“სანამ ჩოხატაურში უბედურება არ დატრიალდება, არავინ მიხედავს? მიდით, ნახეთ, დუმბაძის ქუჩაზე, ვისოლთან, როგორაა ჩამოყრილი ელექტროგადამცემი ხაზები. პირდაპირ მიწაზე ყრია. ბოძები გადაქანებულია, სადაცაა წაიქცევა. აქ სკოლაა. ამ ხიდზე სკოლის მოსწავლეები დადიან. მართალია, ხიდი გადაკეტილია, მაგრამ ბავშვები გზას იმოკლებენ. რა ქნან! სკოლასთან გასასვლელი ხიდიც დაანგრიეს. საიდან შემოუარონ ამ ბავშვებმა?! რამხელა გზა უნდა გაიარონ. ვინაა პატრონი. მაინცდამაინც რაღაც უნდა მოხდეს, რომ მოწესრიგდეს ეს საქმე? რამდენი თვეა ასეა. ამას ვერ ხედავენ იქ “თეთრ სახლში?” _ თუ, რაც არ უნდათ, ვერ ხედავენ? სადაა “ენერგოპრო”! რომელიმე ბავშვს რამე რომ დაემართოს, ვინ იქნება პასუხისმგებელი, თუ იმას იტყვიან, ხიდი შემოსაზღვრულია და ამკრძალავი ნიშანიც დგას, რომ გასვლა არ შეიძლებაო?! გადაიღეთ, ნახეთ და გთხოვთ, პასუხი გაგვაგებინეთ”, _ ამ შინაარსის წერილი “გურია ნიუსმა” მიიღო.
ჩვენი გადამღები ჯგუფი მართლაც იმყოფებოდა ადგილზე და გადავიღეთ წერილში აღნიშნულ ტერიტორიაზე არსებული ვითარება.
თუ როდის დასრულდება მითითებულ მისამართზე მიმდინარე სამუშაოები,_ ამის გასარკვევად ჩოხატაურის მუნიციპალიტეტის მერის პირველი მოადგილეს, მაია კუტუბიძეს დავუკავშირდით. ის ჩვენთან საუბრისას ამბობს, რომ ხშირად აქვს კომუნიკაცია სამუშაოების შემსრულებელ კომპანიასთან და ხიდზე მიმდინარე სამუშაოები უახლოეს დღეებში უნდა დასრულდეს.
“სამშენებლო პროცესში მოხდა გრუნტის ჩამოშლა და ამის გამო საჭირო გახდა მთელი რიგი გაუთვალისწინებელი სამუშაოების ჩატარება. ამას თან დაერთო ძლიერი წვიმები, რის გამოც წარმოქმნილი ბალასტი არ იძლეოდა საშუალებას, ტექნიკას ემუშავა. კომპანიის განმარტებით, უახლოეს ერთი კვირის განმავლობაში აღდგენილი იქნება ხიდზე მოძრაობა”.
