ქალაქ ოზურგეთის #1 საჯარო სკოლაში დაწყებითი კლასების მოსწავლეებმა, მათმა მშობლებმა და პედაგოგეგმა შემოდგომის ზეიმი მოაწყვეს.
სკოლის დირექტორის, მაია თავართქილაძის თქმით, ღონისძიებაზე განსაკუთრებით მშობლის როლი იყო გამოკვეთილი, როგორც სასკოლო საზოგადოების აქტიური წევრი და ერთ-ერთი წამყვანი ფიგურა.
ღონისძიების მონაწილეებმა ერთი საათის განმავლობაში მოახერხეს წარმოეჩინათ საქართველოს კუთხეების კულტურა, ეთნოგრაფია, სამზარეულო, წეს-ჩვეულებება, სიმღერები და ცეკვები. საქართველოს კუთხეების წარმოდგენით კიდევ ერთხელ გაუსვეს ხაზი, რომ საქართველოს ერთიანობა წარმოადგენს ადამიანებისთვის მთავარ საფიქრალს.
“ჩვენ გვყავს არაჩვეულებრივი მშობლები და ძალიან აქტიურად არიან ჩართული სასკოლო ცხოვრებაში, რაც ყველასთვის მისასალმებელია.“– გვითხრა მაია თავართქილაძემ.
ღონისძიება გაიხსნა გურული იუმორით და დასრულდა სიმღერით „გამარჯობა აფხაზეთო შენი“.
ვიქტორია შამუგია: _ ოზურგეთში 27 წელია ვარ. ოჯახის წევრები გალიდან და სოხუმიდან მყავს. ოზურგეთში, რომ ჩამომიყვანეს 8 თვის ვიყავი და აფხაზეთში 6 წლის ასაკში ვიყავი“.
ვიქტორიამ თავისი ოჯახის წევრების დახმარებით გალიდან ის პროდუქტები ჩამოიტანა, რომელიც აფხაზური სამზარეულოს წარმოჩენისთვის სჭირდებოდა.
#1 საჯარო სკოლის პედაგოგის, ნინო კილაძის თქმით, საქართველო აუცილებლად უნდა გახდეს ერთიანი.
“ჩვენ თქვენ გვიყვართ _ ეს არის ჩვენი გზავნილი აფხაზი დების და ძმების მიმართ. ამიტომ მშობლებმა შეასრულეს სიმღერა “გამარჯობა აფხაზეთი შენი“, _ გვითხრა ნინო კილაძემ.
ღონისძიების დასასრულს სტუმრებმა და მასპინძლებმა საქართველოს კუთხეებისთვის დამახასიათებელი კერძები დააგემოვნეს.
ავტორი
