ამ დღეებში, კურორტ გომისმთაზე, „საუკუნის მშენებლობად“ წოდებული გზის მოასფალტება დაიწყო!
პარალელურად სოცქსელში გაჩნდა, მოქალაქეთა როგორც სიხარულით სავსე, ისე დაეჭვებული განცხადებებიც: „ჰალილუია““, „ბოლომდე გაკეთდება თუ მიაფუჩეჩებენ?“ „სიმართლეა?“… და ასე შემდეგ.
_დიახ, გომისმთის გზის მოასფალტება დაიწყო. რა თქმა უნდა, ბოლომდე გაკეთდება, თუმცა არის რთული მონაკვეთები, სადაც ახლა ასფალტის დაგების პარალელურად სამუშაოები ტარდება. გარკვეულ მონაკვეთებზე ჯერ თოვლია. ამიტომ დაიგება იქამდე, სადამდეც ამინდი, კლიმატური პირობები საშუალებას მისცემს მშენებლებს. ასფალტი კი ბოლომდე დაიგება, როგორც გითხარით, – განაცხადა „გურია ნიუსთან“ ოზურგეთის მუნიციპალიტეტის მერის წარმომადგენელმა გომისმთაზე შალვა ცინცაძემ.
ოზურგეთი-გომისმთის მონაკვეთზე, მასშტაბური, საუკუნის პროექტად მოაზრებული გზის მშენებლობა მიმდინარეობს. 32 კმ სიგრძის გზის 22 კმ არის მშენებარე. სარეაბილიტაციო სამუშაოებს კომპანია New Road ახორციელებს.
საავტომობილო გზის მშენებლობა, მეორე წელია, მიმდინარეობს. თუმცა, საშიში მოვლენების _ ქვათაცვენის, ხშირი ნისლის თუ ზვავების გამო, არაერთხელ შეფერხდა. ეს ძირითადი მიზეზია, რაც მშენებლობის მონიშნულ ვადებში დასრულება შეაფერხა.
_ არ იჯერებენ ადამიანები, რომ ეს არის ურთულესი რელიეფი. აქ მითითებულ ვადებში რომ სრულყოფილი მუშაობა ჩატარდეს, ყველაფერი, კლიმატიდან დაწყებული ადამიანებით დასრულებული, უნდა გიწყობდეს ხელს, _გვითხრა გასულ წელს კომპანია “ნიუ როუდის” წარმომადგენელმა.
კომპანიას, როგორც ვთქვით, გომისმთის გზების სამუშაოების ურთულეს გარემოში შესრულება უწევს.
საავტომობილო გზების დეპარტამენტთან გაფორმებული ხელშეკრულების მიხედვით, კურორტ გომისმთაზე, 2024 წლის ზაფხულამდე ახალი გზა უნდა ყოფილიყო.
რა ხდება ახლა?
რაკი ამ გზის მშენებლობის ირგვლივ უამრავი კითხვა ისმოდა საზოგადოებაში და სრულყოფილ ინფორმაცია უფრო ნაკლებად იყო, „გურია ნიუსმა“ ადგილზე ნახა ეს “საუკუნის მშენებლობა”.
გომისმთის გზის (ოზურგეთი-შემოქმედი-ბჟუჟჰესი-გომისმთის მე-მე-13 და 32-ე კილომეტრზე) მშენებლობა 2021 წლიდან დაიწყო. მშენებლობის ღირებულება 19,8 მილიონ ლარს შეადგენს.
მშენებლობის დასრულება 2024 წელს არის გათვალისწინებული.
_ ძალიან რთული გეოლოგიური აგებულების ქანებით, წყალგაჯერებული გრუნტებით, ხშირი ნისლით და წვიმით, რომლის შედეგად დღე–ღამის უმეტეს დროს, ცუდია ხილვადობა და არაპროგნოზირებადი (ქვათაცვენა) მოვლენები. ეს განსაკუთრებით საშიშია სამშენებლო ორგანიზაციისთვის. ხოლო განსაკუთრებულად რისკის შემცველია უნებართვოდ გადადგილებული ტრანსპორტის და მოქალაქეებისათვის, _ გვითხრა სამშენებლო კომპანიის წარმომადგენელმა.
როგორც აქ გვიამბეს, კომპანიას არ გააჩნია პრობლემები საჭირო ტექნიკის, პროფესიონალი კადრების და მუშახელის მხრივ, მაგრამ მათ მაქსიმალური ძალისხმევის მიუხედავად, პრაქტიკულად, მშენებლობის ორი წლის მანძილზე, ყველაზე რთულ _ მე-19, 32-ე კილომეტრზე, 12 თვეში სრულყოფილად მუშაობის დასრულების საშუალება არ მიეცათ: _ ძირითადად, ყოველი წლის 15 ივნისიდან, ოქტომბრის ბოლომდე ეძლეოდათ საშუალება, ეწარმოებინათ სამშენებლო სამუშაოები, რომელშიც შედის საკურორტო 1,5 თვეც, _ გვიამბო კომპანიის წარმომადგენელმა და გვითხრა ისიც, რომ მშენებლობის პერიოდში პროექტმა მოითხოვა ცვლილებების გატარება და სერიოზულადაც:
_ საჭირო გახდა დამატებითი გაბიონების და საყრდენი კედლების მოწყობა, წყალგამტარი მილების დამატება–ცვალებადობა. საპროექტო გზის ღერძების გადაადგილება, უვარგისი გრუნტის შეცვლა და რიგი სხვა აუცილებლად საჭირო ღონისძიებები. ამას კი დასჭირდა ძალიან დიდი ძალისხმევა და დახმარება, როგორც ინფრასტრუქტურის სამინისტროს, საავტომობილო გზის დეპარტამენტის, ასევე, მხარის ხელმძღვანელობისა და მშენებელი ორგანიზაციის მხრიდან, _ განმარტეს ხელმძღვანელებმა.
მშენებლობის პირველი ეტაპის დასრულებას, ასევე, ასფალტის საფარის და დამცავი კონსტრუქციების მოწყობას რაც შეეხება, როგორც აქ მაშინ გვითხრეს, ამინდზე არიან დამოკიდებული. 2024 წლის წლის ივლის-აგვისტოში კი ობიექტი უნდა ჩაბარდესო.
როგორც ვხედავთ დავით ჟღენტის ორგანიზაცია დანაპირებს ასრულებს. გომისმთის საუკეთესო გზა მალე არათუ მთელ გურიას, საქართველოს და მსოფლიოსაც გაახარებს.
ავტორი
