კიდევ ერთი უთანხმოება ,,ქართულ ოცნებაში“_დეპუტატები ერთმანეთს საპრეზიდენტო კანდიდატის გამო უპირისპირდებიან. მმართველი გუნდის ნაწილისთვის მიუღებელია დამოუკიდებელი კანდიდატის მხარდაჭერა. ნაწილი კი სრულად იზიარებს ბიძინა ივანიშვილის სულისკვეთებას.
მმართველ გუნდში აცხადებენ, რომ თუ ,,ქართულ ოცენებას“ საკუთარი საპრეზიდენტო კანდიდატი არ ეყოლება, წინასაარჩევნო პროცესებში მონაწილეობას საერთოდ აღარ მიიღებენ. საკითხთან დაკავშირებით განცხადება ზაქარია ქუცნაშვილმა გააკეთა.
,,იმ შემთხვევაში, თუ პარტიას საკუთარი კანდიდატი არ ეყოლება, მაშინ უპირატესობას მივანიჭებდი არა დამოუკიდებელი კანდიდატის მხარდაჭერას, არამედ არჩევნებში საერთოდ არჩარევას“, _ განაცხადა ქუცნაშვილმა.
პოლიტიკის ექსპერტი, ვაჟა ბერიძე ,,გურია ნიუსთან“ ,,ქართული ოცნების“ მომავალ საპრეზიდენტო კანდიდატზე საუბრობს და მმართველი გუნდის წინასაარჩევნო პროცესებს მიუღებელს უწოდებს.
,,ქართული ოცნების“ კანდიდატურის წარდგენის პროცესი კატეგორიულად მიუღებელია, რადგან არ შეიძლება ქვეყანაში ყველაზე გავლენიანმა ადამიანმა გადაწყვიტოს, რომ დემოკრატიის გაუმჯობესების მიზნით დაუთმოს პრეზიდენტის პოსტი ოპოზიციას და მის გუნდს. ვერანაირი ცალკეული პიროვნებები დემოკრატიის ხარისხზე ზეგავლენას ვერ მოახდენენ, თუ ხალხი არ მონაწილეობს ამ პროცესში. ამ ლოგიკით თუ ვიმსჯელებთ, შეიძლება 2020 წლისთვის ბატონმა ბიძინა ივანიშვილმა გადაწყვიტოს, რომ დემოკრატიის გაუმჯობესების მიზნით, ხელისუფლება დაუთმოს ოპოზიციას“, _განაცხადა ბერიძემ.
ბერიძე ბიძინა ივანიშვილს აკრიტიკებს და აცხადებს, რომ თუკი ივანიშვილს პრეზიდენტის პოსტზე დამოუკიდებელი კანდიდატის გამარჯვება სურს, გაუგებარია რატომ აკრიტიკებდა არაპარტიულ პრეზიდენტ გიორგი მარგველაშვილს.
,,მე მიკვირს, როდესაც ამბობენ, რომ ,,ქართული ოცნების“ კანდიდატი უნდა იყოს ისეთი ადამიანი, რომელიც არ იქნება პარტიული ტვირთით დამძიმებული. ასეთი არ იყო გიორგი მარგველაშვილი? რას შეჭამეს ეს კაცი? მარგველაშვილი ,,ქართული ოცების“ კანდიდატი იყო. შემდეგ თქვა, რომ მე არ მინდა წარმოვადგენდე პოლიტიკურ გუნდსო, მინდა ვიყო თავისუფალი მოთამაშეო და ამისთვის ანათემას გადასცეს. გონიერი ადამიანია, კარგ პოლიტიკურ ანალიზს აკეთებს, პროგრესულ იდეებს თანაუგრძნობს. მარგველაშვილზე უკეთეს ნეიტრალურ საპრეზიდენტო კანდიდატს იპოვნიან სადმე? ,,ქართულმა ოცნებამ“ ისევ მარგველაშვილს დაუჭიროს მხარი და ძალიან საინტერესო მოცემულობას მივიღებთ“, _ გვითხრა ბერიძემ.
რა სახეს მიიღებს ,,ქართულ ოცნებაში“ არსებული დაპირისპირება და როდის დასახელდება მმართველი გუნდის საპრეზიდენტო კანდიდატი, ჯერჯერობით, უცნობია. დეპუტატებს საპრეზიდენტო კანდიდატთან დაკავშირებით რადიკალურად განსხვავებული პოზიციები აქვთ.
