დღეს, ჩვენი გადამღები ჯგუფი ჩოხატაურში, ბაზრობაზე იმყოფებოდა. ჩვენთან მოვაჭრეები უკლიენტობის, კლიენტები კი გაძვირებული ფასების გამო წუწუნებენ.
„სასწაული ფასებია. ხელებს დაგწვავს. პომიდორი, კიტრი, ბადრიჯანი, მწვანილი ძვირია“,_ გვითხრეს ბაზრობაზე მყოფმა მოქალაქეებმა.
დღეს ბაზრობაზე ბადრიჯანი – 1.50, კიტრი- 1, მწვანილი კონა- 50 თეთრი, კილო კი 4-5 ლარი ღირდა. ლობიოს 6 ლარს აფასებდნენ.
„ლობიო 5.50-ად მაქვს აღებული, 50 თეთრს ვამატებ, რაღაც მეც ხომ უნდა დამრჩეს“,_ გვითხრა ერთ-ერთმა მოვაჭრემ.
„გაუსაძლისი მდგომარეობაა. ხალხს ფული არ აქვს. ვვაჭრობთ, მაგრამ მყიდველი არაა. საზამთრო და ნესვი კახეთიდან შემოგვაქვს, მაგრამ ძვირი ჯდება. ნესვი ლარი ღირს, საზამთრო 60 თეთრი. არაა გამორიცხული ფასმა კიდევ მოიმატოს“,_ გვითხრა მადონამ.
ქალბატონი მაია ჩვენთან მძიმე მდგომარეობის შესახებ საუბრობს:
„მდგომარეობა ძალიან მძიმეა. ხალხს უჭირს, ფული არ აქვს. თხილი შემოვიდა, მაგრამ იმასაც დაბალი ფასი აქვს. ჩვენთვის დაბალი ფასია, იმიტომ რომ რამდენჯერმე შევწამლეთ. ფაროსანა არააო ამბობენ, მაგრამ მაინც არის მცენარეზე და აფუჭებს“.
ჩვენ შპს ჩოხატაურის აგრარული ბაზრის დირექტორს, თამაზ დევიძესაც ვესაუბრეთ.
დევიძე ამბობს, რომ პროდუქტის სიძვირე მოსავლის სიმცირეს უკავშირდება.
„საერთოდ სიძვირეა. გურიაში უფრო ძვირია პროდუქტი, ვიდრე ქუთაისში. ფასები თითქმის თანმხვედრია. კარგი პომიდორი, მაგალითად, 3 ლარი ღირს. ყველაფერს ფასები აქვს მომატებული, მაგრამ ამ გლეხმაც რა ქნას. ყველი 10 ლარიდან იწყება და 11-13 ლარია. ყველა სახის პროდუქტი გაძვირებულია. ინფორმაცია გვაქვს იმ მხრივ, რომ ძალიან შემცირდა მოსავალი. მაგალითად, გორიდან დადის ხშირად ხალხი და იქაც შემცირებულია ამინდიდან გამომდინარე მოსავალი. ბუნებრივ კლიმატურ პირობებზე არიან დამოკიდებული და ეს ძალიან იშლით ხელს“,_ გვითხრა დევიძემ.
[sexy_author_bio]
