კლიმატის კანონის შემუშავების პროცესის დაწყებასთან დაკავშირებით, გარემოს დაცვისა და ბუნებრივი რესურსების კომიტეტის ორგანიზებით ღონისძიება გაიმართა.
„გარემოს დაცვასა და კლიმატის ცვლილებასთან დაკავშირებული საკითხები არის ის, რაც საქართველოს ხელისუფლებისთვის მნიშვნელოვანია. გამომდინარე იქიდან, რომ პარლამენტი აქტიურად მუშაობს ამ საკითხებზე, ჩვენს საზოგადოებაშიც ეს ცნობიერება ამაღლებულია. რაც შეეხება კანონმდებლობას გარემოს დაცვისა და კლიმატის ცვლილების კუთხით, ეს ის თემებია, რომელიც რეალურად აწუხებს ჩვენს საზოგადოებას. წინ საინტერესო დისკუსიები გველის პარლამენტში. ეს ის თემაა, რომელიც ზეპარტიული ხასიათისაა და დარწმუნებული ვარ, რომ სწორედ ეს მოგვცემს შესაძლებლობას მოიძებნოს საკითხები, რომელზეც შესაძლებელი იქნება აზრების შეჯერება”, – ამის შესახებ საქართველოს პარლამენტის თავმჯდომარემ შალვა პაპუაშვილმა კლიმატის კანონის შემუშავების პროცესის გახსნით ღონისძიებაზე სიტყვით გამოსვლისას განაცხადა.
საქართველოს პარლამენტის გარემოს დაცვისა და ბუნებრივი რესურსების კომიტეტისა და ვესტმინსტერის დემოკრატიის ფონდის (WFD) ორგანიზებით გამართულ ღონისძიებაზე, პარლამენტის თავმჯდომარემ მსგავსი ღონისძიებების მნიშვნელობაზე ისაუბრა და აღნიშნა, რომ პოლიტიკურ დღის წესრიგს დისკუსიის დიდი ნაწილი მიაქვს, ადამიანის საჭიროებებზე ორიენტირებული რეალური პოლიტიკა კი ხშირად ყურადღების მიღმა რჩება.
პარლამენტის თავმჯდომარემ ვესტმინსტერის დემოკრატიის ფონდს (WFD) ღონისძიების ორგანიზებისთვის და ზოგადად, საპარლამენტო დემოკრატიის განვითარებაში შეტანილი წვლილისთვის მადლობა გადაუხადა.
ღონისძიების მონაწილეებს სიტყვით მიმართა საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარემ მაია ბითაძემ.
„ეს კანონი იქნება ახალი ფანჯარა ევროინტეგრაციის პროცესში და ასევე, ის იქნება კიდევ ერთი დიდი წინ გადადგმული ნაბიჯი ჩვენი ქცევის შეცვლაში და ჩვენი ცნობიერების ამაღლებაში”, – განაცხადა გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ.
მან ხაზი გაუსვა იმ ფაქტს, რომ საქართველოს მთავრობისა და პარლამენტის მისწრაფებები სინქრონულია პარიზის 2017 წლის შეთანხმებით აღებული საერთაშორისო ვალდებულებების შესრულების მიმართულებით.
„მე კარგად მახსოვს ის პერიოდი, როდესაც კლიმატის ცვლილება აბსტრაქციად წარმოგვედგინა, მაგრამ მიხრია, რომ ვარ იმ გუნდის წევრი, რომელმაც თავის საარჩევნო პროგრამაშიც კი ხაზგასმით აღნიშნა თავისი პოზიცია კლიმატის ცვლილების შერბილების კუთხით. სასიხარულოა, რომ ამ კანონის მიღების შემდეგ ჩვენ გვექნება რესურსი, სხვანაირად დავინახოთ გამოწვევები, რომელიც კლიმატის ცვლილებასთან არის დაკავშირებული”, – განაცხადა გარემოს დაცვისა და ბუნებრივი რესურსების კომიტეტის თავმჯდომარემ.
საქართველოს გარემოს დაცვისა და სოფლის მეურნეობის მინისტრმა ოთარ შამუგიამ, დიდი ბრიტანეთის ელჩმა საქართველოში მარკ კლეიტონმა, WFD-ის მმართველთა საბჭოს თავმჯდომარემ, დეპუტატმა რიჩარდ გრეჰემმა და WFD-ის წარმომადგენელმა საქართველოში ლაშა ნაკაშიძემ.
თავიანთ გამოსვლებში მათ ყურადღება გამახვილეს კლიმატის კანონის მიღების მნიშვნელობაზე, კანონის შემუშავების პროცესზე, სამომავლო პერსპექტივებსა და საქართველოს პარლამენტის როლზე კლიმატის ცვლილების სფეროში საქართველოს მიერ აღებული ვალდებულებების ეფექტურად შესრულებაში.
ღონისძიებას საქართველოს პარლამენტის, საქართველოს მთავრობის, საერთაშორისო ორგანიზაციების, დიპლომატიური კორპუსის, სამოქალაქო და ბიზნეს სექტორის წარმომადგენლები ესწრებოდნენ.
