გუშინ, შვეიცარიის ქალაქ ნიონში, „ევრო 2024“-ის ფლეი ოფის წილისყრა გაიმართა.
ნახევარფინალში საქართველო ლუქსემბურგს უმასპინძლებს (21 მარტი), იმავე დღეს საბერძნეთი ყაზახეთს დაუხვდება, ხოლო ამ წყვილებში გამარჯვებულები 26 მარტს, „ევრო 2024“-ის საგზურისთვის ერთმანეთს დაუპირისპირდებიან.
წილისყრით გადაწყდა, რომ ფინალს საქართველოსა და ლუქსემბურგის წყვილში გამარჯვებული უმასპინძლებს.
საინტერესოა, რომ „ევრო 2020“-ის ფლეი ოფის წილისყრისას საქართველოს ნაკრებს გაუმართლა და ფინალის მასპინძლობაც ერგო, თუმცა მაშინ ეს შესაძლებლობა ვერ გამოიყენა – ნახევარფინალში ბელარუსთან გამარჯვების შემდეგ ფინალში, უეფას ნებართვის მიუხედავად, „დინამო არენაზე“ გულშემატკივარი არ დაუშვეს, ხოლო გუნდის ლიდერმა ხვიჩა კვარაცხელიამ ნაკრების ისტორიაში მთავარი თამაში კოვიდის გამო გამოტოვა. შედეგად, ეროვნულმა გუნდმა ჩრდილოეთ მაკედონიასთან წააგო.
გუშინ, იტალიის ნაკრების ყოფილმა მცველმა ფაბიო კანავარომ ხვიჩას კვარაცხელიას შესახებ ისაუბრა. საინტერესოა, რომ 50 წლის სპეციალისტი „ნაპოლის“ მთავარი მწვრთნელის პოსტზე რუდი გარსიას სავარაუდო შემცვლელად სახელდებოდა.
„ნაპოლისთან“ არანაირი კონტრაქტი მქონია. გუნდი საკმაოდ ძლიერია, გარსიას ხელში დაიკარგა თამაშის ის სტილი, რომელიც ყველას მოსწონდა. „ნაპოლიმ“ მიგვაჩვია მეტოქეების წნეხში ბურთით თუ უბურთოდ მოქცევას, ბოლო თვეებში კი ეს თვისებები გაქრა. შედეგები აჩვენებს, არის თუ არა ვალტერ მაძარი სწორი არჩევანი. მომდევნო პერიოდი იოლი არ იქნება. მას წარმატებებს ვუსურვებ.
რაც შეეხება კვარაცხელიას. ხვიჩას უნიკალური, ტოპმოთამაშის თვისებები აქვს. მან ზრდა უნდა გააგრძელოს და მიხვდეს, რომ მხოლოდ შვიდი-რვა თვე არასაკმარისია. საჭიროა უწყვეტად პროგრესირება“, – განაცხადა ფაბიო კანავარომ.
ცნობილი იტალიელი ჟურნალისტი ფაბრიციო რომანოს მტკიცებიძთ, ხვიჩა კვარაცხელიას სამსახურით ლონდონის „ჩელსი“ დაინტერესდა.
12 ტურის შემდეგ „ჩელსი“ 16 ქულით ინგლისის „პრემიერ ლიგაში“ მეათე ადგილს იკავებს.
გამოცემა „Bayern & Germany“-ის ინფორმაციით წერს, რომ „ბაიერნი“ მონიტორინგს ხვიჩა კვარაცხელიაზე აგრძელებს და შესაძლოა, ამ ტრანსფერს ზაფხულში მიუბრუნდეს.
ამერიკელმა კალათბურთელმა კაილ ვიმსმა კი რომელიც გასულ სეზონში „ვირტუს ბოლონიაში“ თორნიკე შენგელიას თანაგუნდელი იყო ქართველის შესახებ ისაუბრა:
„შენგელია ყოველთვის დიდებული კალათბურთელი იყო, თუმცა, არ მახსენდება ასე თავისუფლად, შეუბოჭავად და თავდაჯერებულად ეთამაშოს. ცხადია, ეს არ აკნინებს მის დამსახურებებს, როდესაც თუნდაც მოსკოვის „ცსკა“-ში თამაშობდა ანაც გასულ წელს იგივე „ვირტუსში“ გამოსვლისას, რადგანაც ის უდიდესი პროფესიონალია. თოკოს ჩემს ძმად მივიჩნევ, რომელთან ურთიერთობაც სამუდამოდ მექნება. ამიტომაც მიხარია, რომ ასეთ ფორმაში შევიდა და არ ვიქნები ამ ფონზე ერთი ადამიანიც რომ არ ვახსენო. ცხადია, რომ ლუკა ბანკის ვგულისხმობ. მისი დიდი დამსახურებაა, რომ შენგელია კიდევ უფრო თავდაჯერებული და დომინანტი გახდა“, – განაცხადა კაილ ვიმსმა.
„ვირტუსი“ იტალიის „სერია A“-ს ერთპიროვნული ლიდერია, ევროლიგის 9 ტურში კი 6 მოგება აქვს და სატურნირო ცხრილში მხოლოდ „რეალსა“ და „ბარსელონას“ ჩამორჩება.
ავტორი
