“სანამ ხარვეზები არ გასწორდება, ობიექტი არ ჩაბარდება”

ლანჩხუთში, ჟორდანიას ქუჩაზე მცხოვრები ირმა მენაღარიშვილი “გურია ნიუსს” დაუკავშირდა და იმ პრობლემის გაშუქება თხოვა, რაც მას შეექმნა ქალაქში ჩატარებული სარეაბილიტაციო სამუშაოების შემდეგ.

მენაღარიშვილების კუთვნილი კერძო სახლი ლანჩხუთში, ჟორდანიას ქუჩაზე მრავალბინიანი საცხოვრებელი სახლების მიმდებარედ მდებარეობს, სადაც პერიოდულად, ძირითადად, ზაფხულობით ჩამოდიან ხოლმე.  როგორც ოჯახის დიასახლისი ყვება, ქუჩის იმ მონაკვეთზე, სადაც მისი სახლი მდებარეობს, სარეაბილიტაციო სამუშაოები იმ პერიოდში გახორციელდა, როცა მისი ოჯახი ლანჩხუთში არ იმყოფებოდა და, შესაბამისად, თვალყურის დევნება არ შეეძლო, რა და როგორ კეთდებოდა მის საცხოვრებელ სახლთან:

“მაშინ, როცა აქ ასფალტის საფარი დაიგო და სანიაღვრე არხი გაკეთდა, ლანჩხუთში არ ვიყავით. ჰოდა, ეტყობა, მშენებლებმაც ისარგებლეს მომენტით, აქ მაინც არავინააო და რაც მრავალბინიან საცხოვრებელ სახლებთან სამშენებლო მასალის ნარჩენები იყო, იმის მაგივრად რომ ტერიტორიიდან გაეტანათ, ამდგარან და ყველა ჩემს ღობესთან დაუყრიათ. თუ ვინმეს არ სჯერა, მოვიდეს და საკუთარი თვალით ნახოს”, _ ამბობს “გურია ნიუსთან” საუბრისას ირმა მენაღარიშვილი და ადგილს გვათვალიერებინებს, სადაც სამშენებლო ნარჩენების დაყრის შედეგად, მავთულბადის ღობე ადგილ-ადგილ დაზიანდა.

“როცა ჩამოვედი, სანიაღვრე არხიც ქვებითა და სამშენებლო მასალების ნარჩენებით დამხვდა ამოვსებული. წყალს ვეღარ ატარებდა _ ამოვწმინდე, ღობეზე მიყრილი ნაგვის ნაწილიც გავიტანე და გადავყარე. რის გატანაც ვერ შევძელი, აგერ ყრია და თავად მიხედონ. ისეთი მდგომარეობაა,  ერთი გაწვიმებაც კი საკმარისი იქნება, ამ სანიაღვრე არხს ძირი გამოუთხაროს. სად გაგონილა, საქმის ასეთი გაკეთება?! წესით, არხსა და ღობეს შორის რა ტერიტორიაცაა, იქ ხრეში მაინც უნდა მოეყარათ, ან მოეწმინდათ მაინც. ამათმა კი ქვა-ღორღი და ნაგავი ღობესთან დამიყარეს, რომლის ნაწილიც მერე წვიმას კვალში ჩააქვს. ამის ფული გამოწერილი ექნებათ, მაგრამ ჯიბეში ჩაიდებდნენ.

არ ვამბობ, რომ ცუდია ასფალტის დაგება, მაგრამ იმასაც ხომ აქვს მნიშვნელობა, როგორი გაკეთებულია?! რამდენიმე თვეა, რაც სამუშაოები   დასრულდა, თუმცა, არაერთგანაა დაზიანებული. ზოგან  ახალდაგებულ ასფალტზე  ბალახებია ამოსული, ზოგან მილხიდია ჩავარდნილი და  ზოგან _ ასფალტი.  ჩემს სახლთან მილხიდი ისე გააკეთეს, რომ დიდი ზომის ჭიშკარს ვეღარ ვაღებთ _ ხიდი უფრო მაღლაა, ვიდრე ჭიშკარი”, _ ამბობს ქალბატონი, რომელიც შესაბამისი სამსახურების მხრიდან  სათანადო რეაგირების მოლოდინშია.

აღსანიშნავია, რომ აქ მცხოვრებთა ნაწილმა უკმაყოფილება გახორციელებული სამუშაოების ხარისხთან დაკავშირებით არა ერთხელ გამოხატა “გურია ნიუსის” საშუალებით, რაზეც გამგეობის შესაბამისი სამსახურების მხრიდან დღესაც პასუხი იგივეა _ ხარვეზები   გამოსწორდება.

მუნიციპალიტეტის გამგეობაში ამბობენ, რომ ეს გზა ქალაქის კეთილმოწყობის გარდამავალ პროექტში შედის, რომელიც 2015 წლის ბოლოს დაიწყო და მიმდინარე წლის ოქტომბრის თვეში დასრულდება,  შესაბამისად, სამხარაულის ექსპერტიზის ბიუროსაც  მაშინ  მოუწევს დასკვნის დადება.

“მანამდე კი, სანამ ყველა ხარვეზი არ გასწორდება, ობიექტი არ ჩაბარდება”, _ ამბობენ გამგეობაში.

რაც შეეხება სამშენებლო ნარჩენებს, რომელიც მენაღარიშვილების ღობესთანაა დაყრილი, გამგეობის ზედამხედველობის სამსახურის უფროსის, თენგიზ ხელაძის თქმით, ამასთან დაკავშირებით აუცილებლად მოხდება დროული რეაგირება და ტერიტორია გაიწმინდება.