საქართველოს ეროვნული გუნდისა და „ნაპოლის“ თავდამსხმელი ხვიჩა კვარაცხელია, „სერია A“-ს სეზონის საუკეთესო ფეხბურთელად (MVP) დაასახელეს.
ხვიჩა კვარაცხელიას საგანგებო პრიზს დღეს, „სამპდორიას“ წინააღმდეგ, ბოლო ტურში, დიეგო მარადონას სახელობის სტადიონზე გადასცემენ.
„ხვიჩა კვარაცხელიას გავლენა ლიგაზე შთამბეჭდავი იყო. მადლობა „ნაპოლის” იტალიაში ამ ნიჭიერი ფეხბურთელის ჩამოყვანისთვის, რომელმაც პირველივე მატჩებიდან აჩვენა თავისი ტექნიკის რეპერტუარი, დრიბლინგი. 12 გოლით და 10 საგოლე გადაცემით.
კვარაცხელია იყო ნეაპოლელთა ერთ-ერთი წამყვანი მოთამაშე, რომელმაც მოიგო სკუდეტო, რომელზეც ბევრი გულშემატკივარი და ლამაზი ფეხბურთის მოყვარული ოცნებობდა“, _ განაცხადა „Lega Serie A“-ს აღმასრულებელმა დირექტორმა, ლუიჯი დე სიერვომ.
ინგლისის ნაკრების, „მილანის“, „იუვენტუსისა“ და მადრიდის „რეალის“ ყოფილი მთავარი მწვრთნელი ფაბიო კაპელო, ქართველი თავდამსხმელის არჩევას დაეთანხმა:
„ვეთანხმები არჩევანს. ხვიჩა აბსოლუტურად დამსახურებულად აღიარეს „სერია A“-ს საუკეთესო მოთამაშედ. ის უნიჭიერესი ფეხბურთელია“.
გამოცემა „Corriere dello Sport“-თან, „ნაპოლის“ ყოფილმა მთავარმა მწვრთნელმა ანდრეა კარნევალემ ხვიჩა კვარაცხელიას საუკეთესოდ დასახელებაზე ისაუბრა.
„ყველაფერი ბედით იყო განსაზღვრული. ბიჭი 21 წლის ასაკში ჩამოვიდა იტალიაში. თავისი ბუნებრიობით გამოიჩინა თავი. როდესაც თვითმფრინავიდან ჩამოვიდა ხვიჩას უკვე გააჩნდა ის ავტორიტეტი, როგორითაც აქამდე თამაშობდა. ნეაპოლისთვის სკუდეტოს მოგებაში მთავარი გმირი კვარაცხელია იყო. ყველამ იცის, რომ მისი მოგება არ არის მარტივი, გადახედეთ ისტორიას.
კარგად ვიცნობ, პატარა ბიჭი მამაკაცად გადაიქცა. ის ახლა კარგ ფიზიკურ კონდინციებშია, ძალიან გაიზარდა, ამ უკანასკნელს კი თამაშში უპირატესობად ქმნის. დაიმახსოვრეთ, მომავალში ახალგაზრდა ფეხბურთელები მთელს მსოფლიოსში ხვიჩას გზით წასვლას მოისურვებენ. „კვარას“ არსენალში ყველაფერი აქვს.
„ატალანტასთან“ გატანილ გოლში დაინახავთ მრავალ სინთეზს, რის შემდეგაც მიხვდებით, რომ მას ნებისმიერი მცველის მოტყუება შეუძლია, ის ჩემპიონია, რომელიც დიდებულებას ქმნის“,_ განაცხადა ანდრეა კარნევალემ.
„ნაპოლის“ ქართველი გარემარბის, ხვიჩა კვარაცხელიას „სერია A“-ში სეზონის საუკეთესო ფეხბურთელად აღიარებას გამოეხმაურა მოსკოვის „ლოკომოტივის“ ყოფილი მწვრთნელი, იური სიომინიც.
„იტალიის ლიგის საუკეთესო ფეხბურთელობა დიდი მიღწევაა. ეს არის უმაღლესი დონე. ხვიჩამ ტიტული დაიმსახურა, რადგან ყველა მატჩში ბრწყინვალედ ითამაშა, „ნაპოლიში“ ძალიან მნიშვნელოვანი მოთამაშეა. ამდენი გოლი და პასი, მარცხენა თავდამსხმელის პოზიციაზე – მხოლოდ ნიჭიერ ადამიანებს შეუძლიათ ამის გაკეთება.
ყოჩაღ. ხვიჩა მოვიდა და ნიჭი ყოველდღიური შრომით განავითარა. ის არის მშრომელი ადამიანი, რომელსაც უყვარს მუშაობა კლუბის სასარგებლოდ. მას აქვს საკუთარი მიზანი და აღწევს მას. ამ ეტაპზე კი მან საოცარ წარმატებებს მიაღწია“ , _ განაცხადა იური სიომინმა.
მიუხედავად იმისა, რომ „ნაპოლიდან“ ხვიჩა კვარაცხელიას ახლო მომავალში წასვლა ნაკლებად სავარაუდოა, მაინც ვრცელდება ინფორმაციები, რომ რამდენიმე ცნობილი კლუბი ჯერ კიდევ ფიქრობს ქართველი ფეხბურთელის გადაბირებაზე.
როგორც გამოცემამ „FootballTransfers“ დაწერა, „მანჩესტერ სიტი“ კვარაცხელიასთან დაკავშირებით კვლავ რჩება თამაშში.
გამოცემის მტკიცებით, ქართველ მოთამაშეში ნეაპოლელები 150 მილიონ ევროს ითხოვენ.
ლონდონის „ჩელსიმ“ კი ესპანეთში სკაუტები გაგზავნა, სადაც ისინი გიორგი მამარდაშვილის თამაშს დააკვირდებიან.
საუბარია, „ლა ლიგის“ ბოლო ტურის მატჩზე, რომელსაც „ვალენსია“ დღეს სტუმრად „ბეტისთან“ ჩაატარებს და სწორედ ამ შეხვედრაში გაირკვევა, მამარდაშვილის კლუბი ელიტაში ადგილს შეინარჩუნებს თუ – ვერა.
„ჩელსის“ გარდა, ქართველი მეკარის საკუთარ რიგებში ხილვა არაერთ კლუბს სურს. უკვე დაიწერა „ასტონ ვილას“, „ტოტენჰემის“, „ვილიარეალის“, მადრიდის „ატლეტიკოსა“ და „პორტუს“ ვარიანტების შესახებაც.
ავტორი
