სახლი, რომელიც ლპება და 80 წლამდე ასაკის ქალბატონი, რომელიც ხელისუფლებისგან ქმედით ნაბიჯს, თითქმის ორი წელია, ელოდება _ ჩოხატაურში, სტიქიით დაზიანებული საცხოვრებლის მეპატრონე გულნაზ კიკვაძე დახმარებას ითხოვს.
გულნაზ კიკვაძე ჩოხატაურში, გოგიბერიძის 66 ნომერში შვილთან ერთად ცხოვრობს.
“2024 წელს, ძლიერი ქარის დროს სახლის სახურავი დაზიანდა. მერიაში მივედი დახმარების სათხოვნელად. რამდენჯერმე მოვიდნენ, თუმცა, დღემდე არავინ დამხმარებია. სახლი ჩემმა შვილმა თუნუქით გადახურა, მაგრამ არ ივარგა. უკანა ოთახებში აღარ იცხოვრება. იატაკი დალპა, ჭერი ჩამოვარდნილია. “ფეჩი” მიდგას გასათბობად, მაგრამ როცა წვიმს, მაწვიმს თავზე. 80 წლის ვარ, შეიძლება დიდხანს ვერ ვიცოცხლო, მაგრამ, სანამ ვარ ცოცხალი, თავზე ნუ დამაწვიმს.
ავად ვარ და არ შემიძლია სულ მერიაში სიარული. ველოდები დახმარებას, მაგრამ არავინ მაქცევს ყურადღებას _ საშინელი მდგომარეობაა. მინდა, რომ კომისიამ ნახოს სახლი, ვისაც ეხება ასეთი სტიქიის ამბავი. განცხადება რომ დავწერე, სახურავს ვითხოვდი, რადგან იატაკი მაშინ დაზიანებული არ იყო. განცხადების შეტანის შემდეგ 2-3-ჯერ მოვიდნენ, მაგრამ რეაგირება არ არის“, _ ამბობს გულნაზ კიკვაძე.
გულნაზ კიკვაძემ მერიას 2024 წელს რომ მართლაც მიმართა, ამას “გურია ნიუსის” მიერ გამოქვეყნებული სტატიაც სათაურით _ “შინ, როგორც გარეთ, ისე წვიმს” _ ჩოხატაურელი პენსიონერი ქალბატონის უკიდურესი გასაჭირი”, _ ადასტურებს.
მაშინდელი მერის პირველი მოადგილე, მაია კუტუბიძე ჩვენთან საუბარში ამბობდა, რომ ამ ქალბატონს განცხადება აქვს დაწერილი და აუცილებლად მოუწევს დახმარება რიგის მიხედვით: “უცებ ეს არ ხდება. აქვს თავისი პროცედურები“, _ ამბობდა კუტუბიძე.
როდის დაეხმარება მერია ოჯახს, რომელიც უსახლკაროდ დარჩენის პირზეა? ამ კითხვაზე პასუხის მისაღებად ჩოხატაურის მუნიციპალიტეტში, დაბის ადმინისტრაციულ ერთეულში მერის წარმომადგენელს რევაზ ბერძენიშვილს დავუკავშირდით.
მერის წარმომადგენელი ჩვენთან საუბარში ადასტურებს, რომ გულნაზ კიკვაძის ოჯახს დახმარება ნამდვილად ესაჭიროება, თუმცა, კონკრეტული ვადები, თუ როდის გაეწევა ოჯახს დახმარება, როგორც აღმოჩნდა, დღესაც ბუნდოვანია:
“დიდთოვლობის დროს მიყენებულ ზარალზე არ ჰქონდა განცხადება დაწერილი. ეტაპობრივად ხდება დახმარება და შემდეგ ეტაპზე დაკმაყოფილდება“, _ გვპასუხობს მერის წარმომადგენელი.
_ სტიქიით დაზარალებულებისთვის დახმარების გაცემის შემდეგი ეტაპი როდის დაიწყება?
_ ზუსტად ვერ გეტყვით, მაგრამ როცა დაიწყება, გულნაზ კიკვაძე ამ სიაში აუცილებლად მოხვდება.
_ ამ ეტაპზე ვისი დახმარება მიმდინარეობს?
_ ახლა სახურავების შეცვლისთვის დაბაში დახმარება არ გაიცემა. ყურადღებას მივაქცევ ამ ქალბატონს _ დიდთოვლობაზე ვიყავი მასთან და 1-2-ჯერ დავეხმარე.
_ როცა სტიქიისგან დაზარალებულმა მოქალაქემ განცხადება დაწერა იქამდე, ვიდრე დიდთოვლობა დააზარალებდა, რატომ ვერ მიიღო აქამდე დახმარება?
_ გასაგებია, რომ 1 წელია გასული და ცოტა მეტი, მაგრამ ასე უცებ არ ხდება. აუცილებლად მიიღებს დახმარებას.
მერის წარმომადგენლის პირობა, რომ ოჯახი დახმარებას აუცილებლად მიიღებს, ოპტიმიზმის საფუძველს ნაკლებად იძლევა, რადგან გულნაზ კიკვაძე ამ დაპირებას წლებია, ისმენს. დღეს მისი ბედი მხოლოდ იმაზეა დამოკიდებული, რამდენად სწრაფად გადავა ხელისუფლება “აღიარებიდან” საქმეზე. სხვა შემთხვევაში ასაკოვანი ქალბატონის სათხოვარი _ სიცოცხლე მშრალ სახლში გაატაროს, მხოლოდ გაზეთის ფურცლებზე დარჩება.
“გურია ნიუსი” თვალს მიადევნებს დაპირების აღსრულების პროცესს და სიახლეებს შემოგთავაზებთ.
ავტორი
