სამოქალაქო ინიციატივის “გადადგი ნაბიჯი ევროპისკენ“ წარმომადგენლებმა ოზურგეთში ლიტერატურულ კაფეში “8+1“ – სში დისკუსია გამართეს, რომლის მთავარი თემა იყო საქართველოს პერსპექტივა ევროკავშირის წევრობის კანდიდატის სტატუსის მიღებასთან დაკავშირებით.
“სამართლიანი არჩევნების“ ხელმძღვანელმა ნინო დოლიძემ, უსაფრთხოების ექსპერტმა ხათუნა ლაგაზიძემ, სამოქალაქო აქტივისტმა ირმა გორდელაძემ და სამოქალაქო განათლების პედაგოგმა ლადო აფხაზავამ საზოგადოებას ესაუბრეს თუ რა სიკეეთებს მოუტანს ევროკავშირში გაწევრიანება საქართველოს.
“კიდევ ერთხელ ვხედავთ მცდელობას, რომ ტრადიციული პროპაგანდისტული ხერხით შუაზე გაიყოს საზოგადოებრივი აზრი ისეთ საკითხზე, რაზეც აქამდე, საზოგადოების აბსოლუტური უმრავლესობა თანხმდებოდა.
ყველა დროში, ადამიანებს აერთიანებთ უკეთესი მომავლის სურვილი, სწრაფვა კეთილდღეობისა და უსაფრთხოებისკენ. ეს შესაძლებლობა ევროპაშია, ჩვენს ისტორიულ ოჯახში, სადაც ოჯახის წევრის დაბრუნებას ელოდებიან. ევროპისკენ წინსვლას ვერცერთი ხელისუფლება დაიბრალებს. ეს ჩვენი – ქართველი ხალხის მონაპოვარია და ამ არჩევანს, გადამწყვეტ მომენტში, ყოველთვის ვადასტურებთ”,_ ითქვა შეხვედრის დროს სპიკერებისგან.
ნინო დოლიძის თქმით, ბოლო პერიოდში ყველა კვლევაში ვადასტურებთ, რომ საქართველოს მოსახლეობის 80 პროცენტს სურს ევროკავშირში ინტეგრაცია, მაგრამ ძალიან მნიშვნელოვანია ეს ხმა გავაგონოთ ყველას და ასევე ეს ხმა უნდა გავაგონოთ ჩვენ პარტნიორებს ევროკავშირში.
“პირველ რიგში ჩვენ, ალბათ ყველამ ვიცით საქართველო მთელი თავისი ისტორიის მანძილზე ყოველთვის იყო ევროპული ქვეყანა და ყოველთვის ვიყავით ცივილიზებური სამყაროს ნაწილი. მე, რამდენიმე დღის წინ ჩამოვედი ბრიუსელიდან სადაც ერთ-ერთ მუზეუმში ვიყავი, იქ ვსაუბრობდით, რომ ევროპა არ არის მარტო ტერიტორიული მთლიანობა და ტერიტორია, არამედ ეს არის კულტურული კავშირი და ღირებულებათა კავშირი. საქართველო და ქართველები ღირებულებებით ყოველთვის ვიყავით და ვართ ევროპა.
ვიცით, რომ ბოლო ორ საუკუნეზე მეტია ჩვენ ევროპულ არჩევანს და სვლას ხელს უშლის ჩვენი ჩრდილოელი მეზობელი. რუსული იმპერია ყოველთვის ხელს უშლიდა საქართველოს წინსვლას, ევროპულ გზას, მაგრამ ძალიან მიხარია, რომ ჩვენ არასდროს ვნებდებოდით და ალბათ, ჩვენ ვიყავით სულ ჩემპიონები თავისუფლებისთვის ბრძოლაში. მიუხედავად იმისა დამოუკიდებლობას მივაღწიეთ დღემდე ძალიან რთულია თავისუფლების შენარჩუნება იმიტომ, რომ ჩვენი მეზობელი ხელს გვიშლის. “ – თქვა ნინო დოლიძემ.
შეხვედრაზე ასევე საზოგადოების ნაწილმა დასვა მათვის საინტერესო კითხვა. როგორც ცნობილი გახდა მსგავსი ტიპის შეხვედრები უახლოეს მომავალში კიდევ ჩატარდება საქართველოს რეგიონებში.
ავტორი
