“შეიძლება, საქართველოს პრეზიდენტი ხელმძღვანელობს სხვა კონსტიტუციით და სხვა კანონმდებლობით”

 „ჩვენ გვაქვს ჩვენი დღის წესრიგი კონსტიტუციის შემუშავებასთან დაკავშირებით და მივყვებით ამ დღის წესრიგს“, _ ასე ეხმაურება ბერლინში ვიზიტით მყოფი საქართველოს პარლამენტის თავმჯდომარე საქართველოს პრეზიდენტის მიერ დაწყებულ კამპანიას – „კონსტიტუცია ყველასია”.

ირაკლი კობახიძის განცხადებით, საყოველთაო-სახალხო განხილვები კომისიის შემადგენლობაში მყოფი 73 წევრის მიერ კონსტიტუციის პროექტის მომზადების შემდეგ უნდა დაიწყოს, რასაც, მისივე თქმით, მოქმედი კანონმდებლობაც ითვალისწინებს. როგორც პარლამენტის თავმჯდომარემ აღნიშნა, კონსტიტუციურ ინიციატივებზე მსჯელობას მხოლოდ დოკუმენტის მომზადების შემდეგ აქვს აზრი.

„ჩვენი დღის წესრიგი არის რაციონალური, არის ლოგიკური, განსხვავებით იმ დღის წესრიგისგან, რომელსაც გვთავაზობს საქართველოს პრეზიდენტი. აქედან გამომდინარე, მე  კიდევ ერთხელ მინდა მოვუწოდო საქართველოს პრეზიდენტს, რომ ჩაერთოს სახელმწიფო საკონსტიტუციო კომისიის მუშაობაში, ჩართოს თავისი წარმომადგენლები ამ კომისიის მუშაობაში”,- განაცხადა ირაკლი კობახიძემ და აღნიშნა, რომ ეს მნიშვნელოვანია დახვეწილი დოკუმენტის მოსამზადებლად. „დახვეწილი დოკუმენტი ისედაც მომზადდება, ძალიან ქმედითი და ეფექტურია სახელმწიფო საკონსტიტუციო კომისია და მისი მუშაობა ძალიან ეფექტურად წარიმართება. ჩვენ ძალიან გვინდა, რომ ამ პროცესში იყოს ჩართული საქართველოს პრეზიდენტი და ჩვენთვის გაუგებარია მისი მხრიდან ბოიკოტის მიზეზი”, _ განაცხადა პარლამენტის თავმჯდომარემ.

რაც შეეხება პრეზიდენტის განცხადებას იმის თაობაზე, რომ ის ხალხის სახელით მინიჭებული მანდატით მოქმედებს, პარლამენტის თავმჯდომარემ განმარტა: „მას არ აქვს ეს მანდატი მინიჭებული, საქართველოს კანონმდებლობით განისაზღვრება ის, თუ როგორ უნდა გადაისინჯოს საქართველოს კონსტიტუცია. ამ ნორმების თანახმად, კონსტიტუციისა და კანონის მოთხოვნების თანახმად, ჯერ უნდა შემუშავდეს კონსტიტუციური კანონპროექტი და ამის შემდეგ უნდა დაიწყოს საყოველთაო-სახალხო განხილვა და კანონმდებლობის თანახმად, ამ განხილვის ინიციატორი და ორგანიზატორი არის საქართველოს პარლამენტი. ეს წერია კონსტიტუციაში და მოქმედ კანონმდებლობაში, შეიძლება, საქართველოს პრეზიდენტი ხელმძღვანელობს სხვა კონსტიტუციით და სხვა კანონმდებლობით, ეს მე არ ვიცი”,- განაცხადა ირაკლი კობახიძემ.

შეგახსენებთ, რომ საქართველოს პრეზიდენტმა პროექტი _ “კონსტიტუცია ყველასია”, დღეს კახეთიდან, კერძოდ, თელავიდან დაიწყო.