ოზურგეთის ცენტრალურ ქუჩებში (რომ არაფერი ვთქვათ გარეუბნებზე), გზების მდგომარეობა საგანგაშოა. არ არის ქუჩა, სადაც ცალკეული მონაკვეთები უკიდურესად დაზიანებული არ იყოს. ორმოები, დახეთქილი თუ ამოყრილი ასფალტი, აქ ჩვეულბრივი მოვლენაა.
როგორც ქალაქის მცხოვრებლები და სამგზავრო თუ კერძო ტრანსპორტის მძღოლები საუბრობენ, ამ წლის ძალზე თოვლიანი ამინდების გამო, სტიქიური კვალი ღიად დაეტყო ქუჩებს. ბევრგან ავტომობილები ერთმანეთს გვერდს ძლივს უვლიან.
_ახლა, სამთავრობო ჯიპები ნაკლებად „იგრძნობენ“ ამ ორმოებს, მაგრამ ჩვენ კი დავანგრიეთ ეს ჩვენი მანქანები. პურის ფულს რომ ძლივს ვშოულობთ და ამ ავტომობილების იმედად ვართ. ადრე სოფლებში წასვლა გვეზარებოდა, ისეთი გზები იყო. ახლა უმეტესად სოფლების გზები მოწესრიგდა და ოზურგეთში გავლას ვუფრთხით. იქნებ, უშველონ რაიმე ამ გზებს, – გვეუბნებიან ოზურგეთელი ტაქსის მძღოლები, თან ირონიასაც არ იშურებენ.
„გურია ნიუსი“ არაერთ ქუჩაზე იმყოფებოდა. განსაკუთრებით ცუდი მდგომარეობაა სახოკიას, ერისთავის, გურიის ქუჩებზე.ზოგადად კი ყველა ქუჩაზეა ბევრი ორმო და დახეთქილი ასფალტი, რაც შეფერხების გარდა, ავარიულ სიტუაციასაც ქმნის.
ჩვენ ვესაუბრეთ ოზურგეთის მუნიციპალიტეტის მერიის ინფრასტრუქტურის სამსახურის უფროსს, თემურ გიორგაძეს. მან ასეთი კომენტარი გააკეთა:
_ვიცით, რომ ქალაქის ქუჩებში, როგორც ცენტრალურ, ისე გარეუბნებში, გზები დაზიანებულია. ამ პრობლემამ განსაკუთრებით დიდთოვლობის შემდეგ იჩინა თავი. ტრაქტორებით სასწრაფოდ ხდებოდა ქუჩების გაწმენდა. დაზიანებული ადგილები, ამ დროს, კიდევ უფრო დაზიანდა. რა თქმა უნდა, იგეგმება შესაბამისი სამუშაოების ჩატარება. უნდა მოხდეს ქალაქის ქუჩების გზების ორმული შეკეთება. გამოცხადებულია ელექტრონული ტენდერი, რომელიც ამ წლის 18 მარტს უნდა დასრულდეს, _ გვითხრა მან.
კითხვაზე, უფრო კონკრეტულად თუ დაასახელებდა რიცხვს, როდის დაიწყება აღდგენითი სამუშაოები თუ ორმული შეკეთება, რომ შეწუხებულ მოსახლეობას ინფორმაცია ჰქონდეს, გიორგაძემ გვითხრა, რომ ტენდერის დასრულების შემდეგ, კიდევ შესასრულებელია გარკვეული პროცედურები.
-მთავარია, ამ ყველაფრის შემდეგ, კარგი ამინდები დადგეს და სამუშაოების შესრულებას ხელს ვერაფერი შეუშლის, _ თქვა მან.
ავტორი: მარინა ჩიხლაძე
