„შენი ყოველი დაუფიქრებელი ნაბიჯი დინებას ბოლოს მაინც შენთან მოაქვს”, „ნარჩენები სანაგვე ყუთებისთვისაა და არა მდინარეებისთვის” – ამ მოწოდებების მქონე ბანერები ოზურგეთისა და ამბროლაურის მცხოვრებლებმა მდინარეებთან განათავსეს. ადგილობრივმა ახალგაზრდებმა ეს გამაფრთხილებელი ბანერები, შესაბამისი QR კოდებით, ევროკავშირისა და კავკასიის გარემოსდაცვითი არასამთავრობო ორგანიზაციების ქსელის (CENN) მხარდაჭერით შექმნეს. QR კოდებს მოკლე ვიდეოებზე გადაჰყავხართ, რომლებიც თითოეული მდინარის დაბინძურების ხარისხის შესახებ გიყვებათ.
ინსპირაცია იყო ევროკავშირის მიერ მხარდაჭერილი “საქართველოს კლიმატის პროგრამა” რომელსაც, რეგიონულ პარტნიორ ორგანიზაციებთან ერთად, ორგანიზაცია CENN ახორციელებს.
კლიმატის პროგრამის მცირე გრანტების კომპონენტის ფარგლებში გურიასა და რაჭა-ლეჩხუმში დაფინანსდა პროექტი სახელწოდებით – “სამოქალაქო აქტივიზმის ხელშეწყობა მდინარეების დაბინძურების შემცირებისათვის ოზურგეთის და ამბროლაურის მუნიციპალიტეტებში“.
პროექტის მიზანი იყო მდინარეების დასუფთავების და ზოგადად, ცნობიერების ამაღლების კამპანიას განგრძობითი ხასიათი ჰქონოდა. პროექტში ორი რეგიონიდან 40 ადამიანი იყო ჩართული.
საქართველოს კლიმატის ცვლილებასთან ბრძოლის პროექტის ფარგლებში, ახალგაზრდები შვიდი თვის განმავლობაში იკვლევდნენ მდინარეების დაბინძურებისა და ნარჩენების მართვის პრობლემებს. კლიმატის ცვლილების საკითხებზე შედგენილი თემატური ტრენინგები ორმოცმა ახალგაზრდამ გაიარა. მათ თავიანთი მუნიციპალიტეტების მდინარეთა მდგომარეობა შეისწავლეს და დაგეგმეს ცნობიერების ამაღლების კამპანიები, რომლებიც საინფორმაციო შეხვედრებს, სლოგანების შექმნასა და საინფორმაციო ვიდეორგოლების დამზადებას მოიცავდა.
კლიმატის ცვლილების ეპოქაში მდინარეების დაბინძურება ერთ-ერთი უმნიშვნელოვანესი გამოწვევაა. ეს ძალიან ბევრ რამეზე ახდენს ნეგატიურ ზეგავლენას. გარდა სასმელი წყლით მომარაგებისა, მდინარეები და ტბები წარმოქმნის საკვებს მილიონობით ცოცხალი ორგანიზმისთვის, მათ შორის, ადამიანებისთვის. ამიტომ, მათი დაცვა და მოფრთხილება პირდაპირ აისახება ჩვენს ჯანმრთელობასა და კეთილდღეობაზე.
საქართველოში ხშირად ნახავთ მდინარის პირას დაყრილ, ან სულაც, პირდაპირ მდინარეში ჩაყრილ პოლიეთილენის პარკებს, პლასტმასის ბოთლებსა და სხვა საყოფაცხოვრებო ნარჩენებს.
ყოველწლიურად, სექტემბრის მეოთხე კვირას, მსოფლიოში მდინარეების დღე აღინიშნება. ამ დღეს საქართველოშიც აღნიშნავენ. თუმცა, უმეტესად, ეს მხოლოდ მდინარეების დასუფთავების ერთჯერად აქტივობაში გამოიხატება და არ აქვს განგრძობითი ხასიათი, მაშინ, როცა მთავარი ამოცანა ინფორმაციის მუდმივი მიწოდება და ადამიანების ქცევის ცვლილება უნდა იყოს.
ოზურგეთელი ახალგაზრდების მიერ განთავსებული ეს ბანერი “გურია ნიუსმა“ მდინარე ბახვისწყალთან გადაიღო. ბახვისწყალი გურიის ერთ-ერთი წყალუხვი მდინარეა, რომლის სიგრძე 42 კმ-ია და თითქმის ასეულ პატარა ღელესა და მდინარეს იერთებს.
“დაიცავი დედამიწა – დაიცავი შენი მომავალი!” _ ასეთი წარწერა დატოვეს ახალგაზრდებმა ბახვისწყალთან.
ახალგაზრდების ძალისხმევით განთავსებულ ბანერთან მიმოფანტული ნაგავი, რომელიც ჩვენმა კამერამ დააფიქსირა, მიუთითებს, რომ სამწუხაროდ, ადამიანების ქცევის ცვლილება რთულია და ეს ცვლილება ხელისუფლების, მესამე სექტორის, მედიის დიდ ჩართულობას მოითხოვს.
