ქართული ოცნების“ მმართველობის პირობებში, ზურაბიშვილის ანგარიშზე თანხის გადარიცხვის მიზნით, შემომწირველთა პირადი მონაცემების გამოყენება, სავარაუდოდ, უკანონოდ მოხდა.
საუბარია, ჩაჩავასა და ღუდუშაურის სახელობის კლინიკებზე, რომელთა ექიმებმაც, სავარაუდოდ, მენეჯმენტის დავალებით, ათი ათასობით ლარი ზურაბიშვილის საარჩევნო ფონდში უკანონოდ გადარიცხეს.
ზურაბიშვილის საარჩევნო ყულაბაში თანხის ჩარიცხვის მიზნით, პირადი მონაცემების უკანონო გამოყენებას თავად კლინიკის პერსონალი ადასტურებს.
სალომე ზურაბიშვილის ერთ-ერთი მსხვილი შემომწირველი, ჩაჩავას კლინიკის გინეკოლოგიური სექტორის ხელმძღვანელი ნიკოლოზ კინტრაია, რომელმაც დამოუკიდებელ დეპუტატს 20 000 ლარი გადაურიცხა სოციალურ ქსელში წერს, რომ თანხის გადარიცხვის მიუხედავად, სალომე ზურაბიშვილის მხარდამჭერი არ არის, ამიტომ გაურკვეველია, რატომ და ვისი დავალებით გადარიცხა კინტრაიამ აღნიშნული თანხა სალომე ზურაბიშვილის საარჩევნო ფონდში.
„ბოლო ორი დღის განმავლობაში ძალიან ბევრი მეგობარი და ჩემთვის ძვირფასი ადამიანი დამიკავშირდა, ისინი, ვისაც ჩემზე გული შეტკივათ და მაფასებენ. მათ შორის, ისეთებიც ძალიან დიდი ხანი რომ არ მინახავს. მათ მიერ დასმული კითხვები გავაერთიანე და მინდა ყველას ერთად გავცე პასუხი.
1. პრეზიდენტის არჩევნებზე ვაპირებ მისვლას? _ ვაპირებ.
2. ხმას სალომე ზურაბიშვილს ვაძლევ? _ არა.
3. ვის მივცემ ხმას? _ დაველოდები საარჩევნო კომპანიის დამთავრებას და მერე გადავწყვეტ. ჯერ დრო ბევრია.
4. ამას გულწრფელად ვამბობ? _დიახ, _ წერს კინტრაია სოციალურ ქსელში.
,,გურია ნიუსმა“ ნიკოლოზ კინტრაიასგან დამატებითი ინფორმაციის მოპოვება სცადა, თუმცა მან კომენტარის გაკეთება არ მოისურვა.
კლინიკები, რომელთა პერსონალის პირადი მონაცემების გამოყენება უკანონოდ მოხდა, ,,ქართული ოცნების“ მაჟორიტარ დეპუტატს ელგუჯა გოცირიძეს ეკუთვნის.
რა გზით მოხვდა სალომე ზურაბიშვილის საარჩევნო ფონდში ისეთი პერსონალის მიერ შეწირული თანხები, რომლებიც ზურაბიშვილის მხარდამჭერთა სიაში არ ირიცხებიან? _ საკითხზე ,,გურია ნიუსთან“ ელგუჯა გოცირიძე საუბრობს.
_ ბატონო ელგუჯა, ჩაჩავასა და ღუდუშაურის სახელობის კლინიკები თქვენს საკუთრებაშია, ამიტომ ჩნდება კითხვა, თქვენი მოწოდებით ხომ არ ხდება პერსონალის პირადი მონაცემების გამოყენება და სალომე ზურაბიშვილის საარჩევნო ფონდში თანხების გადარიცხვა?
_ ძალიან მაგარი ვყოფილვარ თუ ვინმეს მოვუწოდებ, რომ 20 და 30 ათასი ლარი გადარიცხონ. ცოტა რეალობას მოწყვეტილები ხომ არა ვართ?!
_ ჩაჩავას კლინიკის ერთ-ერთი თანამშრომელი აცხადებს, რომ ზურაბიშვილის ფონდში 20 000 ლარის ჩარიცხვის მიუხედავად, საპრეზიდენტო კანდიდატის მხარდაჭერას არ აპირებს, როგორ ხსნით ამ შემთხვევას?
_ ჩემი აზრით, ეს არ გამორიცხავს ერთი მეორეს, თუმცა უმჯობესია, მასთან დააზუსტოთ. ის, რომ ამ პიროვნებამ ვიღაცას შესწირა თანხა, არ ნიშნავს იმას, რომ ვინმეს მოწინააღმდეგე ან მომხრეა.
_ რაც შეეხება მენეჯმენტს, როგორ ფიქრობთ, მენეჯმენტის მხრიდან მომუშავე პერსონალზე რაიმე სახის ზეწოლის განხორციელებას აქვს ადგილი ?
_ ასეთი ტრადიცია არ არსებობდა. ყოველ შემთხვევაში, ჩვენს კლინიკებში. არამგონია, მენეჯმენტმა მსგავსი რამე გააკეთოს, ვერ დავიჯერებ ამას. მე არ მქონია მსგავსი შინაარსის საუბარი პერსონალთან და არ მგონია, რომ მენეჯმენტიც სხვაგვარად ფიქრობდეს.
ის პიროვნება ვისზეც საუბრობთ, ზრდასრული ადამიანია. როგორც ვიცი, გონიერი ექიმია და ხომ ვერ მივუთითებ ასე რატომ დაწერე-თქო?
_ თავად აპირებთ სალომე ზურაბიშვილს საარჩევნო ფონდში თანხის გადარიცხვას?
_ მოგეხსენებათ, მე ვარ თერჯოლა-ტყიბულის მაჟორიტარი დეპუტატი, ამიტომ ჩემი შესაძლებლობები მთლიანად ორიენტირებულია ამ რაიონების განვითარებაზე. ჯერჯერობით, არ მიფიქრია ამაზე, თუმცა უპირატესობას მაინც ვანიჭებ ხალხის დახმარებას. მოგეხსენებათ, ჩემი ხელფასი მთლიანად მიდის გაჭირვებული ოჯახების დახმარებაზე“, _ გვითხრა გოცირიძემ.
დადასტურდება თუ არა პერსონალზე კლინიკების მენეჯმენტის ან მათზე ზემდგომი პირების მხრიდან რაიმე ზეწოლა და მოხდება თუ არა მასზე კანონიერი რეაგირება, ჯერჯერობით, უცნობია.
