გუშინ, “ბებერი კონტინენტის” საფეხბურთო არენებზე “ევროთასების” ჯგუფური სტადიის მატჩები დაიწყო. სამწუხაროა, რომ კიდევ ერთი საფეხბურთო ზეიმი ქართული კლუბების გარეშე ჩაივლის. უკვე მერამდენე წელია, თანამემამულე “ტყავის ბურთის” თაყვანისმცემლები მორიგ ზაფხულს დიდი იმედებით ხვდებიან, მაგრამ ერთ თვეში “ტრადიციულ” იმედგაცრუებას განიცდიან და აუხდენელი ოცნებების მორიგ მომავალ წლამდე გადადება უწევთ.
ფეხბურთი წინ მიდის, ვითარდება და წარმატებებს ისეთი გუნდები აღწევენ, გუშინ სათვალავში არავინ, მათ შორის ქართული კლუბებიც რომ არ აგდებდათ. თავად განსაჯეთ:
ჩემპიონთა ლიგაში იასპარეზებს ტირასპოლის “შერიფი”, გუნდი რომელსაც ორიოდე წლის წინ “საბურთალომ” მოუგო.
კონფერენს ლიგაში ითამაშებენ: “ალაშკერტი” (სომხეთი), “ფლორა” (ესტონეთი), “ლინკოლნი” (გიბრალტარი).
ზემოთ ჩამოთვლილი არც ერთი გუნდი წესითა და რიგით ქართულ კლუბებზე ძლიერი არ უნდა იყოს, პირიქით, ჩვენებურები მათ წლების განმავლობაში სუსტსა და სასურველ მეტოქეებად მიიჩნევდნენ. სამწუხაროდ, მოვიდა დრო და “სასურველები” ევროტურნირების ჯგუფურ სტადიაზე ასპარეზობენ, ჩვენი კლუბები კი… კვლავ უკეთესი მომავლის ოცნებად არიან. რატომ, რისთვის, რა ხდება ქართულ ფეხბურთში, რატომ არ და ვერ ვითარდება სპორტის ეს სახეობა ჩვენში?
გუნდებს რომ თავი დავანებოთ, ეროვნული გუნდის ბოლოდროინდელი მატჩები გავიხსენოთ: უსუსურობა, ქაოსი, უმწეობა. ალბათ, პირველ რიგში პასუხი იმ ადამიანებს უნდა მოეთხოვოს, ვინც ამჟამინდელი ქართული ფეხბურთის სათავეში დგანან.
ასე გაგრძელება აღარ შეიძლება. რაც მთავარია, “ხელმძღვანელობამ” ჯანსაღი კრიტიკის მოსმენა უნდა ისწავლოს. ლევან კობიაშვილი თავის დროზე ჩინებული ფეხბურთელი გახლდათ, სამწუხაროდ, ასევე, წარმატებული ორგანიზატორი და “უფროსი” ნამდვილად ვერ აღმოჩნდა. შოთა არველაძესთან უაზრო დებატებით კი საკუთარი უარყოფითი მხარეები უფრო წარმოაჩინა.
ბევრი შეიძლება ითქვას და დაიწეროს ქართული ფეხბურთის ამჟამინდელ პრობლემებზე. ამ თემაზე მოგვიანებით ვისაუბროთ. დღევანდელი წერილის მეორე ნახევარში კი სხვადასხვა სოციალურ ქსელებში ამოკრეფილ ციტატებს მოვიყვან, რომელთაც პირობითად “ხალხის ხმას” დავარქმევდი.
“საქართველოს ნაკრების შემხედვარეს იოჰან ბოსკამპს “წიკები” დასჩემდა და ნერვული აშლილობა დაემართა. მას შემდეგ წლები დასჭირდა მდგომარეობიდან გამოსასვლელად.
ალან ჟირესი იმდენად დაითრგუნა, ერთი ხანობა დეპრესია ჰქონდა და მერე სადღაც აფრიკაში გაუჩინარდა.
ქართველების გადამკიდე ექტორ რაულ კუპერი საკმაო პერიოდი ფსიქოლოგს აკითხავდა და ვგონებ, ყოველ სამშაბათს სახლში იკეტება და გარეთ ცხვირს არ ჰყოფს.
კლაუს ტომპიოლერი “ქართული თავგადასავლების” შემდეგ მწვრთნელის სავარძელში აღარასოდეს ჩამჯდარა და პენსიაზე გასვლა გადაწყვიტა.
ვლადიმირ ვაისი ისევ ის “კვერცხია”, რაც იყო და აქეთ “გვეკაიფება” _ რაღაც შეტყობინებები მომდის, მაგრამ ვერ ვიგებ სიტყვა “hamodi” რას ნიშნავსო.
სანიოლი კიდევ აღმოჩნდა სირცხ-ვილი.
ერთადერთი საღად მოაზროვნე კაცი ივო შუშაკი გამოდგა. მოიგო ერთი თამაში, უმალ ნაკრებში კონტრაქტი შესთავაზეს, მაგრამ უარი გვითხრა.
ეჰჰჰ, ნეტავ როდემდე, როდემდე, როდემდე?”
“Levan Kobiashvili იმაზე უარესი რაღა უნდა მოხდეს რაც ბოლო დროს ქართული ფეხბურთის ქომაგმა ნახა”.
“კობიაშვილო, ნამუსიან კაცად გიცნობდით”.
“ეს კობიაშვილის ნაკრები ისეთი ფსკერია თავისი სანიოლიან-ასისტენტებიანად, რომ გაბრაზებაც კი “ტეხავს” რაღაცნაირად… დავრდომილს ხომ არ ეჩხუბებიან?! ცარიელი ადგილია ამათი ნაკრები! სირცხვილი! არადა, 100% დარწმუნებით შეიძლება ითქვას, რომ ამათ ხელში მხოლოდ უარესობა იქნება! ამათი გადაშენება ერთადერთი შანსია… აი, სანაცვლოდ ვინ მოვიდეს… რა გითხრათ…”
“სულ ერთი და იგივე წრეზე ვტრიალებთ, რა შუაშია ფეხბურთელები? სულ გვყავდა. თუნდაც, ქინქლაძის დროის ნაკრები ავიღოთ და 90-ანებიდან მოყოლებული ცალკე ფეხბურთელები იყო და არის სულ, რომლითაც შეიძლება გუნდის აწყობა. სწორი და პატიოსანი მიდგომით ლუქსემბურგიც განვითარდა და სომხეთიც რომელსაც 7:0-ს ვუგებდით და ბევრი სხვა ნაკრები. ჩვენ კი ისევ ერთ ადგილზე ვართ 30 წელია”.
“პრობლემა ერთია და რა თქმა უნდა, ეს არის საქართველოს ფეხბურთის ფედერაცია _ Georgian Football Federation”.
“გამოსავალი ერთია. ესენი თავისით არსად წავლენ. გულშემატკივრების დიდი მასა უნდა მივიდეს ფედერაციასთან, გინდ ჟურნალისტი იყოს, გინდ უბრალო გულშემატკივარი, ანუ ყველანი და ყველას ვინც ფედერაციაში მუშაობს თანამდებობებზე, კობიაშვილის და მისი საძმაკაცოს თამადობით, გამოყაროს გარეთ!!! ჩატარდეს რიგგარეშე ყრილობა, სადაც პრეზიდენტობის ერთადერთი კანდიდატი იქნება ქეცბაია (რომელიც დღეს ერთადერთი პატიოსანი და შრომისმოყვარე ჩანს) და არჩეულ იქნას ის. სხვა გამოსავალი არ არსებობს”.
“რომელიღაც გადაცემაში კობიმ თქვა, მერე რა რომ ფეხბურთის ფედერაციის პრეზიდენტიც ვარ და პოლიტიკოსიც, რომელიმეს რამე დავაკელიო?”
“მთელი ფედერაცია უნდა წავიდეს დღესვე”.
“უფრო მეტი კრიტიკა და მწარე სიტყვებია საჭირო! დასაწყისი კარგია!”
ქართული ფეხბურთი საკუთარ უსწორმასწორო გზას ნელ-ნელა მიუყვება. აი, ევროპაში კი გუშინ ჩემპიონთა ლიგის ჯგუფური ეტაპის პირველი ტურის შეხვედრები გაიმართა.
A ჯგუფი: “ბარსელონა” – “ბაიერნი” 0:3, “დინამო” (კიევი) – “ბენფიკა” 0:0.
F ჯგუფი: “იანგ ბოისი” – “მანჩესტერ იუნაიტედი” 2:1, “ვილიარეალი” – “ატალანტა” 2:2.
G ჯგუფი: “სევილია” – “ზალცბურგი” 1:1. “ლილი” – “ვოლფსბურგი” 0:0.
H ჯგუფი: “ჩელსი” – “ზენიტი” 1:0, “მალმიო” – “იუვენტუსი” 0:3.
[sexy_author_bio]
