ზოგადად, დასავლეთ საქართველოში საზამთროს მოყვანა არ უკვირთ, მაგრამ გურიაში, ნოტიო ჰავის და ხშირი წვიმების გამო, მას მაინც არ თვლიდნენ შედეგზე ორიენტირებულ აგრარულ კულტურად, თუმცა, ოზურგეთელი როლანდ ქიმუცაძის ოჯახში საზამთროს არნახული მოსავალი ვნახეთ.
_ ოზურგეთში, ლაითურსა და ნარუჯაში უკვე ბლომად მოჰყავთ საზამთრო. მე 500 კვ. მ. ფართობზე დათესვა წელს პირველად ვცადე და შედეგმა გამაოცა. ამინდებმაც შეუწყო ხელი. წელს, გაზაფხულის ბოლოს და ზაფხულის დასაწყისში წვიმა საერთოდ არ მოსულა. ასეთი ამინდი, თუ წყალს არ მიაკლებ, საზამთროსთვის ზედგამოჭრილია. საუკეთესო მსხმოიარობა აქვს, ნაყოფიც კარგად გაიზარდა. ეს არის, წყალი არ უნდა დააკლდეს და ლერწს ძალიან ფრთხილად უნდა შეეხო, _ გვეუბნება როლანდ ქიმუცაძე.
მის საკარმიდამო ნაკვეთში მართლაც უჩვეულო სანახაობაა _ მიწის არც ისე ვრცელ ადგილზე უხვად მსხმოიარე საზამთრო, ერთმანეთთან ახლოს სპეციალურად ხელით დალაგებული გეგონება. ქიმუცაძეებს საზამთროს ფართობის გვერდით, პრიმიტიულად, მაგრამ ძალზე პრაქტიკულად გაკეთებული, საპიკულე კიტრის მწკრივები ღია გრუნტში აქვთ მოწყობილი. ე. წ. წვეთოვანაც შინ გააკეთეს. პოლიეთილენის მილი კვალში დათესილ და ფორჩხზე აკრულ კიტრის მწკრივებს შემოავლეს, მცენარის ძირებთან დახვრიტეს და სპეციალური სამაგრები გაუკეთეს.
_ ცხელი ივნისის განმავლობაში წვეთოვანით ვაწვდიდით წყალს. შაშვებმა თვალი დაგვადგეს და ყვავილში ამომძვრალ ნაყოფს ანადგურებდნენ. მერე თოკით ბადეები გავაკეთეთ და კიტრის მწკრივები გადავხურეთ. ასე გადავარჩინეთ საპიკულე კიტრის მოსავალი, რომლის მსხმოიარობაც უჩვეულო იყო. ბლომად შევინახეთ ზამთრისთვის და მეზობლებსაც ვუწილადეთ, _ ამბობს ბატონი როლანდი და გეუბნება, რომ მონდომებაა მთავარი, თორემ კლასიკური ტიპის სათბურს თუ ვერ ააშენებ, ჩვეულებრივი უნარების გამოყენებით ყველას შეუძლია ოჯახის სამყოფი ყველანაირი ბოსტნეული მოიწიოს ამ დალოცვილ მიწაზე.
ქიმუცაძეებს საოჯახო მეურნეობაში ბლომად ჰყავთ იხვი, ქათამი თუ მსხვილფეხა რქოსანი პირუტყვი, თუმცა, ახლა მათ ძალიან უხარიათ, რომ ცდამ გაამართლა და კულტურამ, რომელიც აქამდე არ ჰქონდათ ეზოში, პირველი ცდისთანავე საუკეთესო შედეგი გამოიღო.
_ შინ რომ მექნება სამყოფად ყველა სახის ბოსტნეული, მათ შორის საზამთროც, რომლითაც შვილიშვილებსაც გავახარებ და მეზობლებსაც მივუკითხავ, ეს შრომით ნაპოვნი სიხარულია. მიწა ვისაც აქვს, ზედ ყველაფრის მოყვანა უნდა შეძლოს, _ ამბობს როლანდ ქიმუცაძე.
