში გესტუმრებით და დეტალურად გიამბობთ ამ მშენებლობის შესახებ და ზოგადად, ყველაფერზე, რაც ამ სახლის აშენებას ეხება, _ გვითხრა მან.
“არტემ ერქომაიშვილის მუზეუმი იქნებაო და აშენებისთანავე ინგრევა, თხის ცურცლითაა სავსე”, _ წუხან ადგილობრივები.
_ მენანება ამხელა შენობა. ეტყობა, მასალის ხარისხიც კარგი არ იყო. შიგ არაფერი განთავსებულა. ეკალ-ბარდი რამდენჯერ გავცელეთ. ჩემმა მეუღლემ ყვავილები და მარადმწვანე მცენარეები დარგო, მაგრამ რად გინდა _ გადაუარა ისევ ბარდმა. ძალიან გული მწყდება. შინაგანად ვერ ვისვენებ, რომ ასეთი შენობა ნადგურდება. როგორ შეიძლება ასე, ამხელა თანხის წყალში გადაყრა?! _ გვითხრა ადგილობრივმა მკვიდრმა მერაბ ბაბილოძემ, რომელიც აღნიშნულ სახლთან ახლოს ცხოვრობს და საკუთარი ინიციატივით პატრონობს ამ გარემოს.
რაც შეეხება სოფელ შემოქმედის ცენტრში, ასევე, ძალიან კარგი პროექტით აშენებულ სახლს (რომელიც იმავე პერიოდში აიგო), აქ უნდა განთავსებულიყო ცნობილი სახალხო მომღერლის ვარლამ სიმონიშვილის სახლ-მუზეუმი.
გაცილებით დიდი ხნით ადრე, 1984 წელს, ვარლამ სიმონიშვილის დაბადებიდან 100 წლისთავთან დაკავშირებით, შემოქმედში, ფატარშის უბანში, გაიხსნა მომღერლის სახლ-მუზეუმი. თუმცა, შემდგომ, არეულობის წლებში, იქ ბევრი ექსპონატი დაიკარგა და განადგურდა, ეზო-მიდამო კი გავერანდა. როგორც მოსახლეობის, ისე სპეციალისტთა დიდი ნაწილის აზრით, ქართული ხალხური სიმღერის და საკრავიანი მუსიკის დიდოსტატის სახლ-მუზეუმის გახსნა სწორედ არსებულ სახლშია მიზანშეწონილი.
_ მე არ ვიცი, რა დანიშნულებით აშენდა ეს ლამაზი, კოპწია შენობა შემოქმედის ცენტრში. სავსებით დასაშვებია, რომ მას, სიმბოლური დატვირთვით, ეწოდოს ვარლამ სიმონიშვილის სახელობის მინიატურული მუზეუმი. თუმცა, ოფიციალურად, როცა ნამდვილად ჯერ კიდევ არსებობს ამ დიდი ხელოვანის სახლი და ეზო-კარი, ცხოვრობენ მემკვიდრეები და სახლში გამოყოფილია ერთი ოთახი, სამუზეუმო ექსპონატებით, ყველანაირად ჯობს, იქ გაიხსნას და ამაზე იზრუნოს ყველამ, როგორც ხელისუფლებამ, ისე _ ხალხმა. ვიმეორებ, სიმბოლური დატვირთვა თუ ექნება სოფლის ცენტრში აშენებულ სახლს და უწოდებენ მის სახელს, არც ამაშია ცუდი არაფერი. ასევე, შეიძლება ეწოდოს მაკვანეთში აშენებულ სახლსაც. ერთი კი ძალიან მაინტერესებს _ ეს დეპუტატები, რომლებიც საარჩევნო პერიოდის მიწურულს გაცხარდნენ, საინტერესოა, რომელიმე თუ არის ნამყოფი რომელიმე მუზეუმში, თუ იკითხეს ამბავი?! მე სულ იქ ვარ და არ მინახავს, რომელიმე დაინტერესებულიყოს იმ პრობლემით, რაც საკრებულოს სხდომაზე გააჟღერეს. მთავარი კი ის არის, რომ, საბედნიეროდ, არსებობს ამ კაცის ნამდვილი სახლ-კარი და მისი სახელობის მუზეუმი ოფიციალურად უნდა გაიხსნას იქ, _ ამბობს “გურია ნიუსთან” ისტორიკოსი მანანა ლომაძე, რომელიც თითქმის ნახევარი საუკუნეა, ოზურგეთის ისტორიულ მუზეუმში მუშაობს.
მესამე და მთავარი, რაც საკრებულოს სხდომაზე “გაპარტახებულ სამეულში” მოიხსენია დეპუტატმა ლელა საჯაიამ, ოზურგეთის ისტორიული მუზეუმია.
“გურია ნიუსთან” საუბრობს ოზურგეთის მუნიციპალიტეტის სამუზეუმო გაერთიანების დირექტორი, გოგა ტრაპაიძე:
_ აღნიშნულ შენობებს, შემოქმედსა და მაკვანეთში იმთავითვე სტატუსი არ მისცეს. რატომ, არ ვიცი. წესით, სტატუსი მერიამ უნდა მიანიჭოს და მერე ფოლკლორის ცენტრს გადაეცემოდა, თუ მუზეუმს, ორივე დასაშვებია, რაკი მომღერლების მუზეუმს არქმევდნენ. ამის შემდეგ კი მივხედავდით ჩვენც.
რაც შეეხება კონკრეტულად ოზურგეთის ისტორიულ მუზეუმს, შენობის რეაბილიტაცია, რაც ფირმა “კომფორტი 21”-მა ჩაატარა (ტენდერში გამარჯვების თანახმად), 2019 წლის ივნისში დაიწყო და 2020 წლის ივნისში დასრულდა. რემონტი კარგად ჩატარდა. რაც შეეხება ექსპოზიციის და შიდა ინტერიერის მოწყობას, ამის პროექტი 2021 წელს ოზურგეთის მუნიციპალიტეტის მერიამ შეისყიდა. როგორც ვიცი, პროექტის დაფინანსება მუნიციპალური განვითარების ფონდს უნდა მომხდარიყო და დღემდე არაა დაფინანსებული. რატომ, არ ცივი, _ გვითხრა ტრაპაიძემ.
მან გამოთქვა უკმაყოფილება, რომ დღემდე არ ფინანსდება ეს პროექტი:
“საექსპოზიციო ნაწილი მოთავსებულია მუყაოს ყუთებში და ყველაფერი შენახულია მუზეუმის ფონდში. მუზეუმს თუ გამოფენა არ ექნა, თან ისტორიულ მუზეუმს, რომელიც 1936 წელს არის დაარსებული, ფაქტობრივად, უმოქმედოა. კარგია, კარგად გარემონტებული დარბაზები, მთელი შენობა, მაგრამ უმთავრესი საექსპოზიციო ნაწილის გამოფენაა”, _ გვითხრა მან.
ოზურგეთის მუნიციპალიტეტის მოქმედი მერი და ამჯერად მერობის კანდიდატი, კონსტანტინე შარაშენიძე “გურია ნიუსთან” ასეთ კომენტარს აკეთებს:
“საინტერესოა, მე რას მაბრალებენ, თან საკრებულოს ბოლო სხდომაზე? კითხვა როგორ დასვან დეპუტატებმა, იციან? _ ჰკითხეთ მუზეუმის თანამშრომლებს, არის იქ რომელიმე დეპუტატი ნამყოფი იმ ამბის თუ პრობლემის საკითხავად, რის თაობაზეც საკრებულოს სხდომაზე თავი მოიწონეს? 48 წლის ვარ და საქმის კეთებაში მითენდება და მიღამდება. ააგეს უფუნქციო შენობები შემოქმედსა და მაკვანეთში. ეს უკანასკნელი, სასაფლაოს ტერიტორიაზეა და პასუხს მე მთხოვენ? მაკვანეთში სასაფლაოზე გიტარას დაუკრავს ვინმე თუ რა დანიშნულებით ააგეს იქ? თუ არადა, მიენიჭებინათ ფუნქცია, კალამი და ფურცელი რომ არ დევს არც ერთგან…
შემოქმედში, ვარლამ სიმონიშვილის სახლ-მუზეუმი, ბუნებაში რაც არსებობდა, ისევ იქ არის. სადაც დაიბადა და გაიზარდა ეს გენიალური კაცი. სად დადგეს მინიატურული შენობა და რატომ? თუ დადგეს, ფუნქციაც მოეფიქრებინათ. მე ასეთ მშენებლობებს არ ვთაოსნობ.
რაც შეეხება ქალაქ ოზურგეთის ისტორიულ მუზეუმს, მუნიციპალური განვითარების ფონდის დახმარებით მოხდა მისი რეაბილიტაცია. გარემონტდა. შემდეგ ჩვენ მოვამზადეთ პროექტი ექსტერიერის და ინტერიერის მოსაწყობად. საექსპოზიციო ნაწილი ხომ უნდა განთავსდეს? საქართველოს პარლამენტი ჩავაყენეთ საქმის კურსში, რომ რეგფონდთან გაეწია შუამდგომლობა. თუმცა, დღემდე არ დაფინანსებულა. ეს არის სულ, რაც ამ სამივე, საჯაიას აზრით, “გაპარტახებულ მუზეუმებზე”, შემიძლია ვთქვა. აქვე დავაზუსტებ, რომ მუზეუმი მხოლოდ ოზურგეთშია და ჰქვია ოზურგეთის ისტორიული მუზეუმი. სამუზეუმო გაერთიანებას ჰყავს დირექტორი. იმ ორ შენობას _ შემოქმედსა და მაკვანეთის სასაფლაოზე კი, არც ფუნქცია აქვს და არც მუზეუმის სტატუსი მიუნიჭებია ვინმეს. თუ სურდათ, ვიმეორებ, მიენიჭებინათ. ეაქტიურათ დეპუტატებს… “_ გვითხრა შარაშენიძემ.
[sexy_author_bio]
