დღეს 21-ე საუკუნეში ნაკლებად წერენ წერილებს ქაღალდზე. ეს წერილები მეტად მნიშვნელოვანია, რადგან სოფელ გაღმა დვაბზუს საჯარო სკოლის მეექვსე კლასელებმა აფხაზ თანატოლებს მისწერეს.
ასე ეხმიანება თავიანთ აფხაზ თანატოლებს ოთიკო პაპიძე და ნიკა ირემაძე: ,,გამარჯობა, ჩემო აფხაზო მეგობარო“ ჩამოდი საქართველოში, აქაურობა ძალიან ლამაზია. შეიძლება თქვენ კუთხეს არ შეედრება, მაგრამ ჩამოდი დაათვალიერე. ვიცი, რომ ძალიან მოგეწონება. აქ დაგათვალიერებინებ: დინოზავრის ნაკვალევს, ბათუმს და სხვა ადგილებს. მინდა, რომ ჩვენ შორის მეგობრობა დამყარდეს“.
„მე ვიცი ცოტა აფხაზეთზე. ჩამოვალ და დამათვალიერებინე ყველაფერი. მე მინდა აფხაზეთზე ბევრი რამ გავიგო. ვიცი, რომ აფხაზეთი არის ძალიან ლამაზი კუთხე საქართველოში. ჩემთან სტუმრობისას აუცილებლად მოგანახულებინებ ბახმაროს და გომის მთას“, _ ასე მეგი ნაკაიძე და ლიკა ღაჟონია მიმართავს აფხაზ მეგობრებს.
გორგაძე მარი და რამიშვილი თაკო: ,,ჩემო მეგობარო, როცა ჩამოხვალ აფხაზეთიდან, ჯერ ჩემს ულამაზეს სოფელს დაგათვალიერებინებ. შემდეგ წაგიყვან და მოგატარებ მთელ საქართველოს და განახებ ყველა საინტერესო ძეგლს. მერე ვისაუბრებდით რა მოგეწონა ყველაზე მეტად.“
თავისი ბავშვური სურვილი ასე ჩამოაყალიბა ნოდარ მამალაძემ: „გვინდა, რომ ისევ გავერთიანდეთ და გავაერთიანოთ საქართველო. უფრო მეტად გავძლიერდეთ და არ დავნებდეთ საქართველოსთვის.“
რამინი რამიშვილი: ,,გამარჯობა აფხაზო მეგობარო. შენ ალბათ ბევრი რამ გსმენია ჩვენს შესახებ ბევრი ცუდი რამ და კარგიც. ჩამოდი ჩემთან ბევრ კარგ რამეს ნახავ. გავერთობით, ჩემთან ახლოს მდინარე ჩამოდის და ვითევზაოთ. შენ ჩემთან წამოხვალ და მე შენთან წამოვალ…. მე შენ გელოდები. კარგად. “
“წერილი ჩემს აფხაზ თანატოლს…გამარჯობა ჩემო საუკეთესო მეგობარო. შენ ხომ აფხაზეთში ცხოვრობ და არ გინახავს ჩვენი მხარე, ჩამოდი, დაგათვალიერებ ყველა კუთხეს. მეც მინდა ჩემი თვალით ვნახო აფხაზეთი “, _ წერს რიმა პაპიძე და მირანდა ართმელაძე.
მირანდა სურმანიძე წერს: „გამარჯობა ჩემო აფხაზო მეგობარო! ჩამოდი ჩვენთან, აქაურობა ძალიან ლამაზია. დარწმუნებული ვარ მოგეწონება საქართველოს კუთხეები. მინდა ერთმანეთი გვიყვარდეს და ერთად ვიყოთ. იმედი მაქვს, რომ როდესმე ჩამოვალ აფხაზეთში და იმედი მაქვს შენც ჩამოხვალ.“
ხათუნა რუსიეშვილი, გაღმა დვაბზუს საჯარო სკოლის ისტორიის მასწავლებელი:
“გაღმა დვაბზუს საჯარო სკოლაში ხორციელდება პროექტი „არა ოკუპაციას!“ პროექტში V -IX კლასების მოსწავლეები არიან ჩართულები. პროექტს ისტორიისა და ქართულის პედაგოგები ერთობლივად ახორციელებენ. ყველა კლასი თავისებურად არის ჩართული ამ პროექტში. „წერილი აფხაზ მეგობარს“ ერთ-ერთი საინტერესო აქტივობა არის, რომელიც მეექვსე კლასში განვახორციელეთ საგანი „ჩვენი საქართველო“ -ში (პედაგოგი ხათუნა რუსიეშვილი). ჩვენ ეტაპობრივად ვსწავლობთ საქართველოს სხვადასხვა კუთხეების ისტორიას. ამ ეტაპზე ჩვენი ულამაზესი კუთხე აფხაზეთი შევისწავლეთ. ბევრი ვისაუბრეთ, ბევრ საინტერესო ფაქტს გავეცანით და გადავწყვიტეთ ჩვენ აფხაზ თანატოლებს წერილების სახით შევხმიანებოდით, გამოგვეხატა დიდი სიყვარული და პატივისცემა, ვთხოვეთ რომ გვესტუმრონ და იმედი გვაქვს რომ ჩვენც შევძლებთ მათთან ჩასვლას. ამ წერილებით ჩვენ იმ დიდი ხიდის პატარა საფეხური ავაშენეთ, რომელზეც იმედია, ეს ბავშვები და მისი აფხაზი თანატოლები ივლიან.“
