დღეს, ჩოხატაურის თანამედროვე სახვითი ხელოვნების გალერეაში, ადგილობრივი ხელისუფლების წევრები გურიის რეგიონში მოქმედ მედიასაშუალებების წარმომადგენლებს გააცნეს USAID-ის ადგილობრივი თვითმმართველობის პროგრამის მხარდაჭერით განხორციელებული კვლევის შედეგებს. კვლევა მოქალაქეთა დამოკიდებულებები მუნიციპალური საქმიანობისა და სერვისების მიმართ”, მიზნად ისახავს მუნიციპალური საქმიანობით, პროგრამებითა და სერვისებით მოქალაქეთა კმაყოფილების შეფასებას 12 მუნიციპალიტეტში, მათ შორის ჩოხატაურში.
კვლევის მიგნებები მნიშვნელოვან რესურსს წარმოადგენს დაინტერესებული მხარეებისთვის, მათ შორის, ცენტრალური და ადგილობრივი ხელისუფლების, სამოქალაქო საზოგადოებისა და მედია ორგანიზაციების, კერძო სექტორისა და აკადემიის წარმომადგენლებისთვის.
ჩოხატაურის მუნიციპალიტეტის მერმა დავით შარაშიძემ და ჩოხატაურის მუნიციპალიტეტის საკრებულოს თავმჯდომარემ ირაკლი კუჭავამ კვლევის შედეგებზე ვრცლად ისაუბრეს, რის შემდეგ ჟურნალისტების შეკითხვებს უპასუხეს.
ჩოხატაურის მუნიციპალიტეტის მერმა დავით შარაშიძემ ჟურნალისტებთან საუბრის დროს აღნიშნა:
„ეს კვლევა არის ძალიან მნიშვნელოვანი. იგი ჩვენ, ხელმძღვანელ პირებს, ადგილობრივი თვითმმართველობის წარმომადგენლებს გვიქმნის სრულ სურათს, თუ რას ფიქრობს საზოგადოება ჩოხატაურის მუნიციპალიტეტის მერიის და საკრებულოს მუშაობის შესახებ.
ჩვენ, რამდენიმე პუნქტი გასაუმჯობესებელი გვაქვს, რამდენიმე პუნქტში გვაქვს მაღალი მაჩვენებელი, რაც უფრო გვიზრდის მუშაობის მოტივაციას და კიდევ უფრო მეტს მამოძრავებელ ძალას გვიქმნის, მეტი გავაკეთოთ საზოგადოებისთვის“, _ თქვა დავით შარაშიძემ.
ჩოხატაურის მუნიციპალიტეტის საკრებულოს თავმჯდომარის, ირაკლი კუჭავას თქმით, ის მსგავსი ტიპის შეხვედრების ჩატარებას მიესალმება:
„დღეს ჩატარდა „USAID“-ის მიერ დაფინანსებული კვლევის შედეგების პრეზენტაცია. ჩვენ ჩავთვალეთ, მეგობარი ორგანიზაციის დახმარებით, მედიის წარმომადგენლებისთვის გაგვეზიარებინა ეს კვლევა.
კვლევაში იყო საინტერესო მიგნებები _ ჩვენი თანამოქალაქეების მოსაზრებების გამოხატულება, როგორია მერიის, საკრებულოს, თვითმმართველობისადმი კმაყოფილების ინდექსის. იყო საუბარი გამოწვევებზე და პრობლემებზე. ეს კვლევა სრულიად დამოუკიდებლად ჩატარდა ერთ-ერთი საერთაშირისო ორგანიზაციის მიერ და მისი სანდოობას ეჭვს არ იწვევს. აქედან გამომდინარე, ჩვენ ვისარგებლებთ კვლევების შედეგებით და ვფიქრობთ, მოქალაქეებისთვის სერვისების მიწოდებას გავაუმჯობესებთ“, _ გვითხრა ირაკლი კუჭავამ.
მანვე მოკლედ გვითხრა რა მიგნებები და გამოწვევები აჩვენა კვლევამ:
„მიგნებებში მინდა აღვნიშნო, რომ იქ სადაც ინფრასტრუქტურული პროექტები მოგვარებული იყო, შესაბამისად, წარმოიშვა ახალი საკითხები. მაგალითად, ინტერნიტაზაციის პრობლემა, მაგრამ განსაკუთრებით წარმოჩინდა მიუსაფარი ცხოველების პრობლემები“, _ აღნიშნა ირაკლი კუჭავამ.
თენგიზ სულთანიშვილი, USAID-ის ადგილობრივი თვითმმართველობის პროგრამის „სამოქალაქო ჩართულობის“ დირექტორი:
„დღევანდელი შეხვედრა, ვფიქრობ, საკმაოდ საინტერესოდ წარიმართა. სამწუხაროდ, ხშირი არ არის, როდესაც ადგილობრივი თვითმმართველობის პირველი პირები ხვდებიან მედიას და მათთან ერთად საუბრობენ სხვადასხვა საკითხზე.
დღეს საკმაოდ მნიშვნელოვანი საკითხი განიხილეს ადგილობრივი ხელისუფლების წარმომადგენლებმა მედიის წარმომადგენლებთან. შეხვედრა შეეხებოდა მოქალაქეთა კმაყოფილების შეფასებას მუნიციპალური სერვისებისა და საქმიანობის მიმართ. ვფიქრობ, ნებისმიერი დემოკრატიული საზოგადოებისთვის მნიშვნელოვანია მჭიდრო კომუნიკაცია სამოქალაქო საზოგადოების სხვადასხვა აქტორებთან, მათ შორის, მედიის წარმომადგნელებთან“.
შეხვედრის განმავლობაში ადგილობრივი ხელისუფლების წარმომადგენლებმა არაერთხელ გადაუხადეს მადლობა USAID-ის და სხვა დონორ ორგანიზაციებს მხარდაჭერისთვის, თუმცა, კითხვა სწორედ ამ დონორების მიერ გაცემული დახმარების გამო, არასამთავრობო ორგანიზაციებისა და მედიის უცხო ძალის ინტერესების გამტარებელ ორგანიზაციებად შემრაცხველი კანონის შესახებ უპასუხოდ დატოვეს. ასევე, უპასუხოდ დარჩა ბახმაროს თემაზე ბოლო დროს გაჩენილი კითხვები _ ადგილობრივი ხელისუფლების წარმომადგენლებმა მხოლოდ იმ კითხვებს უპასუხეს, რომელიც კვლევას ეხებოდა და აღნიშნეს, რომ პასუხს, შეხვედრის ორგანიზატორებთან შეთანხმების საფუძველზე, მხოლოდ იმ კითხვებზე გასცემდნენ, რომელიც კვლევას შეეხებოდა.
ავტორი
