დღეს სამტრედიის მუნიციპალიტეტის 34 საჯარო სკოლაში ახალი სასწავლო წლის მაუწყებელი ზარი დაირეკა.
ვინაიდან მართლმადიდებლური ეკლესია 14 სექტემბერს, ინდიქტიონის, ანუ ახალი წლის დაწყებას აღნიშნავს, სამტრედიის წმინდა ნაზარი ლეჟავას სახელობის მართლმადიდებლურ სკოლაში სწავლა გუშინ დაიწყო.
სამტრედიას დილიდანვე სტუმრობდა და სასწავლო დაწესებულების ადმინისტრაციას, მოსწავლეებს და მშობლებს ახალი სასწავლო წელი მიულოცა წმინდა ნაზარი ლეჟავას სახელობის მართლმადიდებლური სკოლის რექტორმა, მიტროპოლიტმა საბამ.
სკოლაში პარაკლისი ჩატარდა, მოხდა პირველკლასელთა საზეიმო მიღება და შეხვედრა პირველ მასწავლებელთან.
საქართველოს საპატრიარქოს დაქვემდებარებაში არსებული წმინდა ნაზარი ლეჟავას სახელობის მართლმადიდებლური სკოლა სამტრედიაში 2004 წლიდან ფუნქციონირებს. წელს სკოლაში 240 მოსწავლე ფიქსირდება, პირველ კლასში 15 ბავშვია ჩარიცხული.
სამტრედიის საგანმანათლებლო რესურსცენტრის უფროსის, თინათინ ხარძიანის ინფორმაციით, შესაბამისი კონტიგენტის არარსებობის გამო, წელს პირველი კლასი არ გახსნილა სამტრედიის მუნიციპალიტეტის საბაზო საფეხურის ოთხ საჯარო სკოლაში; კერძოდ, სოფლების ჭოგნარის, ოფეთი 2-ის, წიაღუბნის და ნიგორზღვის საჯარო სკოლებში.
ავტორი
