11 აგვისტოს, ოზურგეთის მუნიციპალიტეტის საკრებულოს მორიგ სხდომაზე, რომელსაც საკრებულოს თავმჯდომარემ, დავით დარჩიამ ბოლო უწოდა, სამი საკითხი განიხილეს.
პირველის საკითხის ირგვლივ, რომელიც მუნიციპალიტეტის საკრებულოს უძრავ-მოძრავი ქონების საპრივატიზაციო ობიექტების ნუსხის დამტკიცებას ეხებოდა, სადავო გახდა გრეიდერის გაყიდვის თემა, რომელიც 2013 წელს აქვს მერიას შესყიდული.
მერიის წარმომადგენელმა, ავთანდილ ჩხაიძემ ისაუბრა ტექნიკის თაობაზე. თქვა, რომ თავის დროზე, ეს ექსკავატორი 145 ათას ლარად შეიძინეს, თუმცა, საკმაოდ ამორტიზირებულია, სჭირდება მოვლა-პატრონობა, რაც ბევრს საპოხ მასალას თუ ნაწილებს ითხოვს. ამიტომ შემოაქვთ წინადადება, 56 ათას ლარად გაყიდვის თაობაზე.
საკრებულოს თავმჯდომარის მოადგილემ, გიორგი ღურჯუმელიძემ გრეიდერის ღირებულების თაობაზე შენიშვნა გააკეთა _ 230 ათასი ლარი ღირდა, კარგად მახსოვს, ხარჯები კი ჩვეულებრივი ამბავია და ჯობს, გაყიდვა ამოვიღოთ დღის წესრიგიდანო.
თავის მხრივ, ავთანდილ ჩხაიძეც არ დაეთანხმა ღურჯუმელიძეს და კვლავ გაიმეორა, 145 ათას ლარს ათი ლარი აკლდაო.
_ მაინც არ მიგვაჩნია მიზანეწონილად გაყიდვა. უმჯობესია თანხების მობილიზება და გაყიდვაზე მერე ვიფიქროთ. ახლა კი კოლეგები დამეთანხმებიან , რომ ამოვიღოთ დღის წესრიგიდან მხოლოდ გრეიდერის გაყიდვის საკითხი, _ კვლავ გაიმეორა თხოვნა გიორგი ღურჯუმელიძემ.
„ნაციონალმა“ დეპუტატმა დავით მჟავანაძემ, ჩვეულებისამებრ, გამოსვლა ხმაურიანი განცხადებებით დაიწყო _ თუ არ იქნებოდა გამომდგარი, თავის დროზე რატომ არ იფიქრეს და რატომ იყიდეს 145 ათასლარიანი ტექნიკა, ახლა კი ნახევარზე უფრო ნაკლებ ფასად რატომ ყიდიანო.
საკმაო დავის შემდეგ, საკრებულოს წევრები არ დაეთანხმნენ გრეიდერის გაყიდვას და გასაყიდი ტექნიკის სიიდან მხოლოდ ეს ერთეული ამოიღეს.
კიდევ ერთ საკითხს, რომელიც ოზურგეთის მუნიციპალიტეტის მერის, კოტე შარაშენიძის შვებულებაში გასვლის თაობაზე განცხადებას ეხებოდა, ხმაური, დაპირისპირება, ასევე, მერის მიმართ კრიტიკულად შეფასების განცხადებები მოჰყვა.
დავით დარჩიამ განაცხადა, რომ მერი უნდა მოსულიყო ამ სხდომაზე და გაეკეთებინა კოლეგებთან ანგარიში:
_ სამწუხაროდ, არ მოვიდა მერი, ლაშა თავაძე დაკავებულია, ალბათ, _ თქვა მან იურიდიული სამსახურის უფროსის მისამართით, _ კარგი იყო დასწრებოდა ამ სხდომას, ეთქვათ კოლეგებისთვის რა გააკეთეს. იმედია, მომავალში ასე არ მოხდება, _ თქვა დარჩიამ.
დავით დარჩიას შემდეგ, თანმიმდევრულად გამოვიდნენ პოზიციის („ქართული ოცნების“) წარმომადგენელი საკრებულოს წევრები, რომელთა საუბრის თემა იყო კოტე შარაშენიძის კრიტიკა, რომ მან დატოვა განუხორცილებელი პროექტები; რომ ბიუჯეტის ექვსი თვის ანგარიში არ წარმოადგინა და შესაძლოა, სამომავლოდ ხელფასების გაცემა სერიოზული საფრთხის ქვეშ დადგეს; რომ მერი მხოლოდ მომხრეებზე არიგებს სარეზერვო ფონდიდან თანხებს; რომ მუზეუმები გაპარტახდა უყურადღებობის გამო და ასე შემდეგ…
მარიკა ჩხიკვიშვილი, საკრებულოს წევრი, პარტია „ქართული ოცნების“ ფრაქციის თავმჯდომარე:
_ ვისურვებდი, დღეს აქ მერი მოსულიყო და ჩაებარებინა ანგარიში. ეს აუცილებელი იყო. ძალზე უპასუხისმგებლოდ იქცევიან. მერი სახლის სახურავებს მხოლოდ მის მომხრეებზე გასცემს. ასევე, მერის წარმომადგენლები სოფლებიდან ადგილობრივთა განცხადებებს მხოლოდ მერის თანხმობის შემთხვევაში აგზავნიან. ვინც მხარდამჭერი არ არის, მათ არ ეხმარება, _ თქვა მან და ხაზგასმით აღნიშნა, რომ კოტე შარაშენიძე მხოლოდ მომხრეებზე ზრუნავს.
ლელა საჯაია, საკრებულოს წევრი, ერთ-ერთი კომისიის თავმჯდომარე:
_ ჩვეულებრივი პროცედურული ამბავი იყო _ მერი უნდა ყოფილიყო დღეს აქ. გულისტკივილით უნდა აღვნიშნო, რომ როცა მერი მიბრძანდება შვებულებაში, აუცილებელია ისაუბროს გაკეთებულ საქმეებზე. რაც გაკეთებულია ისიც პარტახდება… უყურადღებოდაა მიტოვებული არტემ ერქომაიშვილის სახლ-მუზეუმი მაკვანეთში, გაპარტახებულია, ასევე, ვარლამ სიმონიშვილის სახლ-მუზეუმი შემოქმედში, ოზურგეთის ისტორიული მუზეუმი კი დღემდე არაა საზოგადოების სამსახურში. მერს უნდა ესაუბრა, მიზანმიმართულად ხდება ეს თუ რაიმემ შეუშალა ხელი, _ თქვა საჯაიამ და გამოკვეთილად თქვა, ოზურგეთში აღნიშნული სამი მუზეუმის საქმე ძალიან ცუდად არისო.
ხათუნა ცერცვაძე, საკრებულოს წევრი:
_ ძალიან მოხარული ვიყავით, რომ გომისმთის განვითარების გეგმა შედგა, შეიქმნა ახალი ადმინისტრაციული ერთეული, თუმცა, ახლა იქ უსახური შენობებია. ამ ყველაფერზე მაღალი საზოგადოებრივი ინტერესის გამო ვსსუბრობ, _ თქვა მან.
გიორგი ღურჯუმელიძემ განაცხადა, რომ გომისმთის საკითხი სტრატეგიულად მნიშვნელოვანია:
_ იქ უკანონო მშენებლობის პროცესი უნდა შეჩერებულიყო, მაგრამ არავინ არ შეიწუხა თავი. მერს უნდა წარმოედგინა დეტალური ანგარიში, რა ხდება. 1 800 000 ათასი ლარი დაიხარჯა მუნიციპალური განვითარების ფონდიდან მუზეუმის რემონტზე, სადაც ექსპოზიცია უნდა მოწყობილიყო. ასევე, არტემ ერქომაიშვილის სახლ-მუზეუმი, სამი-ოთხი წლის აშენებული, უპატრეონოდაა. სადაა 300-400 ათასი ლარის გადახდის ფუფუნება, როცა კოსტავას ქუჩაზე საბავშვო ბაღი არ გვაქვს _ 35 წლის წინაა აშენებული და 500 ათასი ლარი არ გამოინახა, ახალი რომ აშენებულიყო, _ თქვა ღურჯუმელიძემ.
საფინანსო კომისიის თავმჯდომარის, გია ჩაგანავას საუბრის შემდეგ, მერიას 6 თვის ბიუჯეტის ანგარიში არ წარმოუდგენია და ამან შესაძლოა პრობლემა შექმნასო, განმარტება ლავრენტი ბიგვავამ გააკეთა:
_ ნახევარი წლის ბიუჯეტის ანგარიში არ ყოფილა წარმოდგენილი. მე გთხოვეთ, ყოველი თვის ბოლოს წარმოედგინათ ანგარიში. ეს ნონსენსია. არ მინდოდა, დღეს ასე მინორული ტონით დამემთავრებინა. უმჯობესი იყო მოსულიყო ვინმე, წარმოედგინათ ანგარიში. საკრებულომ ყველაფერი გააკეთა, რომ მუშაობაში ხელი არ შეშლოდა მერიის სამსახურებს. მომავალში , იმედია, ასე არ მოხედება, _ დაასრულა მან.
დავით დარჩია დაეთანხმა, რომ სამომავლოდ საქმე ძალიან კარგად ექნებათ…
საკრებულოს წევრმა, გელა აროშიძემ იგნორირება უწოდა მერიის მხრიდან საკრებულოს სხდომაზე მერის და სხვა წარმომადგენელთა გამოუცხადებლობას.
როცა პოზიციის, „ქართული ოცნების“ წარმომადგენლებმა კარგად „დასცხეს“ მერს, შემდეგ ოპოზიციამ, კერძოდ, დავით მჟავანაძემ ითხოვა სიტყვა:
_ მინდა გამოვეხმაურო საკითხებს, რაც აქ დასვით. მერს თავისი გაჭირვება ეყოფა და თავისი წილი პასუხისმგებლობა აკისრია, მაგრამ როცა მერს გადააბრალებთ ყველაფერს, თქვით, თქვენი რამდენი ახლობელი და ნათესავი აშენებდა გომისმთაზე სახლებს უკანონოდ! შიფრებით დარბოდით თქვენ თვითონ. …მინისტრმა წულუკიანმა რატომ „გააპრავა“ ეს უკანონო მშენებლობები?! ახლა ეს სენი ბახმაროსაც გადაედო და დაღუპულია ისიც. მაშინ სად იყავით? ტურისტი იქ არ მივა სახლის ასაშენებლად _ თქვენი ბიძაშვილ-მამიდაშვილების და თქვენი სახლებია გომისმთაზე, _ ხმას აუწია და არ ცხრებოდა მჟავანაძე.
_ შენ და მიშამ გარეჯი დააბრუნეთ ჯერ! _ რეპლიკა ესროლა გოჩა კილაძემ.
„ოცნების“ ერთი დეპუტატი კი გომისმთაზე „დამარხვასაც“ შეპირდა მჟავანაძეს.
_თქვენ აქამდე ტაშს უკრავდით მერს, თვალებში უყურებდით. მარიკა ჩხიკვიშვილი რომ აკრიტიკებდა, ხმა არ ამოგიღიათ და დღეს ლანძღავთ ერთხმად. ჩვენ როცა მხარი დავუჭირეთ, ღიად ვთქვით და როცა ვაკრიტიკებთ, ამასაც ვამბობთ, _ გაცხარებულ დავაში ჩაერთო მეორე „ნაციონალი“ დეპუტატი ბესო ქათამაძე.
ერთი სიტყვით, ბოლო სხდომაზე, ოცნების დეპუტატებმა „დასცხეს“ და კრიტიკის ქარცეცხლში გაატარეს კოტე შარაშენიძე, რაზეც „ნაციონალი“ დეპუტატები ნაწილობრივ დაეთანხმნენ, ბოლოს კი, ერთმანეთიც არ დაინდეს.
2017 წლის მოწვევის საკრებულოს ბოლო სხდომა დასრულდა. მუდმივმა ოპონენტებმა _ მარი ჩხიკვიშვილმა და დავით მჟავანაძემ ერთმანეთს ხელი ჩამოართვეს…
[sexy_author_bio]
