გუშინ გავრცელდა ინფორმაცია რომ შესაძლოა მომავალი სეზონიდან საქართველოს ეროვნული გუნდის თავდამსხმელი გიორგი მიქაუტაძე შოთა არველაძის „ჰალ სიტიში“ ვიხილოთ.
ცნობილი გახდა რომ ინგლისური გუნდი ახალგაზრდა ქართველის შესახებ ფრანგულ „მეცთან“ მოლაპარაკებას უკვე აწარმოებს. მიქაუტაძეს ბელგიურ „სერენში“ იჯარა უკვე დაუსრულდა და ფრანგულ „მეცში“ უნდა დაბრუნდეს.
გუშინ პოლონურმა გამოცემამ „meczyki.pl“ გაავრცელა ინფორმაცია, რომ კლუბი „კრაკოვიას“ ქართველი მოთამაშე ოთარ კაკაბაძე შესაძლოა გერმანულ „შტუტგარტში“ გადავიდეს. ინფორმაცია ჟურნალისტმა ტომაშ ვლოდარჩიკმა გაავრცელა:
„რამდენიმე დღის წინ „შტუტგარტმა“ ოთარ კაკაბაძის შესახებ ინფორმაცია გამოითხოვა. შესაძლოა ქართველი მალე დიდ კლუბში ვიხილოთ“.
ოთარ კაკაბაძე „კრაკოვიას“ ზაფხულში, თავისუფალი აგენტის სტატუსით შეუერთდა და კლუბთან სამწლიანი კონტრაქტი გააფორმა. მან კლუბის მაისურით 18 მატჩი ჩაატარა და მის ანგარიშზე 3 გოლი და 2 შედეგიანი გადაცემაა.
„შტუტგარტმა“ მიმდინარე სეზონი გერმანულ ბუნდესლიგაში მე-15 პოზიციაზე დაასრულა, 33 ქულა დააგროვა და უმაღლეს დივიზიონში ადგილის შესანარჩუნებლად ბრძოლას გადაურჩა.
ფრანგული სპორტული მასმედიის ცნობით, „პარი სენ-ჟერმენი“ კილიან მბაპეს შესანარჩუნებლად ყველაფერს აკეთებს.
გუშინ ცნობილი გახდა რომ „პარი სენ-ჟერმენმა“ მბაპეს კლუბის სპორტულ პროექტზე სრული კონტროლი შესთავაზა. მოთამაშეს უფლება ექნება მწვრთნელის შერჩევის პროცესში წვლილი შეიტანოს და თანაგუნდელების მომავალთან დაკავშირებით, სათქმელი ჰქონდეს.
„პარი სენ-ჟერმენი“ კილიანის კონტრაქტის გასაუმჯობესებლადაც მზადაა. პარიზელები თანახმა არიან, მბაპეს ყოველთვიურად 4 მილიონი გირვანქა სტერლინგი გადაუხადონ, რაც მის ამჟამინდელ ხელფასზე 2 მილიონით მეტია. ამასთან, ფრანგი ფეხბურთელი ხელშეკრულების გაფორმების სანაცვლოდ ბონუსსაც მიიღებს, რომელიც 100 მილიონი გირვანქა სტერლინგის ოდენობის იქნება.
ჩეჩნეთის რესპუბლიკის პრეზიდენტმა რამზან კადიროვმა კი სრულიად მსოფლიო სპორტის წინააღმდეგ გაილაშქრა. კადიროვმა განაცხადა, რომ იმ პირებს, რომლებმაც რუს სპორტსმენებს სანქციები დაუწესეს, მალე ბოდიშის მოხდა მოუწევთ.
„როდესაც ჩემს წინააღმდეგ სანქციები დაწესდა, თავი გამარჯვებულად მივიჩნიე. რუსი სპორტსმენებიც გამარჯვებულები არიან. ვულოცავ მათ გამარჯვებას. მათი ეშინიათ და ამიტომ არ უშვებენ.
ვფიქრობ, არსებობენ ქვეყნები, რომლებიც ჩვენთან მეგობრობენ. მათ შეგიძლიათ კონკურენცია გაუწიოთ. ვიცხოვროთ იქამდე, სანამ მთელ მსოფლიოს არ დავუმტკიცებთ, რომ მართლები ვართ და ჩვენი გადატეხვა და დაჩოქება შეუძლებელია. ეს დრო მალე მოვა. მათ უნდა აღიარონ ეს და ბოდიში უნდა მოიხადონ. უნდა გააუქმონ ყველა სანქცია, როგორც სპორტსმენების, ისე ზოგადად ქვეყნის მიმართ. ეს აუცილებლად მოხდება“
ამასობაში, ფრანგი მცველი სილვენ დისტინი უკრაინელი ხალხის დასახმარებლად 1300 კილომეტრის ველოსიპედით გავლას გეგმავს. ყოფილი ფეხბურთელი ამბობს, რომ ინგლისის ქალაქ პულიდან ფრანგულ სან ტროპემდე ველოსიპედით იმოგზაურებს, რითიც უკრაინის დასახმარებელ ფონდში გადასარიცხ თანხას მოაგროვებს.
„ყოველდღე ვხედავთ ოჯახებს, რომლებიც ძვირფას ადამიანებს კარგავენ. ჩვენ ყველას ოჯახები გვყავს. ვიფიქრეთ, რომ ამით მათ დავეხმარებოდით და მზად ვართ ამისთვის. ფეხბურთისგან განსხვავებით, ეს უფრო რთული საქმეა. დაახლოებით ბოლტი რომ მარათონში ჩაებას“, – განცხადა სილვენ დისტინმა.
დისტინს სან ტროპეში ჩასასვლელად 10 დღე დასჭირდება, მასთან ერთად საფრანგეთისკენ რამდენიმე ადამიანი გაემგზავრება. სილვენი წლების განმავლობაში „მანჩესტერ სიტის“ ღირსებას იცავდა, რის შემდეგაც მან „პორტსმუთში“, „ევერტონსა“ და „ბორნმუთში“ ითამაშა.
ავტორი
